ଆଇଜଲ,୧୪।୧୧: ମିଜୋରାମର ନହଥିଆଲରେ ଥିବା ଏକ ପଥର ଖଣି ସୋମବାର ଭୁଶୁଡ଼ି ପଡିଛି। ଫଳରେ ସେଠାରେ କାମ କରୁଥିବା ଅନେକ ଶ୍ରମିକ ଫସି ରହିଥିବା ଆଶଙ୍କା କରାଯାଉଛି। ସୂଚନାନୁସାରେ, ନହଥିଆଲ ଜିଲାର ମାଦରାହଠାରେ ଥିବା ଏବିସିଆଇ ଇନ୍ଫ୍ରାଷ୍ଟ୍ରକଚର ପ୍ରାଇଭେଟ୍ ଲିମିଟେଡଠାରେ କାମ କରୁଥିବା ଶ୍ରମିକମାନେ ମଧ୍ୟାହ୍ନ ଭୋଜନ ସାରି ଫେରୁଥିବା ବେଳେ ପଥର ଖଣିଟି ଭୁଶୁଡି ପଡିଥିଲା। ଯାହା ଫଳରେ ୧୦ରୁ ଅଧିକ କର୍ମଚାରୀ ଏବଂ ଡ୍ରିଲିଂ ମେଶିନ ଖଣିରେ ପୋତି ହୋଇଯାଇଥିଲା। ନିକଟସ୍ଥ ଲୋକମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଏହାସହ ଉଦ୍ଧାର କାର୍ଯ୍ୟରେ ସହାୟତା କରିବାକୁ ରାଜ୍ୟ ବିପର୍ଯ୍ୟୟ ମୁକାବିଲା ଫୋର୍ସ, ବିଏସ୍ଏଫ୍ ଏବଂ ଆସାମ ରାଇଫଲ୍ସକୁ ମଧ୍ୟ ଡକାଯାଇଛି।