ଭୁବନେଶ୍ୱର,୨।୮(ଅନିଲ ଦାସ): ରାଜ୍ୟରେ ଅପରାଧ ନ୍ୟାୟ ବ୍ୟବସ୍ଥାକୁ ସୁଦୃଢ଼ କରିବା ସକାଶେ ରାଜ୍ୟ ଅପରାଧ ବିଧି ସେବା ସଙ୍ଗଠନ(ଫୋରେନସିକ ସାଇନ୍ସ ସର୍ଭିସେସ ଅର୍ଗାନାଇଜେଶନ)କୁ ଆଧୁନିକୀକରଣ କରିବା ପାଇଁ ରାଜ୍ୟ ସରକାର ରାଜ୍ୟ ଅପରାଧ ବିଧି ସେବା ସଙ୍ଗଠନ ଆଧୁନିକୀକରଣ ନାମରେ ଏକ ନୂଆ ସ୍କିମ୍ ଆରମ୍ଭ କରିଛନ୍ତି। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ୧୫୦.୦୫ କୋଟି ଟଙ୍କା ଅନୁମୋଦନ କରିଛନ୍ତି। ଆସନ୍ତା ୫ ବର୍ଷ (୨୦୨୩-୨୪ରୁ ୨୦୨୭-୨୮) ମଧ୍ୟରେ ଏହି ଅର୍ଥ ଖର୍ଚ୍ଚ କରାଯିବ। ସେହି ଅର୍ଥରୁ ବାଲେଶ୍ୱର ଓ ସମ୍ବଲପୁରଠାରେ ନୂତନ ଆଞ୍ଚଳିକ ଫୋରେନ୍ସିକ ଲାବୋରେଟୋରି କୋଠା ନିର୍ମାଣ ପାଇଁ ୨୦ କୋଟି ଟଙ୍କା ଖର୍ଚ୍ଚ କରାଯିବ । ଏଥିସହିତ ୧୨୫.୨୫ କୋଟି ଯନ୍ତ୍ରପାତି କ୍ରୟ ଏବଂ ୩.୫୦ କୋଟି ଟଙ୍କା ମୋବାଇଲ ଫୋରେନସିକ୍ ଭ୍ୟାନ ଓ ଅନ୍ୟାନ୍ୟ କ୍ଷେତ୍ରରେ ଖର୍ଚ୍ଚ କରାଯିବ।
୫-ଟି ବ୍ୟବସ୍ଥା ଅଧୀନରେ ଏହି ସ୍କିମ୍ରେ ମାମଲାଗୁଡ଼ିକର ତୁରନ୍ତ ଫଇସଲା, ଆଞ୍ଚଳିକ ଓ ଜିଲାସ୍ତରରେ ଅପରାଧ ବିଧି ବିଜ୍ଞାନାଗାରଗୁଡିକୁ ସୁଦୃଢ଼ କରାଯିବା, ବୈଜ୍ଞାନିକ ପ୍ରଣାଳୀରେ ତଦନ୍ତକୁ ଉନ୍ନତ କରିବା, ଆଧୁନିକ ଜ୍ଞାନକୌଶଳକୁ ବିନିଯୋଗ କରି ଆପରାଧିକ ମାମଲାଗୁଡ଼ିକର ତୁରନ୍ତ ଫଇସଲା ଆଦି ଉପରେ ଗୁରୁତ୍ୱ ଦିଆଯିବ।