ଜଗତ୍ସିଂହପୁର, ୨୭ା୮(ପ୍ରମୋଦ କୁମାର ନାୟକ)ଜଗତ୍ସିଂହପୁର ଜିଲାରେ ଚୋରା ମଦ କାରବାର ଦିନକୁ ଦିନ ବଢ଼ିବାରେ ଲାଗିଛି। ସହରଠାରୁ ଗାଁ ପର୍ଯ୍ୟନ୍ତ ଚାରିଆଡେ ଏହି ର଼୍ୟାକେଟ୍ ତାର କାୟା ବସ୍ତାର କରି ଚାଲିଛି। ଏଥିରେ ସ୍ଥାନୀୟ ଅଞ୍ଚଳର କେତେଜଣ ଚୋରା ବେପାରୀ ମାଷ୍ଟର ମାଇଣ୍ଡ ଥିବା କୁହାଯାଉଛି । ଏପରି କି କେତେକ ଠିପି ବନ୍ଦ ମଦ ଦୋକାନ ସମ୍ମୁଖରେ ଖୁଲମଖୁଲା ମଦର ଆସର ଜମୁଛି। ହେଲେ କାର୍ଯ୍ୟାନୁଷ୍ଠାନ ହେଉନାହିଁ। କେବଳ ଏତିକି ନୁହେଁ ନକଲି ମଦ କାରବାର ମଧ୍ୟ ଚିନ୍ତା ବଢ଼ାଇଲାଣି। ଏନେଇ ଜନ ଅସନ୍ତୋଷ ବଢ଼ିବାରେ ଲାଗିଛି। ଏବେଠାରୁ ଅବକାରୀ ବିଭାଗ ଓ ପୋଲିସ ଦାୟିତ୍ୱବାନ ନ ହେଲେ ସମ୍ଭାବ୍ୟ ପରିସ୍ଥିତିକୁ ଏଡ଼ାଇ ଦିଆଯାଇ ନ ପାରେ ବୋଲି ଅନେକ ବୁଦ୍ଧିଜୀବୀ ମତବ୍ୟକ୍ତ କରିଛନ୍ତି।
ଏ ସମ୍ପର୍କରେ ସ୍ଥାନୀୟ ଅଞ୍ଚଳର କେତେଜଣ ବୁଦ୍ଧିଜୀବୀ ପ୍ରତିକ୍ରିୟାରେ କହିଛନ୍ତି, ନିଶା ସେବନରୁ ଦୂରେଇ ରହିବାକୁ ସରକାରୀ ଓ ବେସରକାରୀ ଭାବେ ବହୁ ଅର୍ଥ ଖର୍ଚ୍ଚ କରାଯାଉଛି। ବର୍ଷ ବର୍ଷ ଧରି ସଚେତନତା କାର୍ଯ୍ୟକ୍ରମ ଚାଲିଛି। କିନ୍ତୁ ଏହା କେବଳ ପ୍ରହସନ ପାଲଟିଛି। ଅସାଧୁ କର୍ମଚାରୀମାନେ ମାସିକିଆ ଚାନ୍ଦା ନେଇ ଚୁପ୍ ରହୁଥିବାରୁ ମଦ ଦୋକାନୀମାନେ ଚୋରା କାରବାରକାରୀଙ୍କୁ ପେଟି ପେଟି ବିଦେଶୀ ଓ ଦେଶୀ ମଦ ବିକି ମୋଟା ଅଙ୍କର ଅର୍ଥ ରୋଜଗାର କରୁଛନ୍ତି। ଗାଁଗୁଡିକରେ ଅବାଧରେ ଏହି କାରବାର ଅବାଧରେ ଚାଲିଛି। ଏଥିଯୋଗୁ ହିଂସା ବଢ଼ୁଛି । ଯୁବଗୋଷ୍ଠି ପଥହରା ହେଉଛନ୍ତି । ଜଗତ୍ସିଂହପୁର ସହର କଥା ଦେଖିଲେ ଜଣାଯାଏ ଠିପିବନ୍ଦ ଏକ ନିର୍ଦ୍ଦିଷ୍ଟ ମଦ ଦୋକାନ ସମ୍ମୁଖରେ ସନ୍ଧ୍ୟା ହେଲେ ଆସର ଜମୁଛି। କାରବାରକୁ ଦେଖି ଏହା ପାର୍ଶ୍ୱରେ ଏକାଧିକ ଫାଷ୍ଟ ଫୁଡ୍ ଦୋକାନ ଖୋଲିଯାଇଛି। ମଦ୍ୟପାନ ପରେ ଏହି ସ୍ଥାନରେ ଅନେକ ପ୍ଲାଷ୍ଟିକ ଗ୍ଲାସ, ପ୍ଲେଟ୍ ଓ ମଦ ବୋତଲ ଫୋପାଡି ଦେଉଛନ୍ତି। ଏହାଦ୍ୱାରା ମଦ ଦୋକାନ ସମ୍ମୁଖ ରାସ୍ତା ଓ ଏହା ପାର୍ଶ୍ୱ କେନାଲରେ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। ସନ୍ଧ୍ୟାରେ ଏହି ରାସ୍ତାଦେଇ ମହିଳା ଯିବା ତ ଦୂରର କଥା ସାଧାରଣ ଲୋକଟିଏ ଯିବାକୁ ଡରୁଛି । ରାତି ଓ ପ୍ରାତଃ ସମୟରେ ଉକ୍ତ ମଦ ଦୋକାନରୁ କାର, ଅଟୋ, ଚାରିଚକିଆ ଯାନ, ବାଇକ୍ ଓ ସ୍କୁଟର ଯୋଗେ ବହୁ ପରିମାଣର ମଦ ଜିଲା ଓ ବାହାରକୁ ଚୋରା ଚାଲାଣ ହେଉଛି। ଛୋଟ ଚୋରା କାରବାରକାରୀମାନେ ସ୍କୁଟର ଉପରେ ନିର୍ଭର କରୁଛନ୍ତି। ଅନ୍ୟପଟେ ଉକ୍ତ ମଦ ଦୋକାନରେ ଅନେକ ସମୟରେ ଚଢ଼ା ଦରରେ ମଦ ବିକ୍ରି ହେଉଛି । କିନ୍ତୁ ବିଲ୍ ଦିଆଯାଉନାହିଁ। ଗତବର୍ଷ ଖରାଦିନେ ଏହି ଦୋକାନରେ ଥିବା ସେଲ୍ସମ୍ୟାନ ସରକାରୀ ଧାର୍ଯ୍ୟ ମୂଲ୍ୟଠାରୁ ଅଧିକ ଦରରେ ବିୟର ବିକ୍ରି କରୁଥିଲେ। ଏନେଇ ଅସନ୍ତୋଷ ପ୍ରକାଶ ପାଇଥିଲା। ଏପରି କି ଅବକାରୀ ସୁପରିଣ୍ଟେଣ୍ଡେଣ୍ଟଙ୍କ ନିକଟରେ ଅଭିଯୋଗ ହୋଇଥିଲା। ଏହିଭଳି ଅନେକ ଅଭିଯୋଗ ସତ୍ତ୍ବେ କାର୍ଯ୍ୟାନୁଷ୍ଠାନ ହେଉନାହିଁ। ଏହାବାଦ୍ ଗାଁ ଗୁଡିକରେ ମଦ ଚୋରା ଚାଲାଣକାରୀମାନେ ନକଲିକୁ ଅସଲି କହି ସହଜରେ ବିକି ମୋଟା ଅଙ୍କର ଅର୍ଥ ରୋଜଗାର କରି ଚାଲିଛନ୍ତି । ଏହାକୁ ପିଇ ଅନେକ ଅସୁସ୍ଥ ହେବା ସହ ବିପଦଗାମୀ ହେଉଥିବା ଅଭିଯୋଗ ହେଉଛି। ଏହା ଉପରେ ଜଗତ୍ସିଂହପୁର ଥାନା ଆଇଆଇସି ଗୋକୁଳ ରଞ୍ଜନ ଦାସଙ୍କୁ ପଚାରିବାରୁ ସାନ ବଜାରସ୍ଥିତ ଏକ ମଦ ଦୋକାନ ଆଗରେ ମଦ୍ୟପଙ୍କ ଆସର ଚାଲିବା କଥା ସ୍ବୀକାର କରିଛନ୍ତି। ସେ କହିଛନ୍ତି,ଏହା ଭିତରେ ସେ ୨/୩ ଥର ଚଢ଼ାଇ କରିସାରିଲେଣି । ଆଗକୁ ସିସି କ୍ୟାମେରା ଲଗାଯିବା ପାଇଁ ଚିନ୍ତା କରାଯାଉଛି । ଏହି ମାସ ଭିତରେ ୬ଟି ଅବକାରୀ ମାମଲା ରୁଜୁ ହୋଇଛି। ସେଥିମଧ୍ୟରୁ ଚୋରା ମଦ କାରବାର ସଂକ୍ରାନ୍ତୀୟ ୩ଟି ରହିଛି। ବାଇକ୍ରେ ମଦ ଚୋରା ଚାଲାଣ ବେଳେ ପୋଲିସ ଅଭିଯୁକ୍ତଙ୍କୁ ଗିରଫ ସହ ମଦ ଜବତ କରିଛି। ଆଗକୁ ଚଢ଼ାଉ ଜୋର୍ଦାର କରାଯିବ ବୋଲି ସେ କହିଛନ୍ତି । ଅବକାରୀ ସୁପରିଣ୍ଟେଣ୍ଡେଣ୍ଟ ବୈଜୟନ୍ତୀ ପଣ୍ଡା ମଧ୍ୟ କାର୍ଯ୍ୟାନୁଷ୍ଠାନ କ୍ରିୟାଶୀଳ କରାଯିବ ବୋଲି କହିଛନ୍ତି।