ନୂଆଦିଲ୍ଲୀ,୨୨।୨: ରାଜ୍ୟଗୁଡ଼ିକର ସାମଗ୍ରୀ ଓ ସେବା ଟିକସ(ଜିଏସ୍ଟି) ଜନିତ ରାଜସ୍ବ କ୍ଷତି ଚଳିତ ଆର୍ଥତ୍କ ବର୍ଷରେ ୪୦ ହଜାର କୋଟି କମିପାରେ। ଗତ ୪ ମାସରେ ଜିଏସ୍ଟି ସଂଗ୍ରହ ଉନ୍ନତ ହେଉଥିବାରୁ କ୍ଷତି ପରିମାଣ ହ୍ରାସ ପାଇବ ବୋଲି ଜଣେ ସରକାରୀ ଅଧିକାରୀ ରବିବାର ସୂଚନା ଦେଇଛନ୍ତି। ରାଜ୍ୟଗୁଡିକ ୧.୮୦ ଲକ୍ଷ କୋଟି ଟଙ୍କା ଜିଏସ୍ଟି ରାଜସ୍ବ କ୍ଷତି ସହିବେ ବୋଲି ପୂର୍ବରୁ ଆକଳନ କରାଯାଇଥିଲା। ଜିଏସ୍ଟି କାର୍ଯ୍ୟକାରୀ କରାଯିବା ଯୋଗୁ ୧.୧୦ ଲକ୍ଷ କୋଟି ଏବଂ କୋଭିଡ୍-୧୯ ମହାମାରୀ ଯୋଗୁ ପ୍ରାୟ ୭୦ ହଜାର କୋଟି କ୍ଷତି ରାଜ୍ୟ ସହିବେ ବୋଲି ରିପୋର୍ଟରେ କୁହାଯାଇଥିଲା। ରାଜସ୍ବ କ୍ଷତିକୁ ଭରଣା କରିବା ଲାଗି କେନ୍ଦ୍ର ସରକାର ଏକ ସ୍ବତନ୍ତ୍ର ଓ୍ବିଣ୍ଡୋରୁ ଋଣ କରୁଛନ୍ତି। ଏହି ବାବଦକୁ ମୋଟ ୧.୧୦ ଲକ୍ଷ କୋଟି ଟଙ୍କା ଯୋଗାଇ ଦେବା ଲାଗି ବ୍ୟବସ୍ଥା କରାଯାଇଛି।
ରାଜସ୍ବ ସଂଗ୍ରହରେ ଉନ୍ନତି ହୋଇଥିବାରୁ ରାଜ୍ୟଗୁଡ଼ିକର ମୋଟ କ୍ଷତି ୧.୪୦ ଲକ୍ଷ କୋଟି ଟଙ୍କାକୁ ଖସିପାରେ। ବର୍ତ୍ତମାନ ଏ ନେଇ ହିସାବ କରାଯାଉଛି। କ୍ଷତି ୩୦ରୁ ୪୦ ହଜାର କୋଟି ଟଙ୍କା କମ୍ ରହିପାରେ ବୋଲି ଅଧିକାରୀ ଜଣକ ସୂଚନା ଦେଇଛନ୍ତି। ସେହିଭଳି ଜିଏସ୍ଟି ଆଦାୟ ଉନ୍ନତ ହେଉଥିବାରୁ କୋଭିଡ୍ଜନିତ ରାଜସ୍ବ ହ୍ରାସ ଭରଣା କରିବା ଲାଗି ରାଜ୍ୟଗୁଡିକୁ କ୍ଷତିପୂରଣ ପ୍ରଦାନ କରିବା ପାଇଁ ଏହି ଅର୍ଥକୁ ବ୍ୟବହାର କରାଯାଇପାରେ। ସ୍ପେଶାଲ ଓ୍ବିଣ୍ଡୋରୁ ବର୍ତ୍ତମାନ ସୁଦ୍ଧା ୧ ଲକ୍ଷ କୋଟି ଋଣ କରାଯାଇଥିବା ବେଳେ ଏହି ଅର୍ଥକୁ ରାଜ୍ୟଗୁଡ଼ିକୁ ପ୍ରଦାନ କରାଯାଇଛି। ଆସନ୍ତା ଆର୍ଥତ୍କ ବର୍ଷରେ ରାଜସ୍ବ କ୍ଷତି ଆହୁରି କମିବ। ହେଲେ ୧୪% ରାଜସ୍ବ କ୍ଷତି ଭରଣା କରିବା କଷ୍ଟକର ବୋଲି ଅଧିକାରୀ ଜଣକ ମତ ଦେଇଛନ୍ତି।
ଜିଏସ୍ଟି କ୍ଷତିପୂରଣ ଅର୍ଥ ପ୍ରତି ୨ ମାସରେ ରାଜ୍ୟଗୁଡିକୁ ପ୍ରଦାନ କରାଯାଉଛି। କୋଭିଡ୍ ଯୋଗୁ ଏପ୍ରିଲ ୨୦୨୦ରେ ଜିଏସ୍ଟି ସଂଗ୍ରହ ରେକର୍ଡ ନିମ୍ନ ସ୍ତର ୩୧,୧୭୨ କୋଟି ଟଙ୍କାକୁ ଖସି ଆସିଥିଲା। କରୋନା ମହାମାରୀକୁ ନିୟନ୍ତ୍ରଣ କରିବା ଲାଗି ସରକାର ସାରା ଦେଶକୁ ଲକ୍ଡାଉନ୍ କରିବା ପରେ ଏପରି ହୋଇଥିଲା। ଟିକସ ସଂଗ୍ରହ ଧୀରେ ଧୀରେ ଉନ୍ନତ ହେଉଛି। ୨୦୨୦ ଅକ୍ଟୋବରଠାରୁ ୨୦୨୧ ଜାନୁୟାରୀ ଯାଏ ୪ ମାସ ଜିଏସ୍ଟି ସଂଗ୍ରହ ୧ ଲକ୍ଷ କୋଟି ଟଙ୍କା ଟପୁଛି। ଜାନୁୟାରୀ ମାସରେ ରାଜସ୍ବ ୧.୨୦ ଲକ୍ଷ କୋଟି ଟଙ୍କା ରହିଛି।