ଅଯୋଧ୍ୟା,୨୮।୧ : ନେପାଳରୁ ଅଯୋଧ୍ୟାକୁ ଦୁଇଟି ବିରାଟ ଶାଳଗ୍ରାମ ଶିଳା ଅଣାଯାଉଛି। ଏଥିରୁ ଶ୍ରୀ ରାମ ଏବଂ ମାତା ସୀତାଙ୍କ ପ୍ରତିମା ତିଆରି ହେବ। ଏହି ପଥରଗୁଡିକ ପ୍ରାୟ ୬ କୋଟି ବର୍ଷ ପୁରୁଣା ବୋଲି କୁହାଯାଇଛି। ତେବେ ଏଗୁଡ଼ିକରେ ନିର୍ମିତ ମୂର୍ତ୍ତିଗୁଡ଼ିକୁ ପବିତ୍ରସ୍ଥାନରେ ରଖାଯିବ କିମ୍ବା ପରିସରର ଅନ୍ୟ ସ୍ଥାନରେ ସ୍ଥାପନ କରାଯିବ କି ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ। କେବଳ ରାମ ମନ୍ଦିର ଟ୍ରଷ୍ଟ ଏହା ଉପରେ ଚୂଡ଼ାନ୍ତ ନିଷ୍ପତ୍ତି ନେବେ।
ନେପାଳର ପୋଖରାରେ ଅବସ୍ଥିତ ଗଣ୍ଡୂକି ନଦୀରୁ ଏହି ଦୁଇଟି ପଥର ଭୂତତ୍ତ୍ୱ ଏବଂ ପ୍ରତ୍ନତତ୍ତ୍ୱ ବିଶେଷଜ୍ଞଙ୍କ ତତ୍ତ୍ୱାବଧାନରେ ବାହାର କରାଯାଇଛି। ୨୬ ଜାନୁଆରୀରେ ଏହାକୁ ଟ୍ରକରେ ଲୋଡ ହୋଇଥିଲା। ପୂଜା କରିବା ପରେ ଉଭୟ ପଥର ଟ୍ରକ ଯୋଗେ ଅଯୋଧ୍ୟାକୁ ପଠାଯାଉଛି। ବାଟରେ, ଲୋକମାନେ ମଧ୍ୟ ଏହି ପଥରଗୁଡିକୁ ଦେଖିବା ଏବଂ ସ୍ବାଗତ କରିବା ପାଇଁ ଏକତ୍ରିତ ହେଊଛନ୍ତି। ସେଥିରୁ ଗୋଟିଏ ପଥରର ଓଜନ ୨୬ ଟନ ଥିବାବେଳେ ଅନ୍ୟଟିର ଓଜନ ୧୪ ଟନ ରହିଛି।
ରାମ ମନ୍ଦିର ଟ୍ରଷ୍ଟର ଟ୍ରଷ୍ଟି କାମେଶ୍ୱର ଚୌପଲ କହିଛନ୍ତି, ଆମକୁ କେବଳ ଅଯୋଧ୍ୟାକୁ ପଥର ଆଣିବାକୁ କୁହାଯାଇଛି। ଏହି ପଥରଗୁଡିକ ଅଯୋଧ୍ୟାରେ ପହଞ୍ଚିବା ପରେ ଟ୍ରଷ୍ଟ କାର୍ଯ୍ୟ କରିବ। ଏହି ପଥରଗୁଡିକ ଫେବୃଆରୀ ୨ ରେ ଅଯୋଧ୍ୟାରେ ପହଞ୍ଚିପାରେ।
ଏହି ପଥରଗୁଡିକ ଶନିବାର ଜାନକପୁରରେ ପହଞ୍ଚିଛି। ପଥରଗୁଡିକ ବିହାରର ମଧୁବାଣୀର ବେନିପାଟ୍ଟୀ ଦେଇ ସାହାରାଟ ଦେଇ ଦରଭଙ୍ଗା ମୁଜାଫରପୁରରେ ପହଞ୍ଚିବ। ତା’ପରେ ଜାନୁଆରୀ ୩୧ ରେ, ଏହା ଗୋପାଳଗଞ୍ଜ ଦେଇ ଉତ୍ତରପ୍ରଦେଶରେ ପ୍ରବେଶ କରିବ ।