ପାଟଣା,୨୪ା୪(ସ୍ବ.ପ୍ର.): ସମ୍ବଲପୁର ସହରରେ ହନୁମାନ ଜୟନ୍ତୀ ସମନ୍ବୟ ସମିତି ତରଫରୁ ଅପ୍ରେଲ ୧୨ରେ ହୋଇଥିବା ବାଇକ୍ ରାଲି ଓ ଅପ୍ରେଲ ୧୪ରେ ସମ୍ବଲପୁରରେ ହନୁମାନ ଜୟନ୍ତୀ ଅବସରରେ ହିନ୍ଦୁମାନଙ୍କ ଉପରେ ସଂଖ୍ୟା ଲଘୁ ସମ୍ପ୍ରଦାୟର ମାରଣାସ୍ତ୍ର୍ରେ ଆକ୍ରମଣ ଓ ଦଙ୍ଗା ସୃଷ୍ଟିକାରୀଙ୍କ ବିରୋଧରେ ଆଇନଗତ କାର୍ଯ୍ୟନୁଷ୍ଠାନ ଦାବି କରାଯାଇଛି। ଏନେଇ ସୋମବାର କେନ୍ଦୁଝର ଜିଲା ପାଟଣା ବ୍ଲକ ହିନ୍ଦୁସୁରକ୍ଷା ମଞ୍ଚ ତରଫରୁ ଏକ ବିରାଟ ରାଲି ପାଟଣା ମୁଖ୍ୟାଳୟ ସରସ୍ବତୀ ଶିଶୁମନ୍ଦିରରୁ ବାହାରିଥିଲା। ଏହି ଶୋଭାଯାତ୍ରା ବଜାର ପରିକ୍ରମା କରିବା ପରେ ବ୍ଲକ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ସାମବେଶ ଅନୁଷ୍ଠିତ ହୋଇଥିଲା। ଏଥିରେ ହିନ୍ଦୁବାଦୀ ନେତାମାନେ ହିନ୍ଦୁମାନଙ୍କୁ ଙ୍କୁ ସୁରକ୍ଷା ଯୋଗାଇ ଦେବାରେ ରାଜ୍ୟ ସରକାର ବିଫଳ ହୋଇଛନ୍ତି ବୋଲି କହିଥିଲେ। ଏହାପରେ ଏକ ପ୍ରତିନିଧି ମଣ୍ଡଳୀ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ପାଟଣା ବିଡିଓ ଶିବଶଙ୍କର ମୁର୍ମୁଙ୍କୁ ଦାବିପତ୍ର ପ୍ରଦାନ କରିଛନ୍ତି। ହିନ୍ଦୁସୁରକ୍ଷା ମଞ୍ଚର ପ୍ରଦୀପ କୁମାର ମହାନ୍ତ, ବିରଞ୍ଚି ମହାନ୍ତ, ଦୁର୍ଗାଚରଣ ନାଏକ, ଲମ୍ବୋଦର ମହାନ୍ତ, ଆର୍ଏସ୍ଏସ୍ର ମୋଚି ରାମ ସାହୁ, ପ୍ରଫୁଲ କୁମାର ମହାନ୍ତ, ବିଶ୍ବହିନ୍ଦୁ ରିଷଦ ପୂର୍ବ ପ୍ରାନ୍ତ କାର୍ଯ୍ୟ କାରିଣି ସଦସ୍ୟ ଅଖିଳ ଚନ୍ଦ୍ର ନାୟକ, ଭାଜପା ଆଦିବାସୀ ମୋର୍ଚ୍ଚା ରାଜ୍ୟ କାର୍ଯ୍ୟ କାରିଣୀ ସଭ୍ୟ ସତ୍ୟବ୍ରତ ନାଏକ, ଭାଜପା ଯୁବମୋର୍ଚ୍ଚା ସାଧାରଣ ସମ୍ପାଦକ ସବୀର ଦାଶ, ବରିଷ୍ଠ ଭାଜପା ନେତା ପ୍ରହଲ୍ଲାଦ ପଲେଇ, ଶଶିଭୂଷଣ ମହାନ୍ତ,ରଜନୀକାନ୍ତ ମିଶ୍ର,କୃଷ୍ଣଚନ୍ଦ୍ର ମହାନ୍ତଙ୍କ ସମେତ ଶତାଧିକ ହିନ୍ଦୁବାଦୀ ନେତା ସାମିଲ ହୋଇଥିଲେ।