ନୂଆଦିଲ୍ଲୀ,୨୩ା୯: ଜାତିଆଣ ହିଂସା ପ୍ରଭାବିତ ମଣିପୁରରେ ସମସ୍ତ ଉତ୍ସରୁ ଅସ୍ତ୍ରଶସ୍ତ୍ରକୁ ଉଦ୍ଧାର କରାଯାଇଥିବା ନେଇ ରାଜ୍ୟ ସରକାର ସୁପ୍ରିମକୋର୍ଟରେ ଷ୍ଟାଟସ୍ ରିପୋର୍ଟ ଦାଖଲ କରିଛନ୍ତି। କେନ୍ଦ୍ର ଏବଂ ମଣିପୁର ସରକାରଙ୍କ ତରଫରୁ ସଲିସିଟର ଜେନେରାଲ ତୁଷାର ମେହେଟ୍ଟା ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ଖଣ୍ଡପୀଠଙ୍କୁ ଏହା କହିଛନ୍ତି। ମହିଳା ଓ ଶିଶୁମାନଙ୍କ ପ୍ରତି ହୋଇଥିବା ଯୌନ ହିଂସା ସମ୍ପର୍କିତ ୧୧ଟି ଏତଲା ସିିବିଆଇକୁ ହସ୍ତାନ୍ତର ହୋଇଥିଲାବେଳେ ତଦନ୍ତର ସବିଶେଷ ତଥ୍ୟ ତଦନ୍ତକାରୀ ସଂସ୍ଥା ଦେବା ପାଇଁ ପିଟିଶନରେ ଦାବି କରାଯାଇଥିଲା। ଅପରାଧ ମାମଲାଗୁଡ଼ିକର ଅନୁଧ୍ୟାନ ପାଇଁ ଅଭିଜ୍ଞ ଆଇପିଏସ୍ ଅଫିସର ଦତ୍ତାତ୍ରେୟ ପଡ୍ସାଲଗିକରଙ୍କୁ ନିଯୁକ୍ତ କରାଯାଇଥିବା ଖଣ୍ଡପୀଠ କହିଥିଲେ। ଅଫିସରମାନଙ୍କୁ ଦାୟିତ୍ୱ ନେବା, ସ୍ଥିତି ଅନୁଧ୍ୟାନ କରିବା ପାଇଁ ସମୟ ଦିଆଯାଉ ବୋଲି ଖଣ୍ଡପୀଠ କହିଥିଲେ। ମହାରାଷ୍ଟ୍ରର ପୂର୍ବତନ ଡିଜିପି ପଡ୍ସାଲଗିକର ମଣିପୁର ଗସ୍ତ କରି ତଦନ୍ତ ପ୍ରକ୍ରିୟାର ତଦାରଖ କରୁଛନ୍ତି ବୋଲି ସିଜେଆଇ ଚନ୍ଦ୍ରଚୂଡ଼ କହିଥିଲେ। ମଣିପୁର ହିଂସାର ତଦନ୍ତ ଅଦାଲତଙ୍କ ତତ୍ତ୍ୱାବଧାନରେ କରାଯିବା, ରିଲିଫ୍ ଏବଂ ଥାଇଥାନ ପାଇଁ ପଦକ୍ଷେପ ଆଦି ଉପରେ ହୋଇଥିବା ଆବେଦନର ଶୁଣାଣି କରି ଖଣ୍ଡପୀଠ ଗତ ମାସ ୭ରେ ପଡସାଲଗିକରଙ୍କୁ ସିବିଆଇ ତଦନ୍ତର ଅନୁଧ୍ୟାନ କରିବାକୁ ନିଯୁକ୍ତ କରିଥିଲେ।
