ଲଣ୍ଡନ, ୨୨।୭(ପି.ଟି.)- ଭାରତ ବିପକ୍ଷ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ପ୍ରଥମ ୨ଟି ମ୍ୟାଚ ପାଇଁ ବୁଧବାର ୧୭ ଜଣିଆ ଇଂଲଣ୍ଡ ଦଳ ଘୋଷଣା କରାଯାଇଛି। ତାରକା ଅଲ୍ରାଉଣ୍ଡର ବେନ୍ ଷ୍ଟୋକ୍ସ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ସେହିପରି ବର୍ଣ୍ଣବୈଷମ୍ୟ ସମ୍ପର୍କିତ ଟୁଇଟ୍ ପାଇଁ ୭ ବର୍ଷ ବାସନ୍ଦ ହୋଇଥିବା ଦ୍ରୁତ ବୋଲର ଓଲି ରବିନସନଙ୍କୁ ସାମିଲ କରାଯାଇଛି। ସେହିପରି ୫ ବର୍ଷ ପରେ ଓପନର ହସିବ ହମିଦ ଟେଷ୍ଟ ଦଳକୁ ଫେରିଛନ୍ତି। ଶେଷଥର ପାଇଁ ସେ ୨୦୧୬ରେ ଭାରତ ବିପକ୍ଷରେ ଖେଳିଥିଲେ। ପ୍ରଥମ ଟେଷ୍ଟ ନଟିଂହାମରେ ଅଗଷ୍ଟ ୪ରୁ ଆରମ୍ଭ ହେବ। ଦ୍ୱିତୀୟ ଟେଷ୍ଟ ଲଡର୍ସରେ ଅଗଷ୍ଟ ୧୨ରୁ ୧୬ ପର୍ଯ୍ୟନ୍ତ ଅନୁଷ୍ଠିତ ହେବ। ଆହତ ସମସ୍ୟାରେ ଥିବା ଜୋଫ୍ରା ଆର୍ଚର ଏବଂ କ୍ରିସ୍ ଓ୍ବକ୍ସ ମ୍ୟାଚ୍-ଫିଟ୍ ହୋଇ ନ ଥିବାରୁ ଦଳରେ ସ୍ଥାନ ପାଇନାହାନ୍ତି। ଦୁଇ ଭେଟେରାନ ଜେମ୍ସ ଆଣ୍ଡରସନ ଓ ଷ୍ଟୁଆର୍ଟ ବ୍ରଡ୍ଙ୍କ ସମେତ ଦ୍ରୁତ ବୋଲର ମାର୍କ ଉଡ୍ ଓ ସାମ୍ କୁରାନ ଅନ୍ୟତମ ଫାଷ୍ଟ ବୋଲରଭାବେ ଲାଇନ୍-ଅପ୍ରେ ରହିଛନ୍ତି। ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜରେ ବିଶ୍ରାମ ନେଇଥିବା ଉଇକେଟ କିପର ବ୍ୟାଟ୍ସମ୍ୟାନ ଜନି ବେୟାରଷ୍ଟୋ ଓ ଜେସ୍ ବଟଲର ଅଧିନାୟକ ଜୋ ରୁଟ୍ଙ୍କ ଦଳକୁ ଫେରିଛନ୍ତି। ରୋରି ବନର୍ସ, ଓଲି ପୋପ୍, ଜ୍ୟାକ କ୍ରଲି, ଡମ୍ ସିବଲେ ଓ ଡାନ୍ ଲରେନ୍ସ ଇଂଲଣ୍ଡ ବ୍ୟାଟିଂ ୟୁନିଟର ଅନ୍ୟତମ ସଦସ୍ୟ। ୨୪ ବର୍ଷୀୟ ଲରେନ୍ସ ଏବଂ ଲଙ୍କାଶାୟାର ଓପନର ହମିଦ ବର୍ତ୍ତମାନ ଡରହାମରେ ଭାରତ ବିପକ୍ଷରେ ଓ୍ବାର୍ମଅପ୍ ମ୍ୟାଚ ଖେଳୁଛନ୍ତି।
ଇଂଲଣ୍ଡ ଦଳ: ଜୋ ରୁଟ୍ (ଅଧିନାୟକ), ଜେମ୍ସ ଆଣ୍ଡରସନ, ବେନ୍ ଷ୍ଟୋକ୍ସ, ଜନି ବେୟାରଷ୍ଟୋ, ଡମ୍ ବେସ୍, ଷ୍ଟୁଆର୍ଟ ବ୍ରଡ୍, ରୋରି ବନର୍ସ, ଜୋସ ବଟଲର, ଜ୍ୟାକ କ୍ରଲି, ସାମ୍ କୁରାନ, ହସିବ ହମିଦ, ଡାନ୍ ଲରେନ୍ସ, ଜ୍ୟାକ ଲିଚ୍, ଓଲି ପୋପ୍, ଓଲି ରବିନସନ, ଡମ୍ ସିବ୍ଲେ, ମାର୍କ ଉଡ୍।