ଚୋରାକାଠ କାରଖାନା ଠାବ: ଆସବାବପତ୍ର ଜବତ, ଅଭିଯୁକ୍ତ ଗିରଫ

ବଡ଼ବିଲ,୯।୩(ଦେବପ୍ରିୟ ରଣା): କେନ୍ଦୁଝର ଜିଲା ବଡ଼ବିଲ ବନାଞ୍ଚଳ ଅଧୀନ ବଲାଣିଠାରେ ୨୦ରୁ ଊର୍ଦ୍ଧ୍ୱ ବର୍ଷ ଧରି ଚାଲିଥିବା ଏକ ବେଆଇନ କାଠ କାରଖାନାକୁ ବନ ବିଭାଗ ରବିବାର ଠାବ କରିଛି। ଏପରିକି କାରଖାନାରୁ ୫ଲକ୍ଷ ଟଙ୍କାର ଚୋରାକାଠ ଏବଂ ଆସବାବପତ୍ର ଜବତ କରାଯାଇଛି। ଘଟଣାରେ ସମ୍ପୃକ୍ତ ଜଣେ ଅଭିଯୁକ୍ତଙ୍କୁ ବନ ବିଭାଗ ଗିରଫ କରିଛି। ସେ ହେଲେ ବଲାଣି ଶାନ୍ତିନଗରସ୍ଥିତ ବିର୍ସା ହଟିଂରେ ରହୁଥିବା ସୁକାନ୍ତ ମହାରଣା।

ମିଳିଥିବା ସୂଚନା ମୁତାବକ, ବଲାଣିସ୍ଥିତ ଶାନ୍ତିନଗରରେ ୨୦ରୁ ଊର୍ଦ୍ଧ୍ୱ ବର୍ଷ ଧରି ବେଆଇନ ଭାବେ ଏକ କାଠ କାରଖାନା ଚାଲିଥିବା ବନବିଭାଗକୁ ଏକ ବିଶ୍ୱସ୍ତ ସୂତ୍ରରୁ ଖବର ମିଳିଥିଲା। ଏନେଇ ବନ କର୍ମଚାରୀ ରବିବାର ଚଢାଉ କରି ସେହି କାରଖାନାକୁ ଠାବ କରିଥିଲା। ଚଢାଉ ବେଳେ ଅଧିକାରୀମାନେ କାରଖାନାରୁ ୪ରୁ ୫ ଲକ୍ଷ ଟଙ୍କାର ବହୁ ମୂଲ୍ୟବାନ ଶାଗୁଆନ, ଶାଳ, ପିଆଶାଳ ଓ କୁରୁମ କାଠଗଣ୍ଡି, ପଟା ଜବତ କରିଥିଲେ। ଏପରି କି ବିଭିନ୍ନ କାଠରେ ନିର୍ମିତ ଆସବାବପତ୍ର ସହ ମେଶିନ ଆଦି ଜବତ କରାଯାଇଛି।

ଜବତ କାଠ ଏବଂ ମେଶିନକୁ ବଡବିଲ ବନାଞ୍ଚଳ କାର୍ଯ୍ୟାଳୟକୁ ଅଣାଯାଇଥିବା ଜଣାପଡିଛି। କାଠର ଅନୁମାନିକ ମୂଲ୍ୟ ପ୍ରାୟ ୪ରୁ ୫ଲକ୍ଷ ଟଙ୍କା ହେବ ବୋଲି ବନ ବିଭାଗ ପକ୍ଷରୁ କୁହାଯାଇଛି।

କେନ୍ଦୁଝର ଡିଏଫ୍‌ଓଙ୍କ ନିର୍ଦ୍ଦେଶରେ ଏହି ଚଢାଉ ହୋଇଥିବା ବନାଞ୍ଚଳ ଅଧିକାରୀ ଶିବ କୁମାର ରାଉତ କହିଛନ୍ତି। ଘଟଣାସ୍ଥଳରୁ କାଠ କାରଖାନା ମାଲିକ ତଥା ମୁଖ୍ୟ ଅଭିଯୁକ୍ତ ସୁକାନ୍ତଙ୍କୁ ଗିରଫ କରାଯାଇଛି।

ସୁକାନ୍ତଙ୍କଠାରୁ କାଠ କାଟିବା ପାଇଁ ବ୍ୟବହୃତ ବିଭିନ୍ନ ସରଞ୍ଜାମ ଓ ନଥିପତ୍ର ଜବତ କରାଯାଇଛି। ଚଢ଼ାଉ ବେଳେ ଅନ୍ୟ କେତେକ ଅଭିଯୁକ୍ତ ଫେରାର ହୋଇଯାଇଥିବା ଜଣାପଡିଛି। ବନାଞ୍ଚଳ ଅଧିକାରୀ କହିଛନ୍ତି, ଏହି କାରବାର ଦୀର୍ଘ ବର୍ଷ ଧରି ଚାଲିଥିଲା ଏବଂ ବଲାଣି, କିରିବୁରୁ, ସାନ୍ତବାହାଳ, ଉଲିବୁରୁ, ଗୁଆଲି ଓ ଝାଡଖଣ୍ଡରୁ ଏହି କାରଖାନାକୁ କାଠ ଯୋଗାଣ ହେଉଥିବା ସନ୍ଦେହ କରାଯାଇଛି।