ଜଳବାୟୁ ପରିବର୍ତ୍ତନ ସାରା ବିଶ୍ୱ ପାଇଁ ଆହ୍ବାନ ସୃଷ୍ଟି କରିଥିବାବେଳେ ଯୁବପିଢ଼ି କିପରି ଏ ଦିଗରେ ସଚେତନ ହେବେ ସେଥିପାଇଁ ‘ଧରିତ୍ରୀ’ ଆୟୋଜନ କରୁଛି ‘ଯୁବ ସମ୍ମିଳନୀ’ ବା ‘ୟୁଥ୍ କନ୍କ୍ଲେଭ୍-୨୦୨୨’। ନଭେମ୍ବର ୨୪ ତାରିଖ ‘ଧରିତ୍ରୀ’ର ଜନ୍ମବାର୍ଷିକୀ ପାଳନ ଅବସରରେ ଆୟୋଜନ ହେବାକୁ ଥିବା ଏହି ଯୁବ ସମ୍ମିଳନୀରେ ରାଜ୍ୟ ତଥା ଦେଶର ବିଭିନ୍ନ ପ୍ରାନ୍ତରରୁ ଯୁବ ପରିବେଶବିତ୍ମାନେ ଯୋଗଦେବେ। ଏଥିସହିତ ରାଜ୍ୟର ବହୁ ଶିକ୍ଷାନୁଷ୍ଠାନରୁ ଯୁବବକ୍ତା ଅଂଶଗ୍ରହଣ କରି ସେମାନଙ୍କ ସୁଚିନ୍ତିତ ମତାମତ ଦେବେ। ଯୁବ ପରିବେଶବିତ୍ଙ୍କ ସମ୍ପର୍କରେ…
‘ଧରିତ୍ରୀ’ ପକ୍ଷରୁ ଆୟୋଜନ ହେବାକୁ ଥିବା ଯୁବ ସମ୍ମିଳନୀରେ ମହାରାଷ୍ଟ୍ରର ନେହା ଶିବାଜୀ ନାଏକଓ୍ବାଡ଼େ ଯୁବ ପରିବେଶବିତ୍ ଭାବେ ଯୋଗଦେବେ। ନେହା ପେସାରେ ଜଣେ ମେକାନିକାଲ ଇଞ୍ଜିନିୟର। କିନ୍ତୁ ପରିବେଶ ସୁରକ୍ଷା ପାଇଁ ନିଜକୁ ସମର୍ପିତ କରିଛନ୍ତି। ବିଶେଷ କରି ଶୂନ୍ୟ ବର୍ଜ୍ୟବସ୍ତୁ ପରିଚାଳନା କ୍ଷେତ୍ରରେ କାର୍ଯ୍ୟ କରୁଛନ୍ତି। ପରିବେଶ ସୁରକ୍ଷା ଦିଗରେ ଉଲ୍ଲେଖନୀୟ ଅବଦାନ ପାଇଁ ନେହାଙ୍କୁ ମିଳିତ ଜାତିସଂଘ ୟୁଥ୍ କ୍ଲାଇମେଟ୍ ଲିଡର ଭାବେ ମନୋନୀତ କରିଛି। ଯୁବ ଉଦ୍ୟୋଗୀ ନେହା ମୁମ୍ବାଇ ବିଶ୍ୱବିଦ୍ୟାଳୟରୁ ମେକାନିକାଲ ଇଞ୍ଜିନିୟରିଂ କରିଛନ୍ତି। ଶୂନ୍ୟ ବର୍ଜ୍ୟବସ୍ତୁ ପରିଚାଳନା କ୍ଷେତ୍ରରେ କାର୍ଯ୍ୟ କରୁଥିବା ‘ପରଓ୍ବାହ’ ଯୁବ ସଂସ୍ଥାର ସେ ସହ ପ୍ରତିଷ୍ଠାତା(କୋ-ଫାଉଣ୍ଡର) ଅଛନ୍ତି। ନେହା ଏକ କ୍ଲାଇମେଟ୍ ଡାଟା ପ୍ରୋଗ୍ରାମ୍ ନିର୍ମାଣ କରିଛନ୍ତି, ଯାହାକି ଏଆଇ-ଏମ୍ଏଲ୍, ବିଗ୍ ଡାଟା ଏବଂ ଆଡ୍ଭାନ୍ସଡ୍ କ୍ଲାଇମେଟ୍ ମଡେଲିଂ ଭଳି ଡାଟା ଟେକ୍ନୋଲୋଜି ସହିତ ଜଳବାୟୁ ପରିବର୍ତ୍ତନକୁ ମୁକାବିଲା କରୁଥିବା ଷ୍ଟାର୍ଟଅପ୍ଗୁଡ଼ିକୁ ସମର୍ଥନ କରିବା ଏହି ପ୍ରୋଗ୍ରାମର ଲକ୍ଷ୍ୟ ରହିଛି। ୟଙ୍ଗ୍ ଲିଡର୍ସ ଫର୍ ଆକ୍ଟିଭ ସିଟିଜେନଶିିପ୍ (ଓ୍ବାଇଏଲ୍ଏସି)ରେ ଆକ୍ସନ ଫେଲୋ ଭାବେ ନୀତି ନିର୍ଣ୍ଣୟ ଏବଂ ସିଏସ୍ଆର୍ ପଦକ୍ଷେପ ଉପରେ ସେ ବ୍ୟାପକ କାର୍ଯ୍ୟ କରିଛନ୍ତି। ସେ ବର୍ତ୍ତମାନ କ୍ଲାଇମେଟ୍ କଲେକ୍ଟିଭ୍ ଫାଉଣ୍ଡେଶନର ପ୍ରୋଜେକ୍ଟ ମ୍ୟାନେଜର ଭାବେ କାର୍ଯ୍ୟ କରୁଛନ୍ତି। ଯେଉଁଠି ସେ ଜଳବାୟୁ ଭିତ୍ତିକ ଷ୍ଟାର୍ଟଅପ୍କୁ ସୁଦୃଢ଼ କରିବା ଏବଂ ପ୍ରାରମ୍ଭିକ ପର୍ଯ୍ୟାୟରେ ଜଳବାୟୁ-ଉଦ୍ୟୋଗୀମାନଙ୍କୁ ପ୍ରୋତ୍ସାହିତ କରିବାରେ ସାହାଯ୍ୟ କରୁଛନ୍ତି। ନେହା ୟୁନାଇଟେଡ୍ ନେସନ୍ସ ଡେଭଲପମେଣ୍ଟ ପ୍ରୋଗ୍ରାମ(ୟୁଏନ୍ଡିପି) ୟୁଥ୍ କୋ-ଲ୍ୟାବ୍ର ଅନ୍ୟତମ ସଦସ୍ୟ ରହିଛନ୍ତି। ନେହା କୁହନ୍ତି, ଜଳବାୟୁ ବିପଦକୁ ବୁଝିବା ଏବଂ ପରିଚାଳନା ପାଇଁ ଅଭିନବତ୍ୱକୁ ବ୍ୟାପକ ଏବଂ ପ୍ରଯୁକ୍ତିର ବ୍ୟବହାର କରିବା ଜରୁରୀ ଅଟେ। ଏହି ନୂତନ ପ୍ରଯୁକ୍ତି ଏବଂ ସମାଧାନର ବିକାଶ ପାଇଁ ଷ୍ଟାର୍ଟଅପ୍ ଏକ ପ୍ରମୁଖ ଭୂମିକା ଗ୍ରହଣ କରିବ।