ଦିଗପହଣ୍ଡି,୧୮ା୧୨(ଅଶେଷ ନାଥ ମିଶ୍ର):ଦିଗପହଣ୍ଡି ଗସ୍ତରେ ରାଜ୍ୟ ପର୍ଯ୍ୟଟନ ସଚିବ ତଥା କମିଶନର ବାଲୱନ୍ତ ସିଂ ଆସିଛନ୍ତି। ମଙ୍ଗଳବାର ବାସୁଦେବପୁର ପଞ୍ଚାୟତ କାର୍ଯ୍ୟାଳୟ, ଶ୍ରୀଜଗନ୍ନାଥ ୫-ଟି ହାଇସ୍କୁଲ, ମିଶନ ଶକ୍ତି ଗୃହ ଏବଂ ଅଙ୍ଗନୱାଡ଼ି ଗୃହ ପରିଦର୍ଶନ କରିଥିଲେ। ଅଙ୍ଗନୱାଡ଼ି ଶିଶୁମାନଙ୍କ ସହ ସେମାନଙ୍କ ଖାଦ୍ୟ ପେୟ, ଶୈଶବ ଶିକ୍ଷା ଦାନ ସମ୍ପର୍କରେ ପଚାରି ସେମାନଙ୍କ ବୁଦ୍ଧିମତା ପରଖି ଥିଲେ। ଗଞ୍ଜାମ-ଗଜପତି ଜିଲା ନୋଡାଲ ସଚିବ ଦାୟିତ୍ୱରେ ଥିବା ସିଂ ବାସୁଦେବପୁର ଗ୍ରାମର ମିଶନ ଶକ୍ତି ଗୃହକୁ ବୁଲି ଉପସ୍ଥିତ ମହିଳାମାନଙ୍କୁ ସେମାନଙ୍କ ସୁବିଧା ଅସୁବିଧା ସମ୍ପର୍କରେ ବୁଝିଥିଲେ। ପରେ ସେ ପଞ୍ଚାୟତ କାର୍ଯ୍ୟାଳୟ ସହ ଗ୍ରାମରେ ଥିବା ଶ୍ରୀ ଜଗନ୍ନାଥ ୫-ଟି ହାଇସ୍କୁଲରେ ପହଞ୍ଚି ପ୍ରଧାନ ଶିକ୍ଷୟିତ୍ରୀ ସନ୍ତୋଷୀନୀ ତ୍ରିପାଠୀଙ୍କ ସହ ଆଲୋଚନା କରି ବିଦ୍ୟାଳୟର ସମସ୍ୟା ସମାଧାନ ପାଇଁ ଜିଲାପାଳ ଦିବ୍ୟଜ୍ୟୋତି ପରିଡ଼ାଙ୍କୁ ନିର୍ଦ୍ଦେଶ ଦେଇଥିଲେ। ସଚିବଙ୍କ ଗସ୍ତ ସମୟରେ ବ୍ରହ୍ମପୁର ଉପ ଜିଲାପାଳ ଦୀନା ଦସ୍ତାଗିର, ପ୍ରୋବେସନାରୀ ଆଇଏଏସ ପ୍ରଣିତା ଦାସ, ଦିଗପହଣ୍ଡି ବିଡ଼ିଓ ଡ଼.ଚିତ୍ତରଞ୍ଜନ ଦାସ, ସିଡ଼ିପିଓ ପୁଷ୍ପାଞ୍ଜଳି ଶତପଥି, ଅଙ୍ଗନୱାଡ଼ି ସୁପର ଭାଇଜର ସଞ୍ଜୁଲତା ପାଣିଗ୍ରାହୀ, ବିପିସି ଦୁର୍ଯ୍ୟୋଧନ ମଲ୍ଲିକ, ବିପିଏମ୍ ସଙ୍ଗୀତା ପଣ୍ଡା, ବ୍ଳକ ସହକାରୀ ଯନ୍ତ୍ରୀ ଇଂ.ରାଜୀବ ପ୍ରଧାନ, କନିଷ୍ଠ ଯନ୍ତ୍ରୀ ଇଂ.ତପସ୍ବିନୀ ପାଢ଼ୀ, ସରପଞ୍ଚ ଏମ.ଶ୍ୟାମଘନ, ସେବା ସମବାୟ ସମିତି ସଭାପତି ଡ.ସନାତନ ଦୋରା, ସାମାଜିକ କର୍ମୀ ଏମ.ନରସିଂହ, ଏମ.ସନ୍ତୋଷ, ଜି.ଦାସ ରେଡ୍ଡୀ, କେ.ଭୀମଙ୍କ ସମେତ ବହୁ ସଂଖ୍ୟକ ଗ୍ରାମବାସୀ ଉପସ୍ଥିତ ଥିଲେ। ପରେ ସଚିବ ପର୍ଯ୍ୟଟନ କ୍ଷେତ୍ର ତପ୍ତପାଣି ପାନ୍ଥ ନିବାସରେ ପହଞ୍ଚି ଦିଗପହଣ୍ଡି ପୂର୍ତ୍ତବିଭାଗ ସହକାରୀ ନିର୍ବାହୀ ଯନ୍ତ୍ରୀ ଇଂ.କାର୍ତ୍ତିକେଶ୍ୱର ପ୍ରଧାନଙ୍କ ସହ ପର୍ଯ୍ୟଟନ କ୍ଷେତ୍ରର ବହୁବିଧ ବିକାଶ ଦିଗରେ ବିସ୍ତୃତ ଆଲୋଚନା କରିବା ସହ ବିଭାଗ ପକ୍ଷରୁ ପ୍ରସ୍ତୁତ ଡିଟେଲ ପ୍ରୋଜେକ୍ଟ ରିପୋର୍ଟର ଅନୁଧ୍ୟାନ କରିଥିଲେ। ସାନଖେମୁଣ୍ଡି ବିଡ଼ିଓ ଜିତେନ୍ଦ୍ର କୁମାର ମିଶ୍ର, ତହସିଲଦାର ରାମଚନ୍ଦ୍ର ପଟ୍ଟନାୟକ, ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ଇଂ.ବନୋଜ ସେଠୀଙ୍କ ସମେତ ବହୁ ସରକାରୀ ଅଧିକାରୀ ବୃନ୍ଦ ଉପସ୍ଥିତ ଥିଲେ।
