କଳିଙ୍ଗନଗର, ୨।୧୦(ଡି.ଏନ.ଏ.): କଳିଙ୍ଗନଗର ଶଳ୍ପାଞ୍ଚଳର ଯାଜପୁର ସିମେଣ୍ଟ (ସାଗର ସିମେଣ୍ଟ୍) କାରଖାନାରେ ଶୁକ୍ରବାର ଉତ୍ତେଜନା ପ୍ରକାଶ ପାଇଛି। ୩ ମାସର ବକେୟା ଦରମା ଦାବିରେ ଶ୍ରମିକ ଓ କର୍ମଚାରୀ ସକାଳ ୭ଟାରୁ ଆନ୍ଦୋଳନକୁ ଓହ୍ଲାଇଥିଲେ। ଅପରାହ୍ନ ୪ଟାରେ ପୋଲିସ ପହଞ୍ଚତ୍ କାରଖାନା କର୍ତ୍ତୃପକ୍ଷ ଓ ଠିକାସଂସ୍ଥା କର୍ମଚାରୀଙ୍କ ସହ ଆଲୋଚନା କରିବା ପରେ ଆନ୍ଦୋଳନ ଥମିଥିଲା। ସିମେଣ୍ଟ୍ କାରଖାନା କର୍ତ୍ତୃପକ୍ଷ ଠିକାଦାରଙ୍କୁ ବକେୟା ଦରମା ଦେଉ ନ ଥିବାରୁ ଠିକାଦାର ଶ୍ରମିକଙ୍କୁ ପାଉଣା ଦେଉ ନ ଥିବା କହୁଛନ୍ତି। ଅନ୍ୟପକ୍ଷରେ କାରଖାନା କର୍ତ୍ତୃପକ୍ଷ ଠିକାଦାରଙ୍କୁ ଏକମାସର ପ୍ରାପ୍ୟ ଦେଇଥିବା କହିଛନ୍ତି। ଏହାମଧ୍ୟରେ ଶ୍ରମିକମାନେ ଦରମା ନପାଇ ହନ୍ତସନ୍ତ ହେଉଥିବା ଦେଖିବାକୁ ମିଳିଛି। ୯ ଘଣ୍ଟା ଧରି ଶ୍ରିମକମାନେ କାରଖାନା ଆଗରେ ବସି ରହିଥିଲେ ମଧ୍ୟ କର୍ତ୍ତୃପକ୍ଷ ସେମାନଙ୍କୁ ଆଲୋଚନା ପାଇଁ ନ ଡାକି ଓଲଟା ପୋଲିସର ଭୟ ଦେଖାଇବାକୁ ପଛାଇନଥିଲେ ବୋଲି ଶ୍ରମିକମାନେ ଅଭିଯୋଗ କରିଛନ୍ତି। ଦୀର୍ଘ ସମୟ ପରେ ହୋଇଥିବା ଆଲୋଚନାରେ କାରଖାନା ମୁଖ୍ୟ ଭେଙ୍କଟ ରେଡ୍ଡି, କଳିଙ୍ଗନଗର ଆଇଆଇସି ସୁଶାନ୍ତ କୁମାର ଦାସ ଓ ଯଖପୁରା ଆଇଆଇସି ଲକ୍ଷ୍ମଣ ଦଣ୍ଡସେନା, ଆରପିଡି କମ୍ପାନୀ ସୁପରଭାଇଜର ଅନନ୍ତ ଦାସ ଓ ଦିବ୍ୟ ଜେନା ପ୍ରମୁଖ ଉପସ୍ଥିତ ଥିଲେ। କାରଖାନା ପକ୍ଷରୁ ରେଡ୍ଡି ସମ୍ପୃକ୍ତ ଠିକାସଂସ୍ଥାକୁ ବକେୟା ଦରମା ପ୍ରଦାନ କରାଯାଇଥିବା କହିଥିଲେ। ତେବେ ବିଲ ପାଇବା ପରେ କାହିଁକି ଠିକାଦାର ଦରମା ଦେଇନାହାନ୍ତି ଶନିବାର ତାଙ୍କୁ ଡକାଇ ଆଲୋଚନା କରିବେ ବୋଲି ରେଡ୍ଡି ଜଣାଇଥିଲେ। ଅଧିକ ଉତ୍ତେଜନା ଆଶଙ୍କାରେ ଏକ ପ୍ଲାଟୁନ ଫୋର୍ସ କାରଖାନା ନିକଟରେ ମୁତୟନ କରାଯାଇଥିଲା। ସୂଚନାଯୋଗ୍ୟ,୨୦୨୦ରେ କାରଖାନା ମେକାନିକାଲ କାମ ଠିକାସଂସ୍ଥା ଆର୍ପିଡି ଇନ୍ଫ୍ରା ପ୍ରାଇଭେଟ ଲିମିଟେଡକୁ ଦିଆଯାଇଛି। କମ୍ପାନୀରେ ମୋଟ୍ ୨୫୦ ଶ୍ରମିକ ଓ କର୍ମଚାରୀ ଅଛନ୍ତି।