ବନ୍ତ,୧୯।୨: ଦେଖିବା ମାତ୍ରେ ପେନ୍ସିଲ୍, କଲମ ମାଧ୍ୟମରେ ଅବିକଳ ଛବି ଆଙ୍କି ଦିଅନ୍ତି। ୭୭ ବର୍ଷ ବୟସରେ ବି ସେ ତାଙ୍କର ଏହି କଳାକୁ ଜାରି ରଖିଛନ୍ତି। ନିଜର କଳା ନୈପୁଣ୍ୟ ଓ କାର୍ଯ୍ୟ କରିବାର ନିଶାକୁ ଛାଡ଼ିପାରି ନାହାନ୍ତି। ଏହାବ୍ୟତୀତ ପୁରପଲ୍ଲୀର ବିକାଶ ପାଇଁ କଳା, ସାହିତ୍ୟ, ସଂସ୍କୃତି ଓ ନାଟକ ମାଧ୍ୟମରେ ଆହ୍ବାନ ଦେଇଆସିଛନ୍ତି। ଯୁବପିଢ଼ିଙ୍କ ପାଇଁ ପ୍ରେରଣା ସାଜିଛନ୍ତି ଭଦ୍ରକ ଜିଲା ବନ୍ତ ବ୍ଲକ ଅଧୀନ ସେଣ୍ଢତୀରା ପଞ୍ଚାୟତ ମହାନ୍ତିଆ ଗ୍ରାମର ଚିତ୍ରଶିଳ୍ପୀ ନାରାୟଣ ଚନ୍ଦ୍ର ସେନାପତି।
ସେ କହନ୍ତି, ଚାଟଶାଳିରୁ ପାଠପଢ଼ା ଆରମ୍ଭ କରି ସେଣ୍ଢତୀରାସ୍ଥିତ ଜନାର୍ଦ୍ଦନ ଉଚ୍ଚ ବିଦ୍ୟାପୀଠରେ ଏକାଦଶ ଶ୍ରେଣୀ ପର୍ଯ୍ୟନ୍ତ ପଢ଼ିଛନ୍ତି। ପ୍ରାଥମିକ ଶିକ୍ଷା ସମୟରୁ ଚିତ୍ରକଳା, ହସ୍ତଶିଳ୍ପ, କୁଟୀର ଶିଳ୍ପ ପ୍ରତି ତାଙ୍କର ଆଗ୍ରହ ସୃଷ୍ଟି ହୋଇଥିଲା। ଗ୍ରାମାଞ୍ଚଳ ଓ ସହରାଞ୍ଚଳରେ ଶିଶୁ ପାଲାକାର ଭାବେ ସୁନାମ ଅର୍ଜନ କରିଥିଲେ। ସଙ୍ଗୀତ, ନାଟକରେ ଶିଶୁ ଅଭିନେତା ଓ ଏକକ ଅଭିନୟ କରି ଦର୍ଶକଙ୍କ ମନ ଜିଣି ପାରିଥିଲେ। ଆର୍ଟ ଓ ଡ୍ରାମା ପାଇଁ ୨୦୧୭ରେ ଗଣଶିକ୍ଷା ବିଭାଗର ଭଦ୍ରକ ସ୍ଥିତ ରାଇମ୍ସ ପବ୍ଲିକ ସ୍କୁଲ ମାଧ୍ୟମରେ ତାଙ୍କୁ ସମ୍ମାନିତ କରାଯାଇଥିଲା। ଓଡ଼ିଆ ଭାଷା ସାହିତ୍ୟର ବିଭିନ୍ନ ବିଭାଗରେ ଶିଶୁ କବିତା, ପ୍ରବନ୍ଧ, ଏକାଙ୍କିକା ରଚନା ସହିତ ଅଭିନୟ କରି ପ୍ରଶଂସା ସାଉଣ୍ଟିଛନ୍ତି। ବନ୍ତ ସ୍ଥିତ ଓଡ଼ିଶା ଅପେରା ଜରିଆରେ ରାଜ୍ୟ ଓ ରାଜ୍ୟ ବାହାରେ ଯାତ୍ରା ଜଗତକୁ ଆଧୁନିକୀକରଣ କରାଇ ସଫଳତା ଅର୍ଜନ କରିଛନ୍ତି। ଡାକ ବିଭାଗର ଚାକିରି ଛାଡ଼ି ୬୫ ବର୍ଷ ଧରି ସମାଜସେବା, କୃଷିର ଉନ୍ନତି, କ୍ରୀଡ଼ାର ବିକାଶ, ନାଟକ, ସାହିତ୍ୟ, ସଂସ୍କୃତି କ୍ଷେତ୍ରରେ କାର୍ଯ୍ୟ କରି ଆସୁଛନ୍ତି। ଏହାବାଦ୍ ଗ୍ରାମାଞ୍ଚଳ ଓ ସହରାଞ୍ଚଳରେ ଚାରଣ ଶିଳ୍ପୀ ଭାବେ ଝୋଟି, ମୁରୁଜ କଳାର ପ୍ରସାର ଲାଗି ମଧ୍ୟ କାର୍ଯ୍ୟ କରିଆସୁଛନ୍ତି। ସ୍ତ୍ରୀ, ୩ ପୁଅ, ଜଣେ ବୋହୂ ଓ ନାତିଙ୍କୁ ନେଇ ତାଙ୍କର ପରିବାର। ଜମିବାଡ଼ି କହିଲେ ସେଭଳି କିଛି ନାହିଁ। ସ୍ବଳ୍ପ ଜମିରେ ଚାଷ ଉପରେ ପରିବାର ନିର୍ଭରଶୀଳ। ରାଜ୍ୟ ସରକାର ତାଙ୍କୁ କେନ୍ଦ୍ର ସରକାରଙ୍କ ବର୍ଦ୍ଧିତ କଳାକାର ଭତ୍ତା ପ୍ରଦାନ କଲେ ପରିଣତ ବୟସରେ ନିଜର ଗୁଜୁରାଣ ମେଣ୍ଟାଇ ପାରନ୍ତେ ବୋଲି ସେ କହିଛନ୍ତି।