ଭୁବନେଶ୍ୱର, ୧୩।୮(କ୍ରୀଡ଼ା ପ୍ରତିନିଧି)- ଭାରତର ପୂର୍ବତନ ଅନ୍ତର୍ଜାତୀୟ ଖେଳାଳି ଷ୍ଟିଭେନ ଡିଆସ ଓଡ଼ିଶା ଏଫସିର ସହକାରୀ କୋଚ୍ ନିଯୁକ୍ତ ହୋଇଛନ୍ତି। ୩୬ ବର୍ଷୀୟ ଏହି ମିଡ୍ଫିଲ୍ଡର ଇଣ୍ଡିଆନ ସୁପର ଲିଗ୍(ଆଇଏସଏଲ)ରେ ଭୁବନେଶ୍ୱର ଭିତ୍ତିକ ଫ୍ରାଞ୍ଚାଇଜ୍ ସହିତ ଏକ ବର୍ଷ ପାଇଁ ଚୁକ୍ତି କରିଛନ୍ତି। ଭାରତୀୟ ଜାତୀୟ ଦଳ ବ୍ୟତୀତ ଏୟାର ଇଣ୍ଡିଆ, ମହିନ୍ଦ୍ରା ୟୁନାଇଟେଡ, ଚର୍ଚ୍ଚିଲ ବ୍ରଦର୍ସ, ଦିଲ୍ଲୀ ଡାଇନାମସ ଓ ମୁମ୍ବାଇ ଏଫସି ପରି ନାମୀ କ୍ଲବ ସହିତ କାର୍ଯ୍ୟ କରି ସାରିଥିବା ଷ୍ଟିଭେନ ଗତ ସିଜନରେ ଜାମସେଦପୁର ଏଫସିର ସହକାରୀ କୋଚ୍ ଥିଲେ। ସ୍ପାନିଶ୍ ଷ୍ଟ୍ରେନ୍ଥ ଆଣ୍ଡ କଣ୍ଡିଶନିଂ କୋଚ୍ ଜୋଆନ କାସାନୋଭା ଆଗାମୀ ସିଜନ ପାଇଁ ମଧ୍ୟ ଓଡ଼ିଶା ଏଫସି ସହିତ ରହିବେ। ପୂର୍ବତନ ମୁଖ୍ୟ କୋଚ୍ ଜୋସେପ ଗୋମ୍ବାଉଙ୍କ କୋଚିଂ ଟିମ୍ର ସଦସ୍ୟ ଥିବା କାସାନୋଭାଙ୍କ କାର୍ଯ୍ୟକାଳକୁ ଆଉ ୧ ବର୍ଷ ପାଇଁ ବଢ଼ାଇ ଦିଆ ଯାଇଛି। ଓଡ଼ିଶା ଏଫସିର ଏହି ଦୁଇ ନୂଆ ନିଯୁକ୍ତି ସମ୍ପର୍କରେ ମୁଖ୍ୟ କୋଚ୍ ଷ୍ଟୁଆର୍ଟ ବକ୍ସଟର କୁହନ୍ତି ଯେ, ଷ୍ଟିଭେନ ନିଜ କ୍ୟାରିୟରରେ ଜଣେ ସଫଳ ଖେଳାଳି ଥିଲେ। ସେ କୋଚ୍ଭାବେ ଉନ୍ନତି କରିଥିବାରୁ ଆମପାଇଁ ଉପାଦେୟ ହେବେ। ଜୋଆନଙ୍କ ସହିତ କାମ କରିବା ପାଇଁ ଖେଳାଳିମାନେ ସହଜ ମଣୁଛନ୍ତି। ତେଣୁ ଆଗାମୀ ସିଜନ ପାଇଁ ମଧ୍ୟ ସେ ତାଙ୍କ କାର୍ଯ୍ୟ ଜାରି ରଖିବେ।
ସହକାରୀ କୋଚ୍ ନିଯୁକ୍ତ ହେବାପରେ ଷ୍ଟିଭେନ ମଧ୍ୟ ନିଜ ମତ ରଖିଛନ୍ତି। ଅଭିଜ୍ଞ କୋଚ୍ ଷ୍ଟୁଆର୍ଟ ବକ୍ସଟରଙ୍କ ସହ କାମ କରିବା ପାଇଁ ଓଡ଼ିଶା ଏଫସିରେ ଯୋଗ ଦେଇଥିବାରୁ ମୁଁ ଅତ୍ୟନ୍ତ ଆନନ୍ଦିତ। ଏହି କ୍ଲବ ଭାରତୀୟ ଯୁବ ଖେଳାଳିଙ୍କୁ ପ୍ରୋତ୍ସାହିତ କରି ଆସୁଛି। ତେଣୁ ମୁଁ ଏହି ଦଳ ସହ କାର୍ଯ୍ୟ କରିବାକୁ ଇଚ୍ଛା ପ୍ରକାଶ କରିଛି। ମୋ ଉପରେ ଭରସା କରିଥିବାରୁ ମ୍ୟାନେଜମେଣ୍ଟକୁ ଧନ୍ୟବାଦ ଜଣାଉଛି ବୋଲି ସେ ପ୍ରକାଶ କରିଛନ୍ତି। ସେହିପରି ଓଡ଼ିଶା ଏଫସି ଦଳରେ ନିଜ ପଦରେ ଅପରିବର୍ତ୍ତିତ ରହିଥିବାରୁ ଖୁସି ଜାହିର କରିଛନ୍ତି ଜୋଆନ। ଗତ ସିଜନରେ ଅନେକ ଚ୍ୟାଲେଞ୍ଜ ଆସିଥିଲା। ଆମେ ସେ ସବୁକୁ ମୁକାବିଲା କରି ଶେଷରେ ଭଲ ପୋଜିଶନରେ ରହିଥିଲୁ। ଶେଷ ଗେମ୍ ପର୍ଯ୍ୟନ୍ତ ଆମର ପ୍ଲେ-ଅଫ୍ ପ୍ରବେଶ ଆଶା ରହିଥିଲା। ଆସନ୍ତା ସିଜନରେ ଆମ ଦଳ ଅତିକମ୍ରେ ପ୍ଲେ-ଅଫ୍ରେ ପ୍ରବେଶ କରିବା ଆଶା ରହିଛି। ଷ୍ଟୁଆର୍ଟ ଓ ନୂଆ କୋଚିଂ ଟିମ୍ ସହିତ କାମ କରିବା ପାଇଁ ମୁଁ ଅପେକ୍ଷା କରି ରହିଛନ୍ତି ବୋଲି ଜୋଆନ କହିଛନ୍ତି।