ମାଞ୍ଚେଷ୍ଟର, ୨୩।୭(ପି.ଟି.)- ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ତୃତୀୟ କ୍ରିକେଟ ଟେଷ୍ଟ ଶୁକ୍ରବାରଠାରୁ ଆରମ୍ଭ ହେବ। ୩ ମ୍ୟାଚ ବିଶିଷ୍ଟ ସିରିଜ ଏବେ ୧-୧ ସ୍ଥିତିରେ ରହିଛି। ଓ୍ବେଷ୍ଟଇଣ୍ଡିଜ ସାଉଥାମ୍ପଟନ ଟେଷ୍ଟ ଜିତିଥିବାବେଳେ ଇଂଲଣ୍ଡ ମାଞ୍ଚେଷ୍ଟରରେ ବିଜୟ ହାସଲ କରିଛି। ତେଣୁ ତୃତୀୟ ଟେଷ୍ଟରେ ସିରିଜ ନିର୍ଣ୍ଣୟ ହେବ। ଇଂଲଣ୍ଡ ପାଇଁ ଚଳିତ ସିରିଜରେ ସବୁଠାରୁ ପ୍ରଭାବୀ ପ୍ରଦର୍ଶନ କରିଥିବା ଅଲରାଉଣ୍ଡର ବେନ୍ ଷ୍ଟୋକ୍ସ ତୃତୀୟ ଟେଷ୍ଟରୁ ବାଦ୍ ପଡ଼ିପାରନ୍ତି। ରୋଟେଶନ ପଦ୍ଧତିରେ ଷ୍ଟୋକ୍ସଙ୍କୁ ସାମିଲ କରାଯିବା ଯୋଜନା ରହିଥିବା ସୂଚନା ଦେଇଛନ୍ତି କୋଚ୍ କ୍ରିସ୍ ସିଲଭରଉଡ୍। ଷ୍ଟୋକ୍ସ ଦ୍ୱିତୀୟ ଟେଷ୍ଟର ଦୁଇ ଇନିଂସରେ ଯଥାକ୍ରମେ ୧୭୬ ଓ ୭୮* ରନ କରିଥିବାବେଳେ ୩ଟି ଉଇକେଟ ହାସଲ କରିଥିଲେ। ଏହି ମ୍ୟାଚରେ ଇଂଲଣ୍ଡର ୧୧୩ ରନରେ ବିଜୟରେ ସେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ। ସାମ୍ପ୍ରତିକ ପ୍ରଦର୍ଶନ ତାଙ୍କୁ ଆଇସିସି ଅଲରାଉଣ୍ଡର ର଼୍ୟାଙ୍କିଙ୍ଗ୍ର ନମ୍ବରଓ୍ବାନ ସ୍ଥାନରେ ମଧ୍ୟ ପହଞ୍ଚାଇ ଦେଇଛି। ”ବର୍ତ୍ତମାନ ଷ୍ଟୋକ୍ସ କିପରି ପ୍ରଦର୍ଶନ କରୁଛନ୍ତି ତାହା ସମସ୍ତେ ଜାଣନ୍ତି। ମାତ୍ର ଆମେ ରୋଟେଶନ କଥା ଚିନ୍ତା କରୁଛୁ। ଗତ ମ୍ୟାଚ ଗୁଡ଼ିକରେ ସେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ସେ ଯଦି ସମ୍ପୂର୍ଣ୍ଣ ଫିଟ୍ ଓ ସୁସ୍ଥ ଥିବେ ତେବେ ଖେଳିବେ, ନଚେତ ଆମେ ରୋଟେଶନ କଥା ଚିନ୍ତା କରିବୁ“ ବୋଲି ସିଲଭରଉଡ୍ ପ୍ରକାଶ କରିଛନ୍ତି। ଓ୍ବେଷ୍ଟଇଣ୍ଡିଜ ବିପକ୍ଷ ୩ୟ ଟେଷ୍ଟ ପରେ ପାକିସ୍ତାନ ବିପକ୍ଷରେ ୩ ମ୍ୟାଚ ବିଶିଷ୍ଟ ସିରିଜ ଖେଳିବ ଇଂଲଣ୍ଡ। ଅଗଷ୍ଟ ୫ରୁ ଏହା ଆରମ୍ଭ ହେବ। ଇଂଲଣ୍ଡ ପ୍ରଥମ ଟେଷ୍ଟରେ ଜେମ୍ସ ଆଣ୍ଡରସନ, ଜୋଫ୍ରା ଆର୍ଚର ଓ ମାର୍କ ଉଡ୍ଙ୍କୁ ଖେଳାଇଥିବାବେଳେ ଦ୍ୱିତୀୟ ଟେଷ୍ଟ ପାଇଁ ଷ୍ଟୁଆର୍ଟ ବ୍ରଡ୍, କ୍ରିସ୍ ଓ୍ବକ୍ସ ଓ ସାମ୍ କୁରାନଙ୍କୁ ସାମିଲ କରିଥିଲା। ବର୍ତ୍ତମାନ ଦଳରେ ୬-୭ ଜଣ ଦ୍ରୁତ ବୋଲର ଥିବାରୁ ସିଲଭରଉଡ୍ ଚୟନ ଦ୍ୱନ୍ଦ୍ୱରେ ପଡ଼ିଛନ୍ତି। ତେବେ ତୃତୀୟ ଟେଷ୍ଟ ପାଇଁ ଯେପରି ବୋଲିଂ ଆକ୍ରମଣ ଶକ୍ତିଶାଳୀ ହୋଇପାରିବ ତା ଉପରେ ଧ୍ୟାନ ଦିଆଯିବ ବୋଲି କୋଚ୍ କହିଛନ୍ତି। ଆଶାନୁରୂପ ପ୍ରଦର୍ଶନ କରିପାରି ନ ଥିବା ସତ୍ତ୍ୱେ ସ୍ପିନର ଡୋମିନିକ୍ ବେସ୍ ଓ ଉଇକେଟ କିପର ଜୋସ୍ ବଟଲର ତୃତୀୟ ଟେଷ୍ଟ ପାଇଁ ସ୍ଥାନ ବଜାୟ ରଖିବେ ବୋଲି ସେ ସୂଚନା ଦେଇଛନ୍ତି।
