ନୂଆଦିଲ୍ଲୀ,୧୩।୧: ଭାରତୀୟ ଟେନିସ ତାରକା ସାନିଆ ମିର୍ଜା ଆନୁଷ୍ଠାନିକ ଭାବେ ବୃତ୍ତିଗତ ଟେନିସରୁ ବିଦାୟ ନେଉଥିବା ଘୋଷଣା କରିଛନ୍ତି। ସୋସିଆଲ ମିଡିଆରେ ଏକ ଭାବପ୍ରବଣ ପୋଷ୍ଟ କରି ସେ ଏହା ଘୋଷଣା କରିଛନ୍ତି।
ସାନିଆ ଇନଷ୍ଟାଗ୍ରାମରେ ପୋଷ୍ଟ କରି କହିଛନ୍ତି, ଅଷ୍ଟ୍ରେଲୀୟ ଓପନ ପରେ ପୁଅ ସହିତ ଅଧିକ ସମୟ ବିତାଇବାକୁ ଚାହୁଁଛି। ୩୦ ବର୍ଷ ପୂର୍ବେ ହାଇଦ୍ରାବାଦର ଜଣେ ୬ ବର୍ଷର ବାଳିକା ପ୍ରଥମ ଥର ପାଇଁ ଟେନିସ୍ କୋର୍ଟକୁ ଯାଇଥିଲା। ତା ମା’ଙ୍କ ସହ ଯାଇଥିଲା। ସେଠାରେ କୋଚ୍ ଟେନିସ ଖେଳିବା ବିଷୟରେ ତାଙ୍କୁ ବୁଝାଇଥିଲେ। ଟେନିସ ଖେଳିବାକୁ ବହୁତ ଛୋଟ ବୋଲି ଭାବିଥିଲି। ହେଲେ ମୋର ସ୍ବପ୍ନର ଯୁଦ୍ଧ ୬ ବର୍ଷ ବୟସରୁ ଆରମ୍ଭ ହୋଇଥିଲା ବୋଲି ସେ କହିଛନ୍ତି।
ସାନିଆ ୩ ଥର ଡବଲ୍ସରେ ଚାମ୍ପିଅନ ହୋଇଛନ୍ତି। ଏହି ଭାରତୀୟ ଭେଟେରାନ ମହିଳା ଡବଲ୍ରେ ୨୦୧୬ରେ ଅଷ୍ଟ୍ରେଲିୟ ଓପନ ଟାଇଟଲ ଜିତିଥିଲେ। ଏହା ବ୍ୟତୀତ ସାନିଆ ମହିଳା ଡବଲ୍ସରେ ୨୦୧୫ରେ ୱିମ୍ବଲଡନ ଏବଂ ୟୁଏସ୍ ଓପନ ଟାଇଟଲ ଜିତିଥିଲେ। ଯଦିଓ ସାନିଆ ତାଙ୍କ ଟେନିସ କ୍ୟାରିୟରରେ ଗ୍ରାଣ୍ଡସ୍ଲାମ ସିଙ୍ଗଲ୍ସରେ କୌଣସି ଟାଇଟଲ ଜିତି ପାର ନାହାନ୍ତି, କିନ୍ତୁ ସିଙ୍ଗଲ୍ସ ବ୍ୟତୀତ ସେ ଡବଲ୍ସ ଏବଂ ମିକ୍ସ ଡବଲ୍ସରେ ଅଷ୍ଟ୍ରେଲିୟ ଓପନ, ଫ୍ରେଞ୍ଚ ଓପନ ଏବଂ ୟୁଏସ୍ ଓପନ ଟାଇଟଲ ଜିତିଛନ୍ତି।
୨୦୦୯ ମସିହାରେ ସାନିଆ ଅଷ୍ଟ୍ରେଲିୟ ଓପନର ମିଶ୍ରିତ ଡବଲ୍ସ ଜିତିଥିଲେ। ଏହା ପରେ ୨୦୧୨ ମସିହାରେ ସେ ଫ୍ରେଞ୍ଚ ଓପନର ମିକ୍ସ ଡବଲ ଜିତିଥିଲେ। ୨୦୧୪ ମସିହାରେ, ସେ ୟୁଏସ୍ ଓପନ ଟାଇଟଲ ଜିତିବାରେ ସଫଳ ହୋଇଥିଲେ। କିଛିଦିନ ପୂର୍ବେ ସେ ସ୍ପଷ୍ଟ କରିଥିଲେ ଯେ ଅଷ୍ଟ୍ରେଲିଆ ଓପନ ୨୦୨୩ ତାଙ୍କର ଶେଷ ଗ୍ରାଣ୍ଡ ସ୍ଲାମ ହେବ। ଏଥିସହ ଅଷ୍ଟ୍ରେଲୀୟ ଓପନ ପରେ ସେ ଦୁବାଇରେ ଆୟୋଜିତ ହେବାକୁ ଥିବା ଟେନିସ ଚାମ୍ପିଅନଶିପରେ ଅଂଶଗ୍ରହଣ କରିବେ। ଏହା ତାଙ୍କର ଶେଷ ଟେନିସ ଟୁର୍ନାମେଣ୍ଟ ହେବ। ଏହା ପରେ ସେ ଟେନିସରୁ ସନ୍ନ୍ୟାସ ନେବେ।