ଖୋର୍ଦ୍ଧା ଅଫିସ,୧୩ା୬: ଜଟଣୀ ଥାନା ଅଧୀନ ବଡ଼ତୋଟା ଭୋଇସାହିର ଅଶୋକ ଭଣ୍ଡଙ୍କ ବାଇକ୍ ମେ ମାସରେ ଚୋରି ହୋଇଯାଇଥିଲା। ଏନେଇ ସେ ଥାନାରେ ଲିଖିତ ଅଭିଯୋଗ କରିଥିଲେ। ଏଯାବତ ତାଙ୍କ ଚୋରି ବାଇକ୍ ମିଳି ନ ଥିବାବେଳେ ଗତ ୭ତାରିଖରେ ଟ୍ରାଫିକ ପୋଲିସରୁ ତାଙ୍କ ମୋବାଇଲ ଫୋନକୁ ମେସେଜ ଆସିଛି। ଆପଣ ବିନା ହେଲମେଟ୍ରେ ରାଜଧାନୀରେ ବୁଲୁଥିବାରୁ ୧ହଜାର ଟଙ୍କା ଜରିମାନା ଭରିବାକୁ ଏହି ମେସେଜ୍ରେ ଉଲ୍ଲେଖ ରହିଛି।
ଛକରେ ଅଶୋକ ଏକ ପାନ ଦୋକାନ ଦେଇଛନ୍ତି। ବହୁ କଷ୍ଟରେ ବାଇକ ଖଣ୍ଡେ କରିଥିଲେ। ସେ ଗତ ମେ ୨୫ରେ ଗାଁରେ ହେଉଥିବା ଚନ୍ଦନଯାତ୍ରା ଦେଖିବା ଲାଗି ହୋଣ୍ଡା ସାଇନ ବାଇକ୍ (ନଂ. ଓଡି୩୩-ଏବି-୭୯୪୩) ଧରି ଯାଇଥିଲେ। ସେଠାରୁ ଫେରିବା ବେଳକୁ ତାଙ୍କ ବାଇକ ନ ପାଇ ଥାନାରେ ଲିଖିତ ଅଭିଯୋଗ କରିଥିଲେ। ଜଣେ ଗରିବ ପରିବାରର ହୋଇଥିବାରୁ ବାଇକ ଫେରି ପାଇବା ଲାଗି ଥାନାକୁ ବାରମ୍ବାର ଦୌଡୁଛନ୍ତି। ଏପର୍ଯ୍ୟନ୍ତ ବାଇକ୍ ମିଳି ନ ଥିବାବେଳେ ତଦନ୍ତ ଚାଲିଥିବା କହି ପୋଲିସ ଫେରାଉଛି। ଅନ୍ୟପକ୍ଷରେ ଜୁଲାଇ ୭ରେ ଭୁବନେଶ୍ୱର କମିଶନରେଟ ଟ୍ରାଫିକ ପୋଲିସ ପକ୍ଷରୁ ତାଙ୍କ ମୋବାଇଲ ନମ୍ବରକୁ ଏକ ମେସେଜ ଆସିଛି। ଭୁବନେଶ୍ୱର ରାଜମହଲରେ ଛକରେ ବିନା ହେଲ୍ମେଟରେ ଯାତ୍ରା କରୁଥିବାରୁ ତାଙ୍କୁ ଏକ ହଜାର ଟଙ୍କା ଜରିମାନା କରାଯାଇଥିବା ମେସେଜରେ ଉଲ୍ଲେଖ ରହିଛି। ଏହାଦେଖି ଅଶୋକ ଚିନ୍ତାରେ ପଡ଼ିଛନ୍ତି। ବାଇକ ଫେରିପାଇବାକୁ ସେ ଥାନାକୁ ଦୌଡ଼ୁଥିବାବେଳେ ଭୁୁବନେଶ୍ୱରରେ କିପରି ସେହି ବାଇକ୍ ଧରି ବିନା ହେଲମେଟ୍ରେ ବୁଲୁଥିଲେ ତାହା ପ୍ରଶ୍ନବାଚୀ ହୋଇଛି। ମେସେଜ ପାଇବା ପରେ ସେ ଥାନାକୁ ଜଣାଇଥିବା କହିଛନ୍ତି। ତେବେ ପ୍ରଶ୍ନ ଉଠୁଛି, ରାଜଧାନୀରେ ଚୋରା ବାଇକ ବୁଲୁଥିବା ବେଳେ ପୋଲିସ କିପରି କିଛି ଜାଣିପାରୁନି ତାହା କମିଶନରେଟ ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଯଦି ତାଙ୍କ ବାଇକ୍ ଧରି କେହି ବୁଲୁଥାଏ ଏବଂ ସମ୍ପୃକ୍ତ ବ୍ୟକ୍ତି କୌଣସି ଆପରାଧିକ ମାମଲାରେ ଜଡ଼ିତ ହୁଅନ୍ତି, ତେବେ ସେଥିଲାଗି କିଏ ଦାୟୀ ହେବେ ବୋଲି ସେ ପ୍ରଶ୍ନ କରିଛନ୍ତି। କେହି ତାଙ୍କ ଚୋରି ବାଇକ ଧରି ଭୁବନେଶ୍ୱରରେ ବୁଲୁଥିବା ନେଇ ଥାନାରେ ଅଭିଯୋଗ ସତ୍ତ୍ୱେ ପୋଲିସ ଚୁପ୍ ବସିଛି। ଅନ୍ୟପକ୍ଷରେ ଏନେଇ ଜଟଣୀ ଥାନା ଅଧିକାରୀ ଦୟାନିଧି ନାୟକ କହିଛନ୍ତି, ତାଙ୍କ ଅଭିଯୋଗ ପାଇବା ପରେ ତଦନ୍ତ ଆରମ୍ଭ ହୋଇଛି। ଏନେଇ ଭୁବନେଶ୍ୱର କମିଶନରେଟର ବିଭିନ୍ନ ଥାନା ସହ ଯୋଗାଯୋଗ କରାଯାଇଛି।