ନୂଆଦିଲ୍ଲୀ, ୧୦।୪: ଭାରତୀୟ କ୍ରିକେଟର ‘ ଦି ୱାଲ’ ଭାବେ ଜଣାଶୁଣା ରାହୁଲ ଦ୍ରାବିଡ୍ ସ୍ବଭାବରେ ବହୁତ ଶାନ୍ତ। କିନ୍ତୁ ସୋସିଆଲ ମିଡିଆରେ ତାଙ୍କର ଏକ ନୂଆ ଭିଡିଓ ଭାଇରାଲ ହେବାରେ ଲାଗିଛି। ଯେଉଁଥିରେ ରାହୁଲଙ୍କୁ ଖୁବ୍ ରାଗୁଥିବାର ଦେଖିବାକୁ ମିଳିଛି। ଯାହାକୁ ପ୍ରଶଂସକମାନେ ଆଦୌ ହେଲେ ବିଶ୍ୱାସ ମଧ୍ୟ କରିପାରୁ ନାହାନ୍ତି।
ଭିଡିଓରେ ଡ୍ରାଭିଡଙ୍କ ରାଗ ରୂପ ଦେଖିବାକୁ ମିଳୁଛି। ସେ ଏତେ ରାଗିଯାଇଛନ୍ତି ଯେ ନିଜ ବ୍ୟାଟରେ କାରର ସାଇଡ୍ ମିରରକୁ ଭାଙ୍ଗି ଦେଉଛନ୍ତି। ତେବେ ଆଶ୍ଚର୍ଯ୍ୟ ହେବାର ନାହିଁ, କାରଣ ଦ୍ରାବିଡ୍ଙ୍କର ଏହା ଏକ ବିଜ୍ଞାପନର ଭିଡିଓ। ଏହି ବିଜ୍ଞାପନକୁ ନେଇ ବହୁତ ଚର୍ଚ୍ଚା ମଧ୍ୟ ହେଉଛି। ଅଧିନାୟକ ବିରାଟ କୋହଲି ନିଜେ ଏହି ଭିଡିଓକୁ ଶେୟାର୍ କରିଛନ୍ତି। ଭିଡିଓ ଶେଆର୍ କରି ସେ ଲେଖିଛନ୍ତି, ରାହୁଲ ଭାଇଙ୍କର ଏହି ଅନ୍ଦାଜ ମୁଁ କେବେ ଦେଖିନାହିଁ। ଏଥିସହ କୋହଲି ଏକ ହସୁଥିବାର ଇମୋଜୀ ଶେୟାର୍ କରିଛନ୍ତି।