ଗୋପାଳପୁର,୨୮ା୧(ଡି.ଏନ.ଏ.): ଗତ ମାସରେ ଘରେ ପଶି ଦୁର୍ବୃତ୍ତମାନେ ସୁନା ଅଳଙ୍କାର ଓ ଲକ୍ଷାଧିକ ଟଙ୍କା ଚୋରି କରିବା ଘଟଣାରେ ଗୋଳନ୍ଥରା ପୋଲିସ ଚୋରି ସୁନା କ୍ରେତା ସମେତ ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ବଡ ବଜ଼ାର ଥାନା ଅନ୍ତର୍ଗତ ସୁକୁଣ୍ଡା ଗ୍ରାମର କେ ରାଜେଶ, ପାଟପୁର ଥାନା ଅନ୍ତର୍ଗତ ଡେଙ୍ଗାଳିଆ ଗ୍ରାମ ଜିତୁ ପାତ୍ର, ଭୁବେନେଶ୍ୱର ନୀଳାଦ୍ରି ବିହାର ଅଞ୍ଚଳର ସୁଜାନ ପ୍ରଧାନ, ଦିଗପହଣ୍ଡି ଥାନା ଅନ୍ତର୍ଗତ କଇଠଖଣ୍ଡି ଗ୍ରାମର ମିଥୁନ ନାୟକ ଓ କ୍ରେତା ଆସ୍କା ଅଞ୍ଚଳର ଏ ବାବୁ ଆଚାରୀ। ଏମାନଙ୍କ ଠାରୁ ଚୋରି ହୋଇଥିବା ସୁନା ଅଳଙ୍କାର ଜବତ ହୋଇଥିବା ନେଇ ପୋଲିସ ପ୍ରେସ ରିଲିଜରେ ସୂଚନା ଦେଇଛି।
ସୂଚନାନୁସାରେ, ଗୋଳନ୍ଥରା ଗାଁ ତଳସାହିରେ ଡିସେମ୍ବର ୨୨ ରାତିରେ କାଳୁ ପ୍ରଧାନଙ୍କ ଘରେ ବାରି କବାଟ ତାଡି ଘରେ ପଶି ଦୁର୍ବୁତ୍ତମାନେ ନଗଦ ୧୦ଲକ୍ଷ ଟଙ୍କା ସହ ୨୦ତୋଳା ସୁନା ଓ ରୁପା ଅଳଙ୍କାର ଲୁଟି ନେଇଥିବା ଥାନାରେ ଲିଖିତ ଅଭିଯୋଗ ହୋଇଥିଲା। ଅଭିଯୁକ୍ତ ମାନଙ୍କୁ ଧରିବା ପାଇଁ ଥାନାଧିକାରୀ ବିବେକାନନ୍ଦ ମହନ୍ତଙ୍କ ନେତୃତ୍ୱରେ ଏକ ଟିମ ଗଠନ ହୋଇଥିଲା। ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତମାନଙ୍କୁ ଗିରଫ କରି ପଚରାଉଚରା କରିଥିଲା। କିଛି ଚୋରି ସୁନା ଅଳଙ୍କାର ଆସିକାର ବାବୁ ଆଚାରୀଙ୍କୁ ବିକ୍ରି କରିଥିବା ସହ ଅନ୍ୟ ସୁନା ଅଳଙ୍କାର ତରଳେଇ ବାହାର ରାଜ୍ୟରେ ବିକ୍ରି କରିଥିବା ନେଇ ପୋଲିସ ନିକଟରେ ପ୍ରକାଶ କରିଥିଲେ। ପରେ ପୋଲିସ ବାବୁ ଘରେ ଚଢ଼ାଉ କରି ତାଙ୍କ ଠାରୁ ୧୬୨ ଗ୍ରାମ ସୁନା ଅଳଙ୍କାର ଜବତ କରିଥିଲା।
