ଅନେକ ସମ୍ପ୍ରଦାୟରେ ମୃତ ବ୍ୟକ୍ତିଙ୍କୁ କଫିନ୍ରେ ରଖି କବର ଦିଆଯିବା ପରମ୍ପରା ରହିଛି। ଏହି କଫିନ୍ ବେଶ୍ ସାଧାରଣ ହୋଇଥାଏ। ଏହାକୁ ଦେଖିଲେ ମୃତ୍ୟୁର ଭୟ ଚାଲିଆସେ। ହେଲେ ଏମିତି ଏକ ଦେଶ ଅଛି, ଯେଉଁଠି ମୃତକଙ୍କ ପାଇଁ ଏଭଳି କଫିନ୍ ବ୍ୟବହାର କରାଯାଏ, ଯାହାକୁ ଦେଖିଲେ ବିଶ୍ୱାସ କରି ହେବନାହିଁ ତାହା କଫିନ୍ ବୋଲି। ପଶ୍ଚିମ ଆଫ୍ରିକାସ୍ଥିତ ଘାନାରେ ଦେଖିବାକୁ ମିଳେ ଅଜବ ଗଜବ କଫିନ୍। ଏଠାରେ କଫିନ୍ ମୃତକଙ୍କ ପରିବାରର ଷ୍ଟାଟସ୍କୁ ଦର୍ଶାଏ। ତେଣୁ କେବେ ବେଶ୍ ସୁନ୍ଦର ତ କେବେ ବେଶ୍ ଅଜବ ଡିଜାଇନ୍ର କଫିନ୍ ବ୍ୟବହାର କରାଯାଏ। ବିବିସିର ଏକ ରିପୋର୍ଟ ମୁତାବକ ଏଠାରେ ଅଜବ କଫିନ୍ ତିଆରି ପରମ୍ପରା କେଉଟ ସମ୍ପ୍ରଦାୟର ଲୋକଙ୍କଠାରୁ ଆସିଛି। ସେମାନେ ମୃତକଙ୍କ ପାଇଁ ମାଛ ଆକୃତିର କଫିନ୍ ତିଆରି କରୁଥିଲେ। ଏହାପରେ ବ୍ୟବସାୟୀମାନେ ଲକ୍ଜ୍ୟୁରି ମର୍ସିଡିଜ୍ କାର୍ ଆକୃତିର କଫିନ୍ ବ୍ୟବହାର କରିବା ଆରମ୍ଭ କରିଥିଲେ; ଯାହା କି ଷ୍ଟାଟସ୍୍କୁ ଦର୍ଶାଏ। ଏଠାରେ ଉଡାଜାହାଜ ଆକୃତିର କଫିନ୍ ବି ଦେଖିବାକୁ ମିଳେ। ୧୯୫୧ ମସିହା ପ୍ରଥମେ ଦୁଇଜଣ ଭାଇ ନିଜର ୯୧ ବର୍ଷୀୟା ମା’ ପାଇଁ ଉଡାଜାହାଜ ଆକୃତିର କଫିନ୍ ତିଆରି କରିଥିଲେ। କଥା କ’ଣ କି ତାଙ୍କ ମା’ କେବେ ବି ଉଡାଜାହାଜରେ ବସି ନ ଥିଲେ। ସବୁବେଳେ ସ୍ବପ୍ନ ଦେଖୁଥିଲେ ଦିନେ ଉଡାଜାହାଜରେ ବସିବେ। ତେଣୁ ମା’ର ସ୍ବପ୍ନ ପୂରଣ କରିବା ପାଇଁ ଏଭଳି ଆକୃତିର କଫିନ୍ ତିଆରି କରିଥିଲେ। ଏବେ ଘାନାରେ ଆହୁରି ଅନେକ ପ୍ରକାରର ଅଜବ କଫିନ୍ ଦେଖିବାକୁ ମିଳୁଛି। ବିଦେଶରେ ବି ଘାନାର କଫିନ୍ର ଚାହିଦା ବଢିଛି। ଘାନା ବଜାରରେ ଏହି କଫିନ୍ର ମୂଲ୍ୟ ୭୦ ହଜାର ଟଙ୍କା ହେଉଥିବାବେଳେ ବିଦେଶରେ ଏହାର ମୂଲ୍ୟ ୭-୮ ଗୁଣ ବଢିଯାଏ।
