କୋରାପୁଟ,୫।୧୨(ଅମିତାଭ ବେହେରା): ଆନ୍ଧ୍ରପ୍ରଦେଶର ବିଶାଖାପାଟଣାରୁ ଛତିଶଗଡ଼ ରାଜ୍ୟର କିରାଣ୍ଡୁଲ ପର୍ଯ୍ୟନ୍ତ ଲମ୍ବିଥିବା କେକେ ରେଳପଥ ଆନ୍ଧ୍ରର ଆରକୁ ଅଞ୍ଚଳର ତ୍ୟାଡା ଓ ଶିବଲିଙ୍ଗପୁରମ ରେଳଷ୍ଟେଶନ ମଧ୍ୟରେ ପ୍ରବଳ ବର୍ଷା ଯୋଗୁ ମଙ୍ଗଳବାର ସଂଧ୍ୟାରେ ରେଳ ଧାରଣା ଉପରକୁ ପାହାଡ଼ରୁ ପଥର ଖସି ଆସିଛି । ସେଇ ସମୟରେ ଟ୍ରାକ ଦେଇ ଏକ ମାଲବାହୀ ଟ୍ରେନ ଆସୁଥିବା ବେଳେ ଟ୍ରେନ ଉପରକୁ ପଥର ଖସିଥିଲା l ଏହି ଦୁର୍ଘଟଣାରେ କାହାରି କିଛି କ୍ଷତି ହୋଇ ନ ଥିବା ବେଳେ କିରାଣ୍ଡୁଲ ଓ ବିଶାଖାପାଟଣା ମଧ୍ୟରେ ରେଳ ଚଳାଚଳ ବାଧାପ୍ରାପ୍ତ ହୋଇଛି । ରେଳ ବିଭାଗ ଦ୍ୱାରା ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ ଏହି ରୁଟଦ୍ରେ ଚଳାଚଳ କରୁଥିବା ୪ଟି ଟ୍ରେନକୁ ବାତିଲ କରାଯାଇଛି l ଆଜି ବିଶାଖାପାଟଣାରୁ କିରାଣ୍ଡୁଲକୁ ଆସୁଥିବା ରାତ୍ର ଏକ୍ସପ୍ରେସକୁ ଆରକୁ ପରିବର୍ତ୍ତେ ରାୟଗଡ଼ା ବାଟ ଦେଇ ଚଳାଚଳ କରାଯାଉଥିବା ବେଳେ ଆରକୁ ଦେଇ ବିଶାଖାପାଟଣା ଓ ଜଗଦଲପୁରକୁ ଯାଉଥିବା ବାକି ସମସ୍ତ ଟ୍ରେନକୁ ଆଜି ଓ କାଲି ପାଇଁ ବାତିଲ କରିଦିଆଯାଇଛି।
ସୂଚନାଯୋଗ୍ୟ, ବାତ୍ୟା ମିଗଜୋମ ପ୍ରଭାବରେ ମଙ୍ଗଳବାର ପୂର୍ବାହ୍ନରୁ କୋରାପୁଟ ଜିଲାରେ ପ୍ରବଳ ବର୍ଷା ଜାରି ରହିଛି। ଯଦିଓ ସେତେଟା ପବନ ନାହିଁ ହେଲେ ସକାଳ ୮ଟା ସୁଦ୍ଧା ଜିଲାରେ ୧୧୫.୬ ମିମି ବର୍ଷା ହୋଇଛି। ସେହିପରି ଅପରାହ୍ନଣ ୫ଟା ସୁଦ୍ଧା ଜିଲାରେ ୧୭୩.୬ମିମି ବର୍ଷା ରେକର୍ଡ ହୋଇଥିବା ଜିଲା ଜରୁରୀ ଅଧିକାରୀ ଜ୍ଞାନଜିତ ତ୍ରିପାଠୀ କହିଛନ୍ତି। ଜିଲାର ପଟ୍ଟାଙ୍ଗି ଅଞ୍ଚଳରେ ୫୦ମିମିରୁ ଉର୍ଦ୍ଧ ବର୍ଷା ହୋଇଥିବା ବିଭାଗ ପକ୍ଷରୁ ଜଣାପଡିଛି। ଖବର ଲେଖାଯିବା ପର୍ଯ୍ୟନ୍ତ କୋରାପୁଟ ସହରରେ ପ୍ରବଳ ବର୍ଷା ଜାରିି ରହିଛି.