ଭଦ୍ରକ/ଭଣ୍ଡାରୀପୋଖରୀ(ସନାତନ ରାଉତ/ରବିନାରାୟଣ ଖିଲାର),୨୯।୯:ଭଦ୍ରକ ଜିଲା ଭଣ୍ଡାରିପୋଖରୀ ଥାନା ଅଧୀନ ବାଲିପୋଖରୀ ପଞ୍ଚାୟତ ପରମାନନ୍ଦପୁର ଗ୍ରାମର ଚନ୍ଦନ ସାହୁ(୩୦) ନିଜ ଅଢ଼େଇ ବର୍ଷର ଝିଅକୁ ଧରି ବୈତରଣୀ ସେତୁ ଉପରୁ ନଦୀକୁ ଡେଇଁବା ଘଟଣାକୁ ୨୪ ଘଣ୍ଟା ବିତିଯାଇଥିଲେ ମଧ୍ୟ ବାପ,ଝିଅଙ୍କ କୌଣସି ପତ୍ତା ମିଳିନାହିଁ। ଚନ୍ଦନ ବୁଧବାର ରାତି ପ୍ରାୟ ୯ଟାରେ ୧୬ ନଂ. ଜାତୀୟ ରାଜପଥର ଏହି ସେତୁ ଉପରୁ ଆଖୁଆପଦା ଆନିକଟର ଗଭୀର ଜଳରାଶିକୁ ଝିଅ ତୃପ୍ତିକୁ ସାଙ୍ଗରେ ଧରି ଡେଇଁ ପଡ଼ିଥିଲେ। ଅଗ୍ନିଶମ ବାହିନୀ ଏବଂ ଓଡ୍ରାଫ୍ ଟିମ୍ ସେହି ରାତି ଓ ଗୁରୁବାର ଦିନତମାମ ଖୋଜାଖୋଜି କରିଥିଲେ ମଧ୍ୟ ସେମାନଙ୍କ କୌଣସି ସୂଚନା ମିଳିପାରି ନାହିଁ। ପୋଲ ଉପରୁ ଚନ୍ଦନଙ୍କ ବାଇକ୍, ମୋବାଇଲ ଓ ବାପ,ଝିଅଙ୍କ ଜୋତାକୁ ପୋଲିସ ଜବତ କରିଛି। ଅନ୍ୟପକ୍ଷେ ବଡ଼ଭଉଣୀଙ୍କ ସହ ଚନ୍ଦନଙ୍କ ଶେଷଥର ପାଇଁ ଫୋନ ଯୋଗେ ହୋଇଥିବା ବାର୍ତ୍ତାଳପ ଅଡିଓ ଭାଇରାଲ ହେବାପରେ ସାଧାରଣରେ ଆଲୋଡ଼ନ ସୃଷ୍ଟି କରିଛି। ଉକ୍ତ ଫୋନକଲ୍ରୁ ସୂଚନା ମିଳିଛି ଯେ, ଆତ୍ମହତ୍ୟା ନେଇ ସେ ଭଉଣୀଙ୍କୁ ଜଣାଇଥିଲେ। ଆତ୍ମହତ୍ୟା ନ କରିବାକୁ ତାଙ୍କ ଭଉଣୀ ଯେତେ ରାଣ ନିୟମ ପକାଇଥିଲେ ମଧ୍ୟ ତାହାକୁ ଏଡ଼ାଇ ଦେଇଥିବା ଶୁଣିବାକୁ ମିଳୁଛି। ତେବେ ଚନ୍ଦନ ଏଭଳି ଚରମ ନିଷ୍ପତ୍ତି ନେବା ପଛରେ କ’ଣ କାରଣ ରହିଛି, ତାହା ସ୍ପଷ୍ଟ ହୋଇପାରି ନାହିଁ। ଅପରପକ୍ଷେ ରୋଜଗାରିଆ ପୁଅ ଓ ନାତୁଣୀଙ୍କୁ ହରାଇ ଚନ୍ଦନଙ୍କ ମା’ ବାପା ଓ ୩ ସାନଭାଇଙ୍କ କାନ୍ଦବୋବାଳିରେ ପରିବେଶ ଶୋକାକୁଳ ହୋଇଛି।
ମିଳିଥିବା ସୂଚନା ମୁତାବକ ୪ବର୍ଷ ପୂର୍ବେ ଚନ୍ଦନ ସେହି ଥାନା ଅଧୀନ ମଞ୍ଜୁରୀ ଗ୍ରାମର ଲକ୍ଷ୍ମୀପ୍ରିୟାଙ୍କୁ ପ୍ରେମବିବାହ କରିଥିଲେ। ଚନ୍ଦନ ସୁରଟର ଏକ ସୂତା ମିଲ୍ରେ କାର୍ଯ୍ୟ କରୁଥିବାରୁ ବିବାହ ପରେ ସ୍ତ୍ରୀସ୍ବାମୀ ସେଠାରେ ରହୁଥିଲେ। ପ୍ରାୟ ୧ ମାସ ତଳେ କୌଣସି କାରଣରୁ ଲକ୍ଷ୍ମୀପ୍ରିୟା ସେଠାରେ ଆତ୍ମହତ୍ୟା କରିବା ପରେ ଚନ୍ଦନ ଶୁଦ୍ଧିକ୍ରିୟା ପାଇଁ ଗାଁକୁ ଆସିଥିଲେ। ଲକ୍ଷ୍ମୀପ୍ରିୟାଙ୍କ ମୃତ୍ୟୁ ପରେ ଚନ୍ଦନଙ୍କ ଶ୍ୱଶୁରଘର ପକ୍ଷରୁ ଝିଅ ତୃପ୍ତି ନାମରେ ବ୍ୟାଙ୍କରେ ୩ଲକ୍ଷ ଟଙ୍କା ଜମା ରଖିବାକୁ ଚାପ ପ୍ରୟୋଗ କରାଯାଇଥିଲା। ମାନସିକ ଚାପରେ ଥିବାବେଳେ ଚନ୍ଦନ ମା’ ବାପାଙ୍କ ସହ ଝିଅକୁ ନେଇ ପୁଣିଥରେ ସୁରଟ ଯାଇଥିଲେ। ସେଠାରେ କିଛିଦିନ ରହିବା ପରେ ନିକଟରେ ଗାଁକୁ ଫେରି ଆସିଥିଲେ। ଘରକୁ ଫେରିବାପରେ ଅସ୍ବାଭାବିକ ଜଣାପଡୁଥିଲେ ବୋଲି ପରିବାର ଓ ପଡ଼ୋଶୀଙ୍କଠାରୁ ଜାଣିବାକୁ ମିଳିଛି। ମାନସିକ ଭାରସାମ୍ୟ ହରାଇ ସେ ଏଭଳି ଚରମ ନିଷ୍ପତ୍ତି ନେଇଥିବା ଆଲୋଚନା ହେଉଥିବାବେଳେ ପ୍ରକୃତ କାରଣ ଅସ୍ପଷ୍ଟ ରହିଛି।