ହିନ୍ଦୋଳ, ୨୯।୧(ଡି.ଏନ.ଏ.): ଘର ଗୋଟିଏ। ଲାଗିଛି ଦୁଇ ଷ୍ଟିକର। ଗୋଟିଏ କେନ୍ଦ୍ର ସରକାରଙ୍କ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାର ଏବଂ ଅନ୍ୟଟି ସୂଚାଉଛି ରାଜ୍ୟ ସରକାରଙ୍କ ବିଜୁ ପକ୍କାଘର ଯୋଜନାକୁ। ଢେଙ୍କାନାଳ ଜିଲା ହିନ୍ଦୋଳ ବ୍ଲକ ଅନ୍ତର୍ଗତ କଳିଙ୍ଗା ପଞ୍ଚାୟତର ଗୁଳୁଗୁଣ୍ଡି ଗ୍ରାମର ଆବାସ ଯୋଜନା ଫଳକରେ ଏଭଳି ତ୍ରୁଟିବିଚ୍ୟୁତି ପଦାକୁ ଆସିଛି। ପ୍ରଶାସନିକସ୍ତରରେ ହୋଇଥିବା ଏଭଳି ଭୁଲ ଯୋଗୁ ଯୋଜନାର କାର୍ଯ୍ୟକାରିତାକୁ ନେଇ ସାଧାରଣରେ ଦ୍ୱନ୍ଦ୍ୱ ସୃଷ୍ଟି ହୋଇଛି।
ହିନ୍ଦୋଳ ବ୍ଲକରେ ଆବାସ ଯୋଜନାରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ହୋଇଆସୁଛି। ସ୍ବଚ୍ଛଳ ବର୍ଗ ଗୃହ କାର୍ଯ୍ୟାଦେଶ ହାତେଇ ନେଉଥିବାବେଳେ ପ୍ରକୃତ ହିତାଧିକାରୀ ଏଥିରୁ ବଞ୍ଚତ୍ତ ହେଉଥିବା ଅନେକ ସମୟରେ ଚର୍ଚ୍ଚାର ବିଷୟ ପାଲଟୁଛି। ତେବେ ଗୁଳୁଗୁଣ୍ଡି ଗ୍ରାମର ଏକ ବ୍ୟତିକ୍ରମ ଦେଖିବାକୁ ମିଳିଛି। କୃପାସିନ୍ଧୁ ପଣ୍ଡା ନାମକ ଜଣେ ହିତାଧିକାରୀଙ୍କ ନବନିର୍ମିତ ଘରେ ଦୁଇଟି ଫଳକ ଲାଗିଛି। ତଦନୁଯାୟୀ ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ)ରେ ୨୦୨୦/୨୧ ଆର୍ଥତ୍କ ବର୍ଷରେ ୧ ଲକ୍ଷ ୨୦ହଜାର ଟଙ୍କା ମଞ୍ଜୁର ହୋଇଥିବା ଏବଂ ଏମ୍ଜିଏନ୍ଆରଇଜିଏସ୍ରେ ସହାୟତା ବାବଦକୁ ୧୮ହଜାର ୬୩୦ ଟଙ୍କା ପ୍ରଦାନ କରାଯାଇଥିବା ଉଲ୍ଲେଖ ରହିଛି। ଅନ୍ୟ ଏକ ଫଳକରେ ସମାନ ଆର୍ଥିକ ବର୍ଷରେ ଅର୍ଥାତ୍ ୨୦୨୦/୨୧ରେ ରାଜ୍ୟ ସରକାରଙ୍କ ବିଜୁ ପକ୍କାଘର ଯୋଜନା(ଗ୍ରାମୀଣ)ରେ ଗୃହ କାର୍ଯ୍ୟାଦେଶ ପ୍ରଦାନ କରାଯାଇଥିବା ଉଲ୍ଲେଖ ରହିଛି। ଏଥିରେ ମଧ୍ୟ ହିତାଧିକାରୀ ୧ ଲକ୍ଷ ୨୦ ହଜାର ଟଙ୍କା ପାଇଥିବା ଦର୍ଶାଯାଇଛି। ଜଣେ ହିତାଧିକାରୀଙ୍କ ଘରେ ଦୁଇ ଫଳକ ଲାଗିଥିବା ଦେଖି ସାଧାରଣରେ ଭିନ୍ନ ଚର୍ଚ୍ଚା ହେଉଛି।
ଏ ସମ୍ପର୍କରେ ଜିଆର୍ଏସ୍ ମିନର୍ଭା ପତି କୁହନ୍ତି, ଦୁଇଟି ଫଳକ ମରାଯିବା ପ୍ରଶାସନିକ ତ୍ରୁଟି। ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ କାର୍ଯ୍ୟାଦେଶ ମଞ୍ଜୁର ହୋଇଛି। ତଦନୁଯାୟୀ ଅର୍ଥ ପ୍ରଦାନ କରାଯାଇଛି। ତେବେ ତ୍ରୁଟିପୂର୍ଣ୍ଣ ଭାବେ ବିଜୁ ପକ୍କାଘର ଷ୍ଟିକର ମରାଯାଇଛି। ବିଡିଓ ଦେବଦତ୍ତ ମାହୁନ୍ତ କୁହନ୍ତି, ଏହି ଘଟଣା ତାଙ୍କ ନଜରକୁ ଆସିନାହିଁ। ତ୍ରୁଟିବିଚ୍ୟୁତି କିମ୍ବା କୌଣସି ଅନିୟମିତତା ହୋଇଥିଲେ ବିଧିବଦ୍ଧ ଭାବେ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।