ଭୁବନେଶ୍ୱର,୨୬।୩(ବ୍ୟୁରୋ): ପର୍ଯ୍ୟଟନ କ୍ଷେତ୍ରର ବିକାଶ ପାଇଁ କେନ୍ଦ୍ର ସରକାର ଅଧିକ ଗୁରୁତ୍ୱ ଦେଉଛନ୍ତି। ଏହି କ୍ଷେତ୍ର ସହ ଯୋଗାଯୋଗ ବ୍ୟବସ୍ଥାକୁ ଆହୁରି ସୁଦୃଢ଼ କରାଯାଉଛି। ସବକା ସାଥ୍ ସବ୍କା ବିକାଶ ନାରାରେ ବିଶ୍ବାସ କରୁଥିବା ଭାରତ ସରକାର ସଂସ୍କୃତି ସହ ପର୍ଯ୍ୟଟନର ବିକାଶ ପାଇଁ ଲକ୍ଷ୍ୟ ଦେଇଛନ୍ତି। କୋଭିଡ୍ ସ୍ଥିତି ସୁଧୁରିବା ପରେ ପର୍ଯ୍ୟଟନ କ୍ଷେତ୍ର ଅଣ୍ଟା ସଳଖୁଛି। ଏଥିପାଇଁ ସମସ୍ତ ରାଜ୍ୟ ଓ ଦେଶବାସୀଙ୍କ ସହଯୋଗ ଜରୁରୀ ବୋଲି ବୋଲି କେନ୍ଦ୍ର ସଂସ୍କୃତି, ପର୍ଯ୍ୟଟନ ବିକାଶ ମନ୍ତ୍ରୀ ଜି. କିଶନ ରେଡ୍ଡୀ କହିଛନ୍ତି। ଅର୍ଗସ ନ୍ୟୁଜ୍ ପକ୍ଷରୁ ଶୁକ୍ରବାର ଭୁବନେଶ୍ୱରଠାରେ ଆରମ୍ଭ ହୋଇଥିବା ‘ଚଲୋ ଦେଖେଁ ଅପ୍ନା ଦେଶ’ ପ୍ରସଙ୍ଗକୁ ନେଇ ଦୁଇଦିନିଆ ପର୍ଯ୍ୟଟନ କନ୍କ୍ଲେଭ୍କୁ ଉଦ୍ଘାଟନ କରି କେନ୍ଦ୍ରମନ୍ତ୍ରୀ ରେଡ୍ଡୀ ଏହା କହିଛନ୍ତି। ସେ କହିଛନ୍ତି, ଗ୍ରାମାଞ୍ଚଳ ପର୍ଯ୍ୟଟନ ଉପରେ ଫୋକସ୍ ଦିଆଯାଉଛି। ଜମ୍ମୁ-କାଶ୍ମୀରକୁ ସେପ୍ଟେମ୍ବରରୁ ମାର୍ଚ୍ଚରେ ୭୨ ଲକ୍ଷ ପର୍ଯ୍ୟଟକ ଆସିଛନ୍ତି। ଯୋଗ ଦିବସ ସହ ପର୍ଯ୍ୟଟନ କ୍ଷେତ୍ରକୁ ଯୋଡ଼ି ୭୫ଟି ସ୍ଥାନରେ ଯୋଗ କାର୍ଯ୍ୟକ୍ରମ କରିବାକୁ ଲକ୍ଷ୍ୟ ରହିଛି। ଟୁରିଜମ୍ ଟ୍ରେନ୍ ଅଧିକ ଚାଲିବା ନେଇ ପଦକ୍ଷେପ ନିଆଯାଉଛି। ଏ କ୍ଷେତ୍ରରେ ରାଜ୍ୟ ସରକାରଙ୍କ ସହଯୋଗ କାମନା କରି ସେ ଓଡ଼ିଶାର ମହାନ୍ ସଂସ୍କୃତି ଓ ଐତିହ୍ୟ ସହିତ ଶ୍ରୀଜଗନ୍ନାଥ ମନ୍ଦିର, ଶ୍ରୀଲିଙ୍ଗରାଜ ମନ୍ଦିର ଓ ସୂର୍ଯ୍ୟ ମନ୍ଦିରର ଗାଥା କହିଲେ। ଏଥିସହ ଓଡ଼ିଶୀ ନୃତ୍ୟର ସମ୍ପର୍କରେ ଆଲୋକପାତ କରିଥିଲେ। ଡିଏନ୍ ସ୍କୋୟାରସ୍ଥିତ ହୋଟେଲ ଭିଭାନ୍ତାରେ ଚାଲିଥିବା ଏହି କନ୍କ୍ଲେଭ୍ରେ ଜମ୍ମୁ ଓ କଶ୍ମୀର ପର୍ଯ୍ୟଟନ ବିଭାଗ ସମେତ ବହୁ ଭାରତୀୟ ପର୍ଯ୍ୟଟନ ଓ ଭ୍ରମଣ ଉଦ୍ୟୋଗୀମାନେ ଅଂଶଗ୍ରହଣ କରିଛନ୍ତି।