ବଲାଙ୍ଗୀର ଅଫିସ/ କଣ୍ଟାବାଞ୍ଜିି, ୧୪ା୩(ଡି.ଏନ୍.ଏ.):ବଲାଙ୍ଗୀର ଜିଲା କଣ୍ଟାବାଞ୍ଜି ମୁସ୍କାନ ଇଣ୍ଟରନ୍ୟାଶନାଲ ସ୍କୁଲରେ ଓଡିଶାର ପ୍ରଥମ ଗ୍ରାମୀଣ ସ୍ପେସ୍ ଏଡୁକେଶନ୍ ଲ୍ୟାବ ଖୋଲାଯିବ। ଏନେଇ ସୋମବାର ବ୍ୟୋମିକା ସ୍ପେସ୍ ଏକାଡେମୀ ଏବଂ ମୁସ୍କାନ୍ ଇଣ୍ଟରନ୍ୟାଶନାଲ ସ୍କୁଲ ମଧ୍ୟରେ ଚୁକ୍ତିନାମା ସ୍ବାକ୍ଷରିତ ହୋଇଛି। ସ୍କୁଲ ପରିସରରେ ଅନୁଷ୍ଠିତ ସାଇନିଂ ସେରିମନିରେ ବ୍ୟୋମିକା ସ୍ପେସ୍ ଏକାଡେମୀର ଡାଇରେକ୍ଟର ନୀତୀନ କୁମାର ଏବଂ ମୁସ୍କାନ ଇଣ୍ଟରନ୍ୟାଶନାଲ ସ୍କୁଲର ଡାଇରେକ୍ଟର ଡ. ବ୍ରଜେଶ ମିତ୍ତଲଙ୍କ ମଧ୍ୟରେ ଏହି ଚୁକ୍ତିନାମା ସ୍ବାକ୍ଷରିତ ହୋଇଛି। ଚୁକ୍ତିନାମା ସ୍ବାକ୍ଷରିତ ହେବା ସମୟରେ କଣ୍ଟାବାଞ୍ଜି ଏନ୍ଏସି ଅଧ୍ୟକ୍ଷ ବରିୟାମ୍ ସି ସାଲୁଜା ଉପସ୍ଥିତ ଥିଲେ।
ପରେ ସ୍କୁଲ ସଭାଗୃହରେ ଏକ ଖବରଦାତା ସମ୍ମିଳନୀ କରି ଏ ସମ୍ପର୍କରେ ଗଣମାଧ୍ୟମ ପ୍ରତିନିଧିଙ୍କୁ ସୂଚନା ଦିଆଯାଇଥିଲା। ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ପକ୍ଷରୁ ସ୍ପେସ୍ ଟ୍ୟୁଟର ପ୍ରୋଗ୍ରାମ ଆରମ୍ଭ କରାଯାଇଛି। ବିଜ୍ଞାନ, ମହାକାଶ ବିଜ୍ଞାନ, ଅନ୍ତରୀକ୍ଷ ପ୍ରତି ସ୍କୁଲ ଛାତ୍ରୀଛାତ୍ରଙ୍କ ରୁଚି ଓ ଆଗ୍ରହ ବୃଦ୍ଧି ଲକ୍ଷ୍ୟ ରଖି ଇସ୍ରୋ ସ୍ପେସ୍ ଟ୍ୟୁଟର କାର୍ଯ୍ୟକ୍ରମ ଆରମ୍ଭ କରିଛି। ଏହି କାର୍ଯ୍ୟକ୍ରମକୁ ଇସ୍ରୋର ଅଫିସିଆଲ ପାର୍ଟନର ବ୍ୟୋମିକା ସ୍ପେସ୍ ଏକାଡେମୀ ପକ୍ଷରୁ ପରିଚାଳନା କରାଯାଉଛି। ଏକାଡେମୀ ପକ୍ଷରୁ ଦେଶର ୧୦ଟି ଜିଲାରେ ସ୍ପେସ୍ ଏଡୁକେଶନ୍ ଲ୍ୟାବ ପ୍ରତିଷ୍ଠା କରାଯିବ। ଏହି ଲ୍ୟାବ୍ରେ ଦେଶର ଇସ୍ରୋ ଦ୍ୱାରା ନିର୍ମାଣ ହେଉଥିବା ରକେଟ, ଟେଲିସ୍କୋପ, ସ୍ପେସ୍ ସାଇନ୍ସ କିଟ୍ସ, ଏୟାରକ୍ରାପ୍ଟ ଓ ଡ୍ରୋନ୍ ନିର୍ମାଣ ଭଳି ଯନ୍ତ୍ରାଂଶ ବିଷୟରେ ଶିକ୍ଷାଦାନ ଦିଆଯିବ। ପ୍ରତିଷ୍ଠା ହେବାକୁ ଥିବା ଲ୍ୟାବ୍ରେ ଅନ୍ତରୀକ୍ଷ, ମହାକାଶ ତଥା ମହାକାଶ ବିଜ୍ଞାନ ବିଷୟରେ ଅନେକ ତଥ୍ୟ ଉପଲବ୍ଧ ହେବ। ଏଥିରେ ଅନ୍ଲାଇନ୍ ଜରିଆରେ ଇସ୍ରୋର ମହାକାଶ ବୈଜ୍ଞାନିକ ଓ ପ୍ରବକ୍ତାମାନେ ଛାତ୍ରୀଛାତ୍ରଙ୍କୁ ମହାକାଶ କାର୍ଯ୍ୟକ୍ରମ ବିଷୟରେ ଶିକ୍ଷାଦାନ ଓ ତାଲିମ ପ୍ରଦାନ କରିବେ। ପ୍ରତ୍ୟେକ ତିନିମାସରେ ଇସ୍ରୋରୁ ଇଞ୍ଜିନିୟରମାନେ କଣ୍ଟାବାଞ୍ଜି ମୁସ୍କାନ୍ ଇଣ୍ଟରନାଶନାଲ ସ୍କୁଲରେ ପ୍ରତିଷ୍ଠା ହେବାକୁ ଥିବା ଲ୍ୟାବ୍କୁ ଆସି ଏଠାରେ କର୍ମଶାଳା କରିବେ ବୋଲି ସୂଚନା ଦେଇଛନ୍ତି। ଏହାସହିତ ଏହି କାର୍ଯ୍ୟକ୍ରମ ଜରିଆରେ ଏହି ଅଞ୍ଚଳର ଛାତ୍ରୀଛାତ୍ରମାନେ ଇସ୍ରୋ ଏବଂ ନାଶାକୁ ଷ୍ଟଡି ଟୁରରେ ମଧ୍ୟ ଯାଇପାରିବେ ବୋଲି ସୂଚନା ଦିଆଯାଇଛି।