ବୌଦ୍ଧ,୯ା୧୨ ( ଅଜିତ କୁମାର ବାରିକ): ରାଜ୍ୟ ଭଲିବଲ ଆସୋସିଏଶନ ଆନୁକୂଲ୍ୟରେ ଓ ଜିଲା କ୍ରୀଡା ସଂଘ ସହଯୋଗରେ ୭୦ତମ ରାଜ୍ୟ ମହିଳା ଭଲିବଲ ପ୍ରତିଯୋଗିତା ଶୁକ୍ରବାର ଉଦ୍ଘାଟିତ ହୋଇଯାଇଛି। ଜଙ୍ଗଲ,ପରିବେଶ ଓ ଜଳବାୟୁ ପରିବର୍ତ୍ତନ ଏବଂ ସୂଚନା ଓ ଲୋକସମ୍ପର୍କ ବିଭାଗ ମନ୍ତ୍ରୀ ପ୍ରଦୀପ କୁମାର ଅମାତ ମୁଖ୍ୟଅତିଥି ଭାବେ ଯୋଗଦେଇ ପ୍ରତିଯୋଗିତାକୁ ଉଦ୍ଘାଟନ କରିଥିଲେ। ବୌଦ୍ଧଜିଲାରେ ଦ୍ୱିତିୟଥର ପାଇଁ ଏହି ରାଜ୍ୟସ୍ତରୀୟ ପ୍ରତିଯୋଗିତା ଆୟୋଜନର ସୁଯୋଗ ଦେଇଥିବାରୁ ରାଜ୍ୟ ଭଲିବଲ ସଂଘକୁ ମନ୍ତ୍ରୀ ଅମାତ କୃତଜ୍ଞତା ପ୍ରକାଶ କରିବା ସହିତ ଏହାଦ୍ୱାରା ସ୍ଥାନୀୟ ଖେଳାଳିମାନେ ଉତ୍ସାହିତ ହେବା ସହିତ ଜିଲାରେ ଭଲିବଲ ଖେଳର ବିକାଶ ହୋଇପାରିବ ବୋଲି କହିଥିଲେ। ରାଜ୍ୟ ଭଲିବଲ ସଂଘର ସାଧାରଣ ସଂପାଦକ ଗଗନେନ୍ଦୁ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଦ୍ଘାଟନୀ ଉତ୍ସବରେ ଅନ୍ୟତମ ଅତିଥି ଭାବରେ ଭାରପ୍ରାପ୍ତ ଜିଲାପାଳ ଦାରିଦ୍ର୍ୟ ଭଞ୍ଜନ ମଦନ ମୋହନ ପାତ୍ର, ଜିଲା ଆରକ୍ଷୀ ଅଧୀକ୍ଷକ ରାଜପ୍ରସାଦ,ଏନଏସି ଅଧ୍ୟକ୍ଷ ମୁତ୍ୟୁଞ୍ଜୟ ମିଶ୍ର, ରାଜ୍ୟ ବୟନିକା ସଭାପତି ପ୍ରକାଶ ଚନ୍ଦ୍ର ମେହେର, ଜିଲା କ୍ରୀଡା ସଂଘର ଉପସଭାପତି ଧୂରୀଣ କୁମାର ଦେହୁରୀ ଏବଂ ଜିଲା କ୍ରୀଡା ସଂଘର ସାଧାରଣ ସମ୍ପାଦକ ରବୀନ୍ଦ୍ର କୁମାର ରାଉତ ପ୍ରମୁଖ ଉପସ୍ଥିତ ଥିଲେ। ଏହି ଆନ୍ତଃ କ୍ଲବ ରାଜ୍ୟସ୍ତରୀୟ ମହିଳା ଭଲିବଲ ପ୍ରତିଯୋଗିତାରେ କିଟ୍ ,ରେଲଓ୍ବେ, ପାରାଦୀପ ପୋର୍ଟ ସମେତ କେନ୍ଦ୍ରାପଡା, କନ୍ଧମାଳ, ବଲାଙ୍ଗୀର, ସୁନ୍ଦରଗଡ, ଢେଙ୍କାନାଳ, ଭୁବନେଶ୍ୱର ଓ ଜଗତ୍ସିଂହପୁରରୁ ୧୦ ଦଳ ଅଂଶଗ୍ରହଣ କରିଛନ୍ତି। ଓଡ଼ିଶା ଭଲିବଲ ସଂଘ ପକ୍ଷରୁ ରେଫରି ଭାବରେ ଶୁଭସ୍ମିତା ପରିଡା, ଭି.ସ୍ବାତିଲତା ରେଡୀ ସୁଜାତା ବିଶ୍ୱାଳ, ସଞ୍ଜୀବ କୁମାର ପଣ୍ଡା, ରଞ୍ଜନ କୁମାର ସାହୁ ଓ ଦିଲୀପ ପଟେଲ ପ୍ରମୁଖ ଖେଳ ପରିଚାଳନା କରିଥିଲେ। ଭଲିବଲ ଫେଡେରେଶନ ଅଫ୍ ଇଣ୍ଡିଆର ସଭାପତି ତଥା କନ୍ଧମାଳ ସାଂସଦ ଅଚ୍ୟୁତାନନ୍ଦ ସାମନ୍ତଙ୍କ ଉଦ୍ୟମକ୍ରମେ ବୌଦ୍ଧ ଓ କନ୍ଧମାଳ ଜିଲାରେ ଏହି ରାଜ୍ୟ କ୍ରୀଡା ପ୍ରତିଯୋଗିତା ଅନୁଷ୍ଠିତ ହେଉଥିବା ବେଳେ କିଟ୍ ପକ୍ଷରୁ ସମସ୍ତ ଖେଳାଳିମାନଙ୍କୁ ଜର୍ସି ପ୍ରଦାନ କରାଯାଇଥିଲା।
