‘ଓବିଡିଏନ୍ସ ଟ୍ରାଏଲ୍ସ’ ପ୍ରତିଯୋଗିତାରେ ପ୍ରଥମଥର ଭାଗ ନେଇଥିଲା ଏକ ଦେଶୀ କୁକୁର। ଦେଶୀ ହୋଇଥିଲେ ମଧ୍ୟ ସେ ଅନ୍ୟକୁକୁରଙ୍କଠାରୁ କୌଣସି ଗୁଣରେ କମ୍ ନ ଥିଲା। ଭୁବନେଶ୍ୱରର ଗୌରବ ଅଗ୍ରଓ୍ବାଲଙ୍କ ଏହି ଦେଶୀ କୁକୁର ‘ଟମି’ ନିଜ କୌଶଳ ଦେଖାଇ ସେ ସମସ୍ତଙ୍କୁ ଚକିତ କରିଦେଇଥିଲା। ସେ ଯେଉଁ ରାଉଣ୍ଡରେ ଅଂଶଗ୍ରହଣ କରିଥିଲା, ସେଥିରେ ସେ ପ୍ରଥମ ମଧ୍ୟ ହୋଇଥିଲା। ତେବେ ଏହି କୁକୁରର କାହାଣୀ ଶୁଣିଲେ ମଧ୍ୟ ସମସ୍ତେ ଆଶ୍ଚର୍ଯ୍ୟ ହେବେ। ଗୌରବ ଜଣେ ନବମ ଶ୍ରେଣୀର ଛାତ୍ର। କୁକୁର ରଖିବା ପାଇଁ ତାଙ୍କର ବହୁ ଇଚ୍ଛା ଥିଲେ ମଧ୍ୟ ଘର ଲୋକଙ୍କ ବାରଣ ଯୋଗୁ ସେ କୌଣସି କୁକୁର କିଣି ରଖିପାରୁ ନ ଥିଲେ। ୬ମାସ ତଳେ ନିଜ ଘର ପାଖରେ ଏକ ଦେଶୀ କୁକୁର ଛୁଆ ଦେଇଥିଲା। ସେଥିରୁ ଗୌରବ ଗୋଟିଏ କୁକୁର ଛୁଆକୁ ଘରକୁ ଆଣି ପାଖରେ ରଖିବାକୁ ଚାହିଁଥିଲେ। ଏଥିପାଇଁ ସେ ପ୍ରଥମେ ଜେଜେ ବାପାଙ୍କୁ ମନାଇଥିଲେ। ଏହାପରେ ଘର ଲୋକଙ୍କୁ କହିଥିଲେ। ଏପରିକି କୁକୁର ଛୁଆଟି ଦେଖିବାକୁ ଲାବ୍ରାଡର ଭଳି ହୋଇଥିବାରୁ ଗୌରବ ଘର ଲୋକଙ୍କୁ ତାହା ‘ଲାବ୍ରାଡର’ ବୋଲି କହିଥିଲେ। କିନ୍ତୁ ୧୫-୨୦ଦିନ ପରେ ଘର ଲୋକ ତାହା ଏକ ଦେଶୀ କୁକୁର ବୋଲି ଜାଣିଗଲେ। ସେଥିପାଇଁ ଗୌରବଙ୍କୁ ଆଜି ପର୍ଯ୍ୟନ୍ତ ଗାଳି ଶୁଣିବାକୁ ପଡ଼ୁଛି। ତେବେ ପ୍ରତିଯୋଗିତାରେ ଭାଗ ନେବା ସମ୍ପର୍କରେ ଗୌରବ କୁହନ୍ତି, ନିଜର ପାରଦର୍ଶିତା ଥିଲେ ସବୁ କୁକୁର ସଫଳତା ପାଇପାରିବେ। ଡଗ୍ ଶୋ’ରେ ଅଂଶଗ୍ରହଣ କରିବା ପାଇଁ କୌଣସି ବିଦେଶୀ କୁକୁର ନିହାତି ଆବଶ୍ୟକତା ନାହିଁ। ଦେଶୀ କୁକୁର ବି ସାମିଲ ହୋଇପାରିବେ। ‘ଟମି’ ଗତ ୩ମାସ ହେଲା ଅନ୍ୟ କୁକୁରଙ୍କ ଭଳି ଟ୍ରେନିଂ ନେଉଛି। ଏଥର ପ୍ରଥମଥର ପାଇଁ ଶୋ’ରେ ଭାଗ ନେଇଛି। ଆଗକୁ ଆହୁରି ଭଲ ଭାବେ ପ୍ରସ୍ତୁତ ହୋଇ ଅଂଶଗ୍ରହଣ କରିବ। ତେବେ ଭବିଷ୍ୟତରେ ମୁଁ କୌଣସି ବିଦେଶୀ କୁକୁର କିଣିବି ନାହିଁ ବୋଲି ଗୌରବ କହିଛନ୍ତି।