ଭଳିକିଭଳି ଅଜବ ଫ୍ୟାଶନ୍ ଆପଣେଇବାରେ ଯୁବପିଢ଼ି ସବୁବେଳେ ଆଗରେ। ଯେଉଁଥିରୁ ବାଦ୍ପଡ଼ିନି ବ୍ୟାଗ୍। ଜାଣିବା କେତୋଟି ଅଜବ ବ୍ୟାଗ୍ ସମ୍ପର୍କରେ…
ଲିଜାର୍ଡ ଏବଂ ଫ୍ରଗ୍ ବ୍ୟାଗ୍: ଯୁବତୀ ହୁଅନ୍ତୁ ଅବା ଯୁବକ, ଭଳିକିଭଳି ପୋଷାକ ସହିତ ନୂଆ ଡିଜାନର ବ୍ୟାଗ୍ ଧରିବାର ସଉକ ପ୍ରାୟ ଅନେକଙ୍କର ରହିଛି। ତେବେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ, ବର୍ତ୍ତମାନ ଲେଦରରେ ପ୍ରସ୍ତୁତ ଲିଜାର୍ଡ ବା ଝିଟିପିଟି ଏବଂ ବେଙ୍ଗ ଆକୃତିର ବ୍ୟାଗ୍ ବି କେହି କେହି ବ୍ୟବହାର କରୁଛନ୍ତି। ତେବେ ଏଗୁଡ଼ିକୁ ଦେଖିଲେ ଜୀବନ୍ତ ଲାଗୁଥିବାରୁ ଏଭଳି ବ୍ୟାଗ୍ ଧରିଲେ ଅନ୍ୟର ଦୃଷ୍ଟି ଆକର୍ଷଣର କେନ୍ଦ୍ରବିନ୍ଦୁ ପାଲଟିବେ ବୋଲି ବ୍ୟବହାରକାରୀ ମତ ରଖନ୍ତି। କେତେକ ଅନ୍ଲାଇନ୍ ସାଇଟ୍ରେ ମଧ୍ୟ ଏସବୁ ଉପଲବ୍ଧ ହେଲାଣି।
ଗାଡ଼ି ବ୍ୟାଗ୍: କାହା କାନ୍ଧରେ ଝୁଲୁଛି ବସ୍ ତ କାହାର ଟ୍ରକ୍, ଆଉ ପୁଣି କାହା ପିଠିରେ ଲାଟେଷ୍ଟ ମଡେଲ୍ କାର ଡିଜାଇନ୍ର ବ୍ୟାଗ୍ ପ୍ୟାକ୍। ଏଭଳି ଅଜବ ଗାଡ଼ି ଡିଜାଇନ୍ର ବ୍ୟାଗ୍ ଏବେ ପାଲଟିଛି ଅନେକ ଯୁବପିଢ଼ିଙ୍କ ପାଇଁ ଲାଟେଷ୍ଟ ଫ୍ୟାଶନ୍ ଷ୍ଟେଟ୍ମେଣ୍ଟ। ଏସବୁ ଲେଦର, ଫୋମ୍, କାନ୍ଭାସ୍ ଆଦି ବିଭିନ୍ନ ମ୍ୟାଟେରିଆଲ୍ରେ ପ୍ରସ୍ତୁତ ହେଉଛି। ତେବେ ଏସବୁ ମଧ୍ୟରୁ ବ୍ଲାକ୍ ଆଣ୍ଡ ହ୍ବାଇଟ୍ କଲର କମ୍ବିନେଶନ୍ ଥିବା ବସ୍ ଏବଂ ଲକ୍ଜୁରୀ କାର୍ ଡିଜାଇନ୍ ବ୍ୟାଗ୍କୁ ଯୁବତୀମାନେ ଅଧିକ ପସନ୍ଦ କରୁଥିବା ଦେଖିବାକୁ ମିଳୁଛି।
ଭାୟୋଲିନ୍ ବ୍ୟାଗ୍: ଏହି ବ୍ୟାଗ୍ପ୍ୟାକ୍ ଦେଖିବାକୁ ଅବିକଳ ଭାୟୋଲିନ୍ ପରି। କେହି ଜଣେ ଏହାକୁ କ୍ୟାରି କଲାବେଳେ ଆପଣ ଦେଖିଲେ ଏହା ଭାୟୋଲିନ୍ ବୋଲି ହଠାତ୍ ଭ୍ରମରେ ପଡ଼ିଯିବେ। ଏହାର ବିଭିନ୍ନ କଲର ଏବଂ ଡିଜାଇନ୍ ମଧ୍ୟ ମିଳୁଛି। ମୁଜିକ୍ ଲଭର ୟୁଥ୍ ଏହାକୁ ବେଶୀ ପସନ୍ଦ କରୁଥିବା ଦେଖିବାକୁ ମିଳୁଛି।
ସ୍କଲ୍ ବ୍ୟାଗ୍: ଅଜବ ଫ୍ୟାଶନ୍ ରୁଚି ରଖୁଥିବା ଯୁବପିଢ଼ିଙ୍କ ପାଇଁ ଏହା ସବୁଠୁ ବେଷ୍ଟ ଚଏସ୍। କାରଣ ଏହି ବ୍ୟାଗ୍ଟି ଦେଖିବା ପାଇଁ ମଣିଷ ଖପୁରି ଭଳି। ଭୟଙ୍କର ଲାଗୁଥିଲେ ହେଁ ଅନ୍ୟଠୁ ଡିଫରେଣ୍ଟ ଲାଗିବା ନିଶାରେ ଏହାର ଡିମାଣ୍ଡ ବଢୁଥିବା ଦେଖିବାକୁ ମଳୁଛି। ଏହାର ବିଭିନ୍ନ ଭେରାଇଟି ମିଳୁଥିବା ବେଳେ ଲେଦର ସ୍କଲ ବ୍ୟାଗ୍ ଅଧିକ ବ୍ୟବହୃତ ହେଉଥିବା ଦେଖିବାକୁ ମିଳୁଛି।
କ୍ୟାଟେଲ୍ ବ୍ୟାଗ୍: କେହି ଜଣେ ଏହି ବ୍ୟାଗ୍ ଧରିଥିବା ଦେଖିଲେ ଆପଣ ହୁଏତ ଭାବିପାରନ୍ତି ସେ ଚା, ଗରମ ପାଣି କିମ୍ବା ଅନ୍ୟ କୌଣସି ତରଳ ପଦାର୍ଥ ନେବା ଲାଗି କ୍ୟାଟେଲ୍ ବ୍ୟବହାର କରୁଛନ୍ତି। ହେଲେ ଏହା ବାସ୍ତବରେ ଏକ ବ୍ୟାଗ୍; ଯେଉଁଥିରେ ଆପଣ ପର୍ସ, ମୋବାଇଲ୍ ଫୋନ୍, ମେକ୍ଅପ୍ କିଟ୍ ଆଦି କ୍ୟାରି କରିପାରିବେ। ଫ୍ୟାଶନ୍ ଟ୍ରେଣ୍ଡରେ ଅପ୍ଡେଟ୍ ରହିବାକୁ ପସନ୍ଦ କରୁଥିବା କେତେକ ଯୁବତୀ ଏହାକୁ ବ୍ୟବହାର କରୁଥିବା ଦେଖିବାକୁ ମିଳୁଛି।