ବାଲେଶ୍ୱର ଜିଲା ଚାନ୍ଦିପୁର ଗ୍ରାମର ମା’ ମମତା ଏବଂ ବାପା କୃଷ୍ଣ କୁମାର ମହାନ୍ତିଙ୍କ କନ୍ୟା ପ୍ରତ୍ୟାଶା ପ୍ରିୟମ୍ବଦା। ନୃତ୍ୟ କରିବାକୁ ପିଲାଟିଦିନୁ ତାଙ୍କର ରୁଚି ରହିଆସିଛି। ଚତୁର୍ଥ ଶ୍ରେଣୀରେ ପଢ଼ିବା ବେଳେ ବିଦ୍ୟାଳୟରେ ଆୟୋଜିତ ସାଂସ୍କୃତିକ କାର୍ଯ୍ୟକ୍ରମରେ ପ୍ରଥମ ଥର ନୃତ୍ୟ ଓ ଅଭିନୟ ପରିବେଷଣ କରିଥିଲେ। ଏହା ପରେ ସେ ଦୁଇ ବର୍ଷ ଓଡ଼ିଶୀ ନୃତ୍ୟ ଶିକ୍ଷା ଗ୍ରହଣ କଲେ। ପରେ ସ୍କୁଲ ପରିବର୍ତ୍ତନ ଏବଂ ଅନ୍ୟାନ୍ୟ କାରଣରୁ ସେ ଦୀର୍ଘଦିନ ନିଜ ରୁଚିଠାରୁ ଦୂରେଇ ରହିଥିଲେ। କ୍ଷୁଦ୍ର ଚଳଚ୍ଚିତ୍ର ନିର୍ମାତା ତଥା ସାମ୍ବାଦିକ ରୁଦ୍ରରଂଜନ ଶେଜପଡ଼ାଙ୍କ ଏକ ଡକ୍ୟୁମେଣ୍ଟାରୀ ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରିବା ପାଇଁ ସୁଯୋଗ ପାଇଲେ। ଯେଉଁଥିରେ ବିନା ଡାଇଗଲ୍ରେ କେବଳ ଅଭିନୟ ଦ୍ୱାରା ସମାଜକୁ ମୃତ୍ତିକା ସଂରକ୍ଷଣ ଉପରେ ବାର୍ତ୍ତା ଦେଇ ସେ ଦର୍ଶକଙ୍କ ମନ ଜିଣି ପାରିଥିଲେ। ଏହା ଅନ୍ତର୍ଜାତୀୟ ଚଳଚ୍ଚିତ୍ର ଉତ୍ସବ ଦି ଇଣ୍ଡିଆନ୍ ଫିଲ୍ମ ଫେଷ୍ଟିଭାଲ୍ର ପ୍ରତିଯୋଗିତା ପର୍ଯ୍ୟାୟକୁ ମନୋନୀତ ହୋଇ ଚର୍ଚ୍ଚାରେ ରହିଛି। ସାମ୍ବାଦିକତା କରୁଥିବା ପ୍ରତ୍ୟାଶାଙ୍କର ଗପ ରଚନାରେ ରୁଚି ରହିଛି। ତାଙ୍କର ଗଳ୍ପ ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇ ଆଦୃତ ହୋଇଥିବା ବେଳେ ଗଳ୍ପ ରଚନା ପାଇଁ ପୁରସ୍କାର ମଧ୍ୟ ପାଇଛନ୍ତି। ବର୍ତ୍ତମାନ ସୁଦ୍ଧା ତାଙ୍କୁ ମିଳିଛି ବାଲେଶ୍ୱର ପରୀ-୨୦୧୯ ସମ୍ମାନ, କ୍ଷୁଦ୍ର ଗଳ୍ପ ପାଇଁ ଉଦୟ ରାଗ ସମ୍ମାନ-୨୦୧୯। ଏହାବ୍ୟତୀତ ତାଙ୍କ ଅଭିନୀତ କ୍ଷୁଦ୍ର ଚଳଚ୍ଚିତ୍ର ‘ଫୁଲ୍’ ଦୁଇଥର ପୁରସ୍କୃତ ହୋଇସାରିଛି।