ନୟାଗଡ଼ ଅଫିସ,୨୪।୨:ଜିଲାସ୍ତରୀୟ କୃଷି ଯନ୍ତ୍ରପାତି ମେଳାରେ ଚାଷୀଙ୍କୁ ଦେଖିବାକୁ ମିଳୁନି । ୩ଦିନ ଧରି ମେଳା ଚାଲିଥିବାବେଳେ ଶୁକ୍ରବାର ମେଳା ଉଦ୍ଯାପନ ହେବ । ହେଲେ ଚାଷୀ କାହିଁକି ଆସୁ ନାହାନ୍ତି ପଚାରିଲେ କୃଷି ବିଭାଗ ପକ୍ଷରୁ ଉତ୍ତର ମିଳୁନି । ଷ୍ଟଲଗୁଡିକ ଖଁା ଖଁା ଦେଖା ଯାଉଛି । ପ୍ରତ୍ୟହ ୧୦୦ ଚାଷୀଙ୍କ ପାଇଁ ପାଠଶାଳା ବ୍ୟବସ୍ଥା କରାଯାଉଥିଲେ ହେଁ ହାତ ଗଣତି କେତେଜଣ ଚାଷୀଙ୍କୁ ଛାଡିଦେଲେ ଅଣଚାଷୀଙ୍କୁ ନେଇ ଚାଲିଛି ମେଳା ବୋଲିି ଅଭିଯୋଗ ହେଉଛିି । ମେଳାରେ ୨୦ ଲକ୍ଷ ଟଙ୍କା ଖର୍ଚ୍ଚ ହେବା ପାଇଁ ଅଟକଳ ରହିଥିବାବେଳେ ସଚେତନତା ଅଭାବରୁ ଚାଷୀ ନ ଆସିବାରୁ ୨୦ ଲକ୍ଷ ଟଙ୍କା ପାଣିରେ ପଡିଲା ବୋଲି କୁହାଯାଇଛି ।
ଏହି ଅବସରରେ ଜିଲା କୃଷି ବିଭାଗ ପକ୍ଷରୁ ଏକ ଖବରଦାତା ସମ୍ମିଳନୀ ସୋମବାର ଜିଲାପାଳଙ୍କ ସଦ୍ଭାବନା କକ୍ଷରେ ଅନୁଷ୍ଠିତ ହୋଇଯାଇଛି । ଜିଲାସ୍ତରୀୟ କୃଷି ଯନ୍ତ୍ରପାତି ମେଳା ନେଇ ଜିଲାପାଳ ଓ ଜିଲା ମୁଖ୍ୟ କୃଷି ଅଧିକାରୀ ଏକ ଖବରଦାତା ସମ୍ମିଳନୀ କରି କହିଥିଲେ ଫେବୃୟାରୀ ୨୧ରୁ ମେଳା ଆରମ୍ଭ ହୋଇ ୨୪ରେ ଶେଷ ହେବ । ନୟାଗଡ଼ ପୁରୁଣା ସହରରର ଦକ୍ଷିଣକାଳୀ ପଡିଆରେ ଜିଲାସ୍ତରୀୟ କୃଷି ଯନ୍ତ୍ରପାତି ମେଳା ଅନୁଷ୍ଠିତ ହେବ । ତେବେ ମେଳା ନୟାଗଡ଼ ଷ୍ଟାଡିୟମରେ କରାଯାଇଥିଲା । ଗଣମାଧ୍ୟମକୁ ଅଥବା ବିନା ସଚେତନତାରେ ମେଳା କରାଯିବାର ସ୍ଥାନ ବଦଳା ଯାଇଛି । ସେହିପରି ମେଳା ସ୍ଥାନାନ୍ତର ନେଇ ଦକ୍ଷିଣକାଳୀ ପଡିଆରେ ମଧ୍ୟ କିଛି ସୂଚନା ନାହିଁ । ଏଣୁ କେତେଜଣ ଚାଷୀ ଫେରି ଆସୁଥିବା ଦେଖିବାକୁ ମିଳିଥିଲା । ଅନ୍ୟପକ୍ଷେ ମେଳାରେ ପାଠଶାଳା କରାଯାଇ ପ୍ରତ୍ୟହ ୧୦୦ ଚାଷୀଙ୍କୁ ନୂଆ ଟୋକ୍ଟୋଲୋଜି ଓ କୃଷି ଯନ୍ତ୍ରପାତିର ବ୍ୟବହାର ଓ ଆବଶ୍ୟକତା, ରକ୍ଷଣାବେକ୍ଷଣ, ନୂତନ କୃଷି ଯନ୍ତ୍ରପାତି ସମ୍ବଦ୍ଧୀୟ ଜ୍ଞାନ କୌଶଳ ସମ୍ବଦ୍ଧରେ ତାଲିମ, ଯନ୍ତ୍ରପାତିର ସରକାରୀ ମୂଲ୍ୟ ଓ ସବ୍ସଡି ଉପରେ ମଧ୍ୟ ସଚେତତନା କରାଯିବ କୁହାଯାଇଥିଲା। ସେହିପରି ଚାଷୀମାନଙ୍କୁ ଓଡ଼ିଶା ମିଲେଟ ମିଶନ, ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା, ଜଳନିଧି, ସୌର ଜଳନିଧି ଯୋଜନା ଉପରେ ଅନୁରୂପ ଭାବେ ସଚେତନତା କରାଯିବ କୁହାଯାଇଥିଲା । ହେଲେ ମେଳା ସମ୍ପର୍କରେ ଚାଷୀ ଜାଣି ନ ଥିବାରୁ ପାଠଶାଳା ବିଫଳ ହୋଇଛି ।
ଜିଲାସ୍ତରୀୟ ମେଳାରୁ କୃଷି ଯନ୍ତ୍ରପାତି ସବ୍ସିଡିରେ କିଣିବାକୁ ହେଲେ ଅନ୍ଲାଇନରେ ଆବେଦନ କରିବାକୁ ପଡିବ । ଜିଲାର ୮ଟି ବ୍ଲକର ଚାଷୀମାନେ ୧୦ କୋଟି ଟଙ୍କାର କୃଷି ଉପକରଣ କିଣିବାକୁ ଲକ୍ଷ୍ୟ ରଖାଯାଇଥିଲା। ତେବେ ମାତ୍ର ୩ କୋଟି ୬୦ ଲକ୍ଷ ଟଙ୍କାର କାରବାର ହୋଇଥିବା କୁହାଯାଉଛି । କୃଷି ଓ କୃଷକ ସଶକ୍ତୀକରଣ ବିଭାଗ ପକ୍ଷରୁ କରାଯାଉଥିବା ଏହି ମେଳାରୁ ସ୍ବୟଂ ସହାୟିକା ଗୋଷ୍ଠୀ କୃଷି ଉପକରଣ କିଣିଲେ ୭୫ ପ୍ରତିଶତ ସବସିଡି ପାଇ ପାରିବେ। ଅନ୍ୟପକ୍ଷେ ଅନୁସୂଚିତ ଜାତି, ଜନଜାତି, ମହିଳା, କ୍ଷୁଦ୍ର ଓ ନାମମାତ୍ର ଚାଷୀ ୫୦ ପ୍ରତିଶତ ରିହାତି ପାଇ ପାରିବେ । ସେହିଭଳି ସାଧାରଣ ବର୍ଗର ଚାଷୀ ୪୦ ପ୍ରତିଶତ ରହାତିରେ କୃଷି ଯନ୍ତ୍ରପାତି କିଣି ପାରିବେ । ହେଲେ ଚାଷୀ ହାତପାହନ୍ତାରେ ସୁବିଧା ପାଇ ହାତଛଡା କଲା ବୋଲି ଅଭିଯୋଗ ଉଠିଛି । ଏନେଇ ଭାଡିକିଳାର ଚାଷୀ ରବୀନ୍ଦ୍ର ପ୍ରଧାନ କୁହନ୍ତି ମେଳା ସମ୍ପର୍କରେ ଆମେ ଅବଗତ ନୁହଁ। ଏହା ତରବରିଆ ଭାବେ କରିବା ଠିକ ନୁହେଁ । କୃଷି ପ୍ରଧାନ ଜିଲାରେ କୃଷକଙ୍କୁ ଅଣଦେଖା କରି ଲାଭ କ’ଣ । ମୁଁ ଖବର ପାଇ ମେଳାକୁ ଆସି ଦେଖିଲି କେବଳ ଯନ୍ତ୍ର ଥୁଆ ହୋଇଛି, ଚାଷୀଙ୍କ ଦେଖା ନାହିଁ । ଯେଉଁମାନେ ସାଂସ୍କୃତିକ କାର୍ଯ୍ୟକ୍ରମ କରୁଛନ୍ତି ସେମାନଙ୍କ ପରିବାର ଲୋକଙ୍କ ଭିଡ଼ ଜମିଛି ବୋଲି ସେ କ୍ଷୋଭ ପ୍ରକାଶ କରିଥିଲେ । ବାଉତି ଇଞ୍ଜିନିୟରିଂର ବ୍ୟବସାୟୀ ପୀତବାସ କଳସ କୁହନ୍ତି ବେପାର ମାନ୍ଦା । ମୋର ୩ ଦିନରେ ୭୦ ହଜାର ବେପାର ହୋଇଛି । ଆଶା ଥିଲା ୫ ଲକ୍ଷରୁ ଅଧିକ ହେବ । ହେଲେ ହେଲାନି । ଜିଲା ମୁଖ୍ୟ କୃଷି ଅଧିକାରୀ ସୁବାସ ଚନ୍ଦ୍ର ମହାପାତ୍ର ୩ କୋଟି ୬୦ ଲକ୍ଷ ଟଙ୍କାର କୃଷି ଉପକରଣ ବିକ୍ରି ହୋଇଛି । କିଛିଟା ଅବ୍ୟବସ୍ଥା ସତ୍ତ୍ୱେ ସବୁ କିଛି ଠିକ୍ଠାକ୍ ଚାଲିଛି ବୋଲି ସେ ସଫେଇ ଦେଇଛନ୍ତି ।