ବାହାନଗା,୧୭।୧(ଅରୂପ୍ କୁମାର ଦାସ): ମକର ସଂକ୍ରାନ୍ତି ଆସିଲେ ଖୋଜାପଡେ ତିଳଉ ଖଜା। ସଂକ୍ରାନ୍ତ ପୂର୍ବ ଦିନ ସମସ୍ତେ ବଜାରରୁ ତିଳଉ କିଣି ଘରକୁ ନେଇଥାନ୍ତି। ବର୍ଷ ବର୍ଷ ଧରି ମକର ଚାଉଳ ସହିତ ତିଳଉର ସମ୍ପର୍କ ରହିଆସିଛି। ବାଲେଶ୍ୱର ଜିଲା ସହ ଭଦ୍ରକ ଜିଲାରେ ତିଳଉର ଚାହିଦା ରହିଛି ା ମକର ସଂକ୍ରାନ୍ତ ଦିନ ଚୂଡା ତିଳଉ ଭାର ଧରି ପରିବାର ଲୋକ ବିବାହିତା ଝିଅ ଘରକୁ ଯାଇଥାନ୍ତି। ଯଦି ସଂକ୍ରାନ୍ତି ଦିନ ବାପ ଘରୁ କେହି ତିଳଉ ଚୂଡା ଭାର ନେଇ ଯାଇପାରିନାହାନ୍ତି ତା’ହେଲେ ପରେ ବଜାରରୁ ବିକ୍ରି ହେଉଥିବା ତିଳଉ ଓ ଚୂଡା ମିଠା, ପିଠା ପଣା ଧରି ଯାଇଥାନ୍ତି। ଏହି ତିଳଉ ବାହାନଗା ବ୍ଲକ ସାହାସପୁରା ଗ୍ରାମର ଦୁଇଟି ପରିବାର ସଦସ୍ୟମାନେ ତିଆରି କରି ବିଭିନ୍ନ ବଜାରର ମିଠା ଦୋକାନୀମାନଙ୍କୁ ବିକ୍ରି କରିଥାନ୍ତି। ଏହି ଦୁଇ ପରିବାର ଦୀର୍ଘ ୧୨ବର୍ଷ ଧରି ଏହି ତିଳଉ କାରିଗର ଭାବେ ପରିଚିତ ହେବା ସହିତ ବେପାର କରି ଭଲ ଦୁଇ ପଇସା ରୋଜଗାର କରିବାରେ ସକ୍ଷମ ହେଉଛନ୍ତି ା ଗ୍ରାମର ନିରଞ୍ଜନ ସାହୁ ଓ ଗଜେନ୍ଦ୍ର ସାହୁଙ୍କ ପରିବାରର ସଦସ୍ୟମାନେ ତିଳଉ ତିଆରି କରି ବେପାରୀଙ୍କୁ ବିକ୍ରି କରିଥାନ୍ତି।
ବାଲେଶ୍ୱର ଜିଲାର ଗୋପାଳପୁର ଜଳେଶ୍ୱର, ବାହାନଗା, ସୋର, ତୁଡୁଗଡିଆ, ଖଇରା, ଔପଦା, ଭଦ୍ରକ ଜିଲାର ବାସୁଦେବପୁର, ଧାମରା, ମନ୍ଦାରି ଆଦି ଅଞ୍ଚଳକୁ ତିଳଉ ପଠାଇଥାନ୍ତି। ତେବେ ଏହି ତିଳଉ ଚିନି ଓ ଗୁଡରେ ତିଆରି ହୋଇଥାଏ। ବଜାରରେ ତିଳଉର ଦର କିଲୋ ପ୍ରତି ଶହେ ଟଙ୍କା। ଚିନିରେ ତିଆରି ତିଳଉକୁ ଭଲ ଭାବେ ସିରାରେ ପାଗ କରାଯିବା ସହିତ ତାହା ପାଗ ହେଲା ପରେ ଏକ ସ୍ଥାନରେ ଢଳାଯାଇ ଥଣ୍ଡା କରାଯାଇଥାଏ। ତାକୁ ଏକ ଉଚ୍ଚା ସ୍ଥାନରେ ଟଙ୍ଗା ଯାଇ ଖଞ୍ଜାଯାଇଥାଏ। ଭଲ ଭାବେ ସେହି ସିରାକୁ ଟଣାଯାଇ ଗୁଡାଇ ଗୋଲ ଗୋଲ କରି କଟାଯିବା ପରେ ଚୂନା ଉପରେ ରଖାଯାଇ ଥାପି ଦିଆଯାଇଥାଏ। ପରେ ସେଗୁଡିକୁ ଆଞ୍ଚରେ ରଖାଯାଇ ସେକା ଯାଇଥାଏ। ସେକିବା ପରେ ଯାଇ ତିଳଉ ପ୍ରସ୍ତୁତ ହୋଇଥାଏ। ଏନେଇ ପରିବାର ସହିତ ଅନ୍ୟ କାରିଗର ରଖି କାମ କରିଥାନ୍ତି। ଏଥିନିମନ୍ତେ ସେମାନେ ୨ଲକ୍ଷରୁ ଅଧିକ ଟଙ୍କା ପୁଞ୍ଜି ବିନିଯୋଗ କରିଥିବା କହିଛନ୍ତି। ଫଳରେ ଡିସେମ୍ବରଠାରୁ ଜାନୁଆରୀ ପର୍ଯ୍ୟନ୍ତ ସେମାନେ ତିଳଉ ତିଆରି କରି ବିଭିନ୍ନ ଅଞ୍ଚଳକୁ ପଠାଇଥାନ୍ତି ା ଏ ବିଷୟରେ ନିରଞ୍ଜନ କୁହନ୍ତି ତିଳଉ କରିବା ପାଇଁ ୨ଲକ୍ଷ ଟଙ୍କା ବିନିଯୋଗ କରିଥିଲେ। ସେଥିରୁ ଏପର୍ଯ୍ୟନ୍ତ ଲାଭ ପାଇସାରିଲେଣି ା ଏଥିରେ ଆମ ପରିବାର ସମେତ ୨ଜଣ କାରିଗରଙ୍କୁ ରଖି ସେମାନଙ୍କୁ ଦରମା ଦେଉଛନ୍ତି। ସେହିପରି ଗଜେନ୍ଦ୍ର ସାହୁ କୁହନ୍ତି ଏଥିରେ ସେ ୩ ଲକ୍ଷ ଟଙ୍କାର ଚିନି, ଗୁଡ ସମେତ କଳାଜିରା ଖସା ଆଦି କିଣିବା ସହିତ ଅନ୍ୟ ସାମଗ୍ରୀରେ ଟଙ୍କା ବିନିଯୋଗ କରିଥିଲେ। ମାତ୍ର ଚଳିତବର୍ଷ ଭଲ ତିଳଉ ବେପାର ହୋଇଛି ା ମୋତେ ମୋ ସ୍ତ୍ରୀ, ପୁଅ, ବୋହୂ ଆଦି ସହଯୋଗ କରିଥାନ୍ତି ା