ସମ୍ବଲପୁର,୧ା୭(ଶୁଭାଶିଷ ପାଢ଼ୀ): ସମ୍ବଲପୁର ଜିଲା ଯୁଯୁମୁରା ଥାନା ଅନ୍ତର୍ଗତ ୫୫ନଂ. ଜାତୀୟ ରାଜପଥର ଗଡଗଡବାହାଲ ନିକଟ ଗାୟତ୍ରୀ କମ୍ପାନୀ ଅଫିସ ନିକଟରେ ଗୁରୁବାର ହାଇୱାଗୁଡିକୁ କାଟି ବିକ୍ରି କରାଯାଉଥିବାବେଳେ ପୋଲିସ ଚଢାଉ କରିଥିଲା। ଶୁକ୍ରବାର ଏହି ଆନ୍ତଃରାଜ୍ୟ ସ୍କ୍ରାପ ଚୋରି ର଼୍ୟାକେଟର ପର୍ଦ୍ଦାଫାଶ କରିଛି ପୋଲିସ। ଏହି ଘଟଣାରେ ୯ ଜଣଙ୍କୁ ଗିରଫ କରାଯାଇଛି। ସେମାନଙ୍କ ମଧ୍ୟରୁ ୬ଜଣ ପଶ୍ଚିମବଙ୍ଗ ବର୍ଦ୍ଧମାନ ଜିଲା ପାନଗଡର ବୋଲି ଜଣାପଡିଛି। ସେମାନେ ହେଲେ ଭାବତ ତରଣ (୩୫), ରବି ବାଗଡି (୨୫), ତିତେନ ବାଗଡି (୩୫), ମନପ୍ରିତ ସିଂ (୨୩), ଶିବ ଗୁପ୍ତା (୨୨) ଓ ସତିଶ ଯାଦବ (୨୪)। ଅନ୍ୟମାନେ ହେଲେ ଉତ୍ତରପ୍ରଦେଶ ବସ୍ତି ଜିଲାର ପପୁ ଗୁପ୍ତା (୩୫), ରାକେଶ ଯାଦବ (୨୦) ଓ ବଲାଙ୍ଗୀର ଜିଲାର ବାବୁଲାଲ ନାଗ (୫୨)। ଏ ନେଇ ଯୁଯୁମୁରା ଥାନାରେ କେସ୍ ନଂ.୭୫/୨୩ରେ ମାମଲା ରୁଜୁ ହୋଇଛି। ଘଟଣାସ୍ଥଳରୁ ୧୦ଟି ଅକ୍ସିଜେନ ସିଲିଣ୍ଡର, ଗ୍ୟାସ୍ କଟର, ୪ଟି ଆଇରନ କଟିଂ ପ୍ଲେଟ, ୧ଟି ସ୍କ୍ରାପ ଲୋଡ୍ କରିବା ପାଇଁ ବ୍ୟବହୃତ ହାଇଡ୍ରା (୧୫ଏସ-୫୨୨୫) ଓ ସ୍କାପ ମାଫିଆଙ୍କ ଦାମୀ ଥର ଗାଡି (ଓଡି୩୩ଏସି-୮୮୯୧) ଜବତ ହୋଇଛି। ସୂଚନାଯୋଗ୍ୟ ଅଭିଯୁକ୍ତମାନେ ୪ଟି ହାଇୱାକୁ ଗୁରୁବାର କାଟୁଥିବା ବେଳେ ବିଶେଷ ସୂତ୍ରରୁ ଖବର ପାଇ ଯୁଯୁମୁରା ଥାନା ଭାରପ୍ରାପ୍ତ ଅଧିକାରୀ ପ୍ରଶାନ୍ତ ଗଡନାୟକଙ୍କ ନେତୃତ୍ୱରେ ପୋଲିସ ଟିମ୍ ଚଢାଉ କରିଥିଲା। ଘଟଣାସ୍ଥଳରୁ ସ୍କ୍ରାପ ବ୍ୟବସାୟୀମାନେ ଫେରାର ହୋଇଯାଇଥିବା ବେଳେ ପୋଲିସ ୪ଜଣ କର୍ମଚାରୀଙ୍କୁ ଅଟକ ରଖି ପଚରାଉଚୁରା କରୁଥିଲା। ଏହି ଗାଡିଗୁଡିକ ଜାତୀୟ ରାଜପଥ ନିର୍ମାଣ ସଂସ୍ଥାର ବୋଲି ଜଣାପଡିଛି।