ଭୁବନେଶ୍ୱର,(ବ୍ୟୁରୋ)/ଦାରିଙ୍ଗବାଡ଼ି/ବାଲିଗୁଡ଼ା, ୧୧।୪ (ଡି.ଏନ୍.ଏ): ରାଜ୍ୟରେ ବନ୍ୟଜନ୍ତୁ ଶିକାର ଓ ଚୋରା ଚାଲାଣ ବେଧଡ଼କ ଚାଲିଛି। ଯେତେ ଚଢ଼ାଉ ହେଉଛି, ସେତେ ଧରାପଡୁଛି। ବିଶେଷକରି ବାଘ ବଂଶ ପ୍ରତି ବଡ଼ ବିପଦ ଦେଖାଦେଇଛି। ବନ୍ୟଜନ୍ତୁ ଶିକାରୀଙ୍କ ବିରୋଧରେ ସ୍ବତନ୍ତ୍ର ଅଭିଯାନ ଚଳାଇଥିବା କ୍ରାଇମବ୍ରାଞ୍ଚ ଏସ୍ଟିଏଫ୍ ୨ବର୍ଷରେ ୨୭ ବାଘଛାଲ, ୨ ବାଘ ଦାନ୍ତ ଓ ୨୯ ବାଘ ନଖ ଜବତ କରିଛି। ତେବେ ପୂର୍ବରୁ ଶୋଇ ରହିଥିବା ବନ ବିଭାଗ ଏବେ ଏସ୍ଟିଏଫ୍ ସହ ମିଶି ଚଢ଼ାଉ ଜାରି ରଖିଥିଲେ ମଧ୍ୟ ର଼୍ୟାକେଟର ଚେର ପର୍ଯ୍ୟନ୍ତ ପହଞ୍ଚତ୍ପାରୁନି। ବାଘକୁ ହତ୍ୟା କରି ତା’ର ଚମଡ଼ା, ଦାନ୍ତ ଓ ନଖ ଆଦି ମୂଲ୍ୟବାନ ଅଙ୍ଗପ୍ରତ୍ୟଙ୍ଗକୁ ରାଜ୍ୟ ତଥା ଦେଶ ବାହାରକୁ ଚାଲାଣ କରାଯାଉଛି। ହେଲେ କ୍ରାଇମ୍ବ୍ରାଞ୍ଚ ହେଉ କି ବନ ବିଭାଗ, କେବଳ ଚାଲାଣ ସମୟରେ ଧରୁଛି। ଶିକାର ଜାରି ରହିଥିବାରୁ ଚୋରା ଚାଲାଣ ମଧ୍ୟ ବନ୍ଦ ହେଉ ନାହିଁ।
ଶନିବାର ଏସ୍ଟିଏଫ୍ ସ୍ଥାନୀୟ ବନବିଭାଗ ସହାୟତାରେ କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ଅଞ୍ଚଳରେ ଚଢ଼ାଉ କରି ଜଣେ ଶିକାରୀଙ୍କୁ ଗିରଫ କରିଛି। ସେ ହେଲେ ସ୍ଥାନୀୟ ଥାନା ଅନ୍ତର୍ଗତ ପାଙ୍ଗାଲି ଗ୍ରାମର ବିପିନ ନାୟକ(୪୦)। ତାଙ୍କଠାରୁ ଏକ ବାଘଛାଲ ସହ କେତେକ ଆପରାଧିକ ସାମଗ୍ରୀ ଜବତ କରାଯାଇଛି। ଏହି ଛାଲର ଆନୁମାନିକ ମୂଲ୍ୟ ୩ ଲକ୍ଷ ଟଙ୍କା ହେବ। ନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ପାଇଁ ଏସ୍ଟିଏଫ୍ ଗିରଫ ଅଭିଯୁକ୍ତଙ୍କୁ ଦାରିଙ୍ଗବାଡ଼ି ବନବିଭାଗକୁ ସ୍ଥାନାନ୍ତର କରିଥିଲା। ବନବିଭାଗ ଏକ ମାମଲା (ନଂ.୧/୨୨-୨୩) ରୁଜୁ କରି ତାଙ୍କୁ ରବିବାର କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ବାଘଟିକୁ ନିକଟ ଜଙ୍ଗଲରୁ ଶିକାର କରାଯାଇଥିବା ଜଣାପଡ଼ିଛି। ତେବେ ବିପିନଙ୍କ ସହ ଏଥିରେ ଏକାଧିକ ଲୋକ ସମ୍ପୃକ୍ତ ଥିବା ଜାଣିବା ପରେ ଅନ୍ୟମାନଙ୍କୁ ଧରିବାକୁ ଏସ୍ଟିଏଫ୍ ଓ ବନବିଭାଗ ପକ୍ଷରୁ ଚଢ଼ାଉ ଜାରି ରହିଛି। ଏଥିସହ ର଼୍ୟାକେଟ୍ ସମ୍ପର୍କରେ ଅଧିକ ତଦନ୍ତ କରାଯାଉଥିବା ଏସ୍ଟିଏଫ୍ ପକ୍ଷରୁ ସୂଚନା ଦିଆଯାଇଛି।
ଅଭିଯୁକ୍ତ ବିପିନ୍ଙ୍କ ନିକଟରେ ଏକ ବାଘଛାଲ ଥିବା ଏସ୍ଟିଏଫ୍ ବିଶ୍ୱସ୍ତ ସୂତ୍ରରୁ ଜାଣିବାକୁ ପାଇଥିଲା। ସେ ତାହାକୁ ୪ ଲକ୍ଷ ଟଙ୍କାରେ ବିକ୍ରି ପାଇଁ ଗ୍ରାହକ ଖୋଜୁଥିଲେ। ତାଙ୍କୁ ଧରିବାକୁ ଏସ୍ଟିଏଫ୍ ଓ ସ୍ଥାନୀୟ ବନବିଭାଗର ଅଧିକାରୀମାନେ ଗ୍ରାହକ ବେଶରେ ବିପିନଙ୍କୁ ଯୋଗାଯୋଗ କରିଥିଲେ। ଶନିବାର ରାତି ପ୍ରାୟ ୧୧ଟାରେ ସେ ଏକ ପ୍ଲାଷ୍ଟିକ୍ ବ୍ୟାଗରେ ଉକ୍ତ ବାଘଛାଲକୁ ଧରି ଡାବେରୀ ଗ୍ରାମ ନିକଟ ରାସ୍ତାକୁ ଆସିଥିଲେ। ପୂର୍ବ ପ୍ରସ୍ତୁତି ମୁତାବକ ଅଧିକାରୀମାନେ ତାଙ୍କୁ କାବୁ କରି ନେଇଥିଲେ। ଏହା ପୂର୍ବରୁ ମାର୍ଚ୍ଚ ୨ରେ ଗଜପତି ଜିଲା ଆର୍ଉଦୟଗିରି ଥାନା ଅଞ୍ଚଳରେ ଏସ୍ଟିଏଫ୍ ଚଢ଼ାଉ କରି ପବିତ୍ର ଲିମା ନାମକ ଜଣେ ଶିକାରୀଙ୍କୁ ଗିରଫ କରିବା ସହ ତାଙ୍କଠାରୁ ଏକ ବାଘଛାଲ ଜବତ କରିଥିଲା।
ଅନ୍ୟପକ୍ଷରେ ଏସ୍ଟିଏଫ୍ ତା’ର ସ୍ବତନ୍ତ୍ର ଅଭିଯାନରେ ବାଘ ଛାଲ, ଦାନ୍ତ, ନଖ ସହ ୧୫ ହାତୀଦାନ୍ତ, ୭ ହରିଣ ଛାଲ, ୧୨ ଜୀବନ୍ତ ବଜ୍ରକାପ୍ତା, ୨୩.୫ କେଜି ବଜ୍ରକାପ୍ତା କାତି, ୪୬ ଶୁଆ ଆଦି ଜବତ କରିବା ସହ ସମ୍ପୃକ୍ତ ୬୪ ଜଣଙ୍କୁ ଗିରଫ କରିଛି।