ଭୁବନେଶ୍ୱର, ୧ା୨(କ୍ରୀଡ଼ା ପ୍ରତିନିଧି)-ଫିଡେ ମାଷ୍ଟର ସୌମ୍ୟରଞ୍ଜନ ମିଶ୍ର ଆଉ ଏକ ଚେସ୍ ଟାଇଟଲ ହାସଲ କରିଛନ୍ତି। ଗତ ସପ୍ତାହରେ କ୍ୟାରିୟରର ୬୧ତମ ରାଜ୍ୟ ଓପନ ଚେସ୍ ଟାଇଟଲ ଜିତିଥିବା ସୌମ୍ୟ ଏବେ ଏହି ସଂଖ୍ୟାକୁ ୬୨ରେ ପହଞ୍ଚାଇଛନ୍ତି। ଓଡ଼ିଶା ରାଜ୍ୟ ଚେସ୍ ଆସୋସିଏଶନ ଏବଂ ଜଟଣୀ ଚେସ୍ ଆସୋସିଏଶନର ମିଳିତ ଆନୁକୂଲ୍ୟରେ ଜଟଣୀରେ ଅନୁଷ୍ଠିତ ୨ୟ ସତ୍ୟସାଇ ରାଜ୍ୟ ଓପନ ଚେସ୍ରେ ଚାମ୍ପିୟନ ହୋଇଛନ୍ତି ଟପ୍ ସିଡ୍ ସୌମ୍ୟରଞ୍ଜନ। ୭ ରାଉଣ୍ଡ ବିଶିଷ୍ଟ ପ୍ରତିଯୋଗିତାରେ ସୌମ୍ୟ ୬.୫ ପଏଣ୍ଟ ପାଇ ପ୍ରଥମ ସ୍ଥାନ ଅଧିକାର କରିଛନ୍ତି। ରାଜେନ୍ଦ୍ର କୁମାର ସାହୁ ୬ ପଏଣ୍ଟ ସହ ରନର୍ସ ଅପ୍ ହୋଇଛନ୍ତି। ପ୍ରଦର୍ଶନଭିତ୍ତିରେ ହର୍ଷିତ ରଞ୍ଜନ ସାହୁ, ପ୍ରକାଶ ଚନ୍ଦ୍ର ସାହୁ (ଉଭୟେ ୫.୫ ପଏଣ୍ଟ), ଅମରେଶ୍ୱର ନନ୍ଦ, ହୃଦାନନ୍ଦ ସାମନ୍ତରାୟ, ଆରିନ୍ ଅନ୍ବେଷ ସ୍ବାଇଁ (ସମସ୍ତେ ୫ ପଏଣ୍ଟ), ରବୀନ୍ଦ୍ର କୁମାର ଓଝା, ମାନସ ରଞ୍ଜନ ପରିଡ଼ା, ପ୍ରବୋଧ କୁମାର ମିଶ୍ର, ଦେବୀ ପ୍ରସାଦ ବିଶ୍ୱାଳ ଓ ଗୁରୁ ପ୍ରସାଦ ଭଟ୍ଟ (ସମସ୍ତେ ୪) ଟପ୍-୧୨ ଫିନିଶ୍ କରିଛନ୍ତି। ସାଇ ଅଦିତ୍ରୀ, ଅମନ ଅର୍ପିତ ସ୍ବାଇଁ, ଈଶାନ୍ତ ଦାସ, ଅମ୍ଳାନ ସେନାପତି, ଆୟନ ଅଙ୍କିତ ସ୍ବାଇଁ, ଆଦିତ୍ୟ ରଞ୍ଜନ ଦାସ, ସ୍ଥିତିପ୍ରଜ୍ଞ ସାହୁ, ବୈଭବ ମଜୁମଦାର ବିଭିନ୍ନ ବୟସ ବର୍ଗରେ ଏବଂ ସାହାନା ଲେଙ୍କା ଓ ତନିସ୍କା ଅଗ୍ରଓ୍ବାଲଙ୍କୁ ସ୍ବତନ୍ତ୍ର ଭାବେ ପୁରସ୍କୃତ କରାଯାଇଛି। ଅନ୍ୟପକ୍ଷରେ ରୋନିତ ଅଗ୍ରଓ୍ବାଲ, ଅଂଶୁମାନ ସୁବୁଦ୍ଧି, ଡି. ରାହୁଲ, ଆରବ ଅଗ୍ରଓ୍ବାଲ, ସାଇଲି ଅଗ୍ରଓ୍ବାଲ ଏବଂ ବୈଭବ ଅଗ୍ରଓ୍ବାଲଙ୍କୁ ସାନ୍ତ୍ୱନାମୂଳକ ପୁରସ୍କାର ପ୍ରଦାନ କରାଯାଇଥିଲା। ଭାରତୀୟ ଜନତା ଯୁବ ମୋର୍ଚ୍ଚାର ରାଜ୍ୟ ସାଧାରଣ ସମ୍ପାଦକ ସୂରଜ ପାଇକରାୟ ମୁଖ୍ୟ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। ପ୍ରତିଯୋଗିତା ଆୟୋଜନସ୍ଥଳ ଜଟଣୀ ଏଡିଏସ୍ ପବ୍ଲିକ୍ ସ୍କୁଲର ପ୍ରିନ୍ସିପାଲ ମୁରଲୀ ମୋହନ ପଟ୍ଟନାୟକ, ଓଡ଼ିଶା ରାଜ୍ୟ ଚେସ୍ ଆସୋସିଏଶନ ନିର୍ଦ୍ଦେଶକ ଦେବାଶିଷ ପାଣିଗ୍ରାହୀ, ଜଟଣୀ ଚେସ୍ ଆସୋସିଏଶନ ସଭାପତି ସୁରେଶ ଚନ୍ଦ୍ର ବଳିୟାରସିଂ, ସମ୍ପାଦକ ଅବିନାଶ ବଳିୟାରସିଂ ପ୍ରମୁଖ ଉପସ୍ଥିତ ଥିଲେ।
