ପାର୍ଲ,୧୯।୧: ଶିଖର ଧାଓ୍ବନ (୭୯) ଏବଂ ବିରାଟ କୋହଲି (୫୧)ଙ୍କ ଅର୍ଦ୍ଧଶତକୀୟ ପାଳି ସତ୍ତ୍ୱେ ଟିମ୍ ଇଣ୍ଡିଆକୁ ପରାଜୟର ମୁହଁ ଦେଖିବାକୁ ପଡ଼ିଛି। ପ୍ରଥମ ଦିନିକିଆରେ ଦକ୍ଷିଣ ଆଫ୍ରିକା ୩୧ ରନ୍ରେ ଭାରତକୁ ହରାଇ ଦେଇଛି। ପୁଣି ଥରେ ଦଳର ପରାଜୟ କାରଣ ସାଜିଥିଲା ମିଡଲ ଅର୍ଡର। ଏହି ବିଜୟ ସହ ୩ ମ୍ୟାଚ୍ ବିଶିଷ୍ଟ ସିରିଜ୍ରେ ୧-୦ର ଅଗ୍ରଣୀ ହାସଲ କରିଛି ଘରୋଇ ଦଳ।
ତେମ୍ବା ବଭୁମା (୧୧୦) ଓ ଭାନ ଡର ଡୁସେନ (୧୨୯)ଙ୍କ ଶତକ ବଳରେ ପ୍ରଥମେ ବ୍ୟାଟିଂ କରିଥିବା ଦକ୍ଷିଣ ଆଫ୍ରିକା ୪ ଉଇକେଟରେ ୨୯୬ ରନ୍ କରିଥିଲା। ଯଶପ୍ରୀତ ବୁମରା(୨ ଉଇକେଟ)ଙ୍କ ଛଡ଼ା କୌଣସି ବୋଲର ଘରୋଇ ବ୍ୟାଟରଙ୍କୁ ରୋକି ପାରି ନ ଥିଲେ। ଅନ୍ୟପକ୍ଷରେ ବଭୁମା ଓ ଡୁସେନ ପଞ୍ଚମ ଉଇକେଟ ପାଇଁ ୨୦୪ ରନ୍ର ଭାଗୀଦାରି କରିଥିଲେ।
ଜବାବରେ ଆରମ୍ଭରୁ ଲୋକେଶ ରାହୁଲ (୧୨)ଙ୍କ ଉଇକେଟ ହରାଇଥିଲେ ମଧ୍ୟ ଧାଓ୍ବନ ଓ କୋହଲି ଦଳୀୟ ସ୍କୋରରେ ଦ୍ୱିତୀୟ ଉଇକେଟ ପାଇଁ ୯୨ ରନ୍ ଯୋଡ଼ି ଥିଲେ। ଦୁହେଁ ଅର୍ଦ୍ଧଶତକ ପୂରଣ କରିବା ପରେ ଆଉଟ୍ ହୋଇଥିଲେ। ହେଲେ ହୁହେଁ ପ୍ୟାଭିଲିଅନ ଫେରିବା ପରେ ପୂରା ଫେଲ ମାରିଥିଲା ଟିମ୍ ଇଣ୍ଡିଆର ମିଡ୍ଲ ଅର୍ଡର। ଶେଷରେ ଶାର୍ଦ୍ଦୁଳ ଠାକୁର (୫୦ ରନ୍, ୫ ଚୌକା ଓ ୧ ଛକା) ଅର୍ଦ୍ଧଶତକ ଲଗାଇଥିଲେ। ମାତ୍ର ତାହା ଦଳକୁ ପରାଜୟରୁ ବଞ୍ଚାଇ ପାରି ନ ଥିଲା। ଫଳରେ ଭାରତ ୫୦ ଓଭରରେ ୮ ଉଇକେଟ ହରାଇ ୨୬୫ ରନ୍ କରିବାକୁ ସକ୍ଷମ ହୋଇଥିଲା।
