ଅନ୍ତର୍ଜାତୀୟ ଟେଷ୍ଟ କ୍ରିକେଟରେ ୪ କିମ୍ବା ୩ଟି ଇନିଂସରେ ଫଳାଫଳ ନିର୍ଣ୍ଣୟ ହୋଇଥାଏ। କିନ୍ତୁ କ୍ରିକେଟ ଇତିହାସରେ ଏଭଳି ଏକ ଟେଷ୍ଟ ଖେଳାଯାଇଥିଲା, ଯେଉଁଥିରେ ମାତ୍ର ଦୁଇଟି ଇନିଂସରେ ନିର୍ଣ୍ଣୟ ହୋଇଥିଲା ବିଜେତା। ୨୦୦୦ ମସିହାର କଥା। ଦକ୍ଷିଣ ଆଫ୍ରିକା ଓ ଇଂଲଣ୍ଡ ମଧ୍ୟରେ ଖେଳାଯାଉଥିବା ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ର ଅନ୍ତିମ ମ୍ୟାଚ୍। ବର୍ଷା କାରଣରୁ ମ୍ୟାଚ୍ର ୩ ଦିନ ଧୋଇ ଯାଇଥିଲା।
ପ୍ରଥମେ ବ୍ୟାଟିଂ କରିଥିବା ଦକ୍ଷିଣ ଆଫ୍ରିକା ପ୍ରଥମ ଦିନ ଶେଷ ସୁଦ୍ଧା ୬ ଉଇକେଟ ହରାଇ ୧୫୫ ରନ୍ କରିଥିଲା। ଏହାପରେ ୩ ଦିନର ଖେଳକୁ ଧୋଇ ନେଇଥିଲା ବର୍ଷା। ମ୍ୟାଚ୍ରେ ଫଳାଫଳ ଆଉ ସମ୍ଭବ ନ ଥାଏ। ଏପରି କି ଇଂଲଣ୍ଡ ପେସର ଡାରେନ ଗଫ୍ ହାଙ୍ଗଓଭରରେ ଥାନ୍ତି। କିନ୍ତୁ ଦକ୍ଷିଣ ଆଫ୍ରିକା ଅଧିନାୟକ ହାନ୍ସି କ୍ରୋନିଏ ମ୍ୟାଚ୍ର ଫଳାଫଳ ବାହାର କରିବା ପାଇଁ ଇଂଲଣ୍ଡର ଅଧିନାୟକ ନାସିର ହୁସେନଙ୍କୁ ଏକ ଅଜବ ପ୍ରସ୍ତାବ ଦେଇଥିଲେ। ଯଦି ଉଭୟ ଦଳ ଗୋଟିଏ ଲେଖାଏ ଇନିଂସକୁ ଫରଫିଟେଡ୍ (ବାତିଲ) ଘୋଷଣା କରନ୍ତି, ତେବେ ଅନ୍ତିମ ଇନିଂସରେ ଫଳାଫଳ ବାହାରିପାରିବ। କ୍ରୋନିଏଙ୍କ ଏଭଳି ପ୍ରସ୍ତାବରେ ବହୁ ଚିନ୍ତା କଲା ପରେ ହଁ ଭରି ଥିଲେ ହୁସେନ। ଠିକ୍ ସେମିତି ହେଲା।
ପ୍ରଥମ ଇନିଂସରେ ୨୪୮/୮ ରନ୍ କରି ଇନିଂସ ଘୋଷଣା କଲା ଦକ୍ଷିଣ ଆଫ୍ରିକା। ଏହାପରେ ଇଂଲଣ୍ଡ ତା’ର ପ୍ରଥମ ଇନିଂସ ଓ କ୍ରୋନିଏଙ୍କ ନେତୃତ୍ୱାଧୀନ ଦଳ ଦ୍ୱିତୀୟ ଇନିଂସ ବାତିଲ କରିଥିଲେ। ଫଳରେ ଇଂଲଣ୍ଡ ଆଗରେ ଧାର୍ଯ୍ୟ ହୋଇଥିଲା ୨୪୯ ରନ୍ର ବିଜୟ ଲକ୍ଷ୍ୟ। ମାଇକେଲ ଭନ ଓ ଆଲେକ ଷ୍ଟଓ୍ବୋର୍ଟଙ୍କ ଅର୍ଦ୍ଧଶତକ ବଳରେ ଇଂଲଣ୍ଡ ଦୁଇ ଉଇକେଟରେ ମ୍ୟାଚ୍ ଜିତି ନେଇଥିଲା ଇଂଲଣ୍ଡ।
ଅବଶ୍ୟ କ୍ରୋନିଏଙ୍କ ପ୍ରସ୍ତାବ ଯୋଗୁ ଦକ୍ଷିଣ ଆଫ୍ରିକାକୁ ପରାଜୟର ସମ୍ମୁଖୀନ ହେବାକୁ ପଡ଼ିଲା। ମାତ୍ର କ୍ରୋନିଏଙ୍କ ପଦକ୍ଷେପକୁ ସେତେବେଳେ ଖୁବ୍ ପ୍ରଶଂସା କରାଯାଇଥିଲା।