କଟକ,୩୧।୮(ସୁପ୍ରିୟା ପ୍ରିୟଦର୍ଶିନୀ)କଟକର ଏକ ଘରୋଇ ନର୍ସିଂହୋମ୍ରେ ଜଣେ ରୋଗୀଙ୍କୁ ଭୁଲ୍ ରକ୍ତ ଦିଆଯିବାରୁ ତାଙ୍କ ଅବସ୍ଥା ଗୁରୁତର ରହିଛି। ରେଡ୍କ୍ରସ୍ ବ୍ଲଡ୍ ବ୍ୟାଙ୍କ ପକ୍ଷରୁ ତାଙ୍କୁ ଭୁଲ୍ ରକ୍ତ ଦିଆଯାଇଥିବା ଅଭିଯୋଗ ହୋଇଥିଲା। ଏ ନେଇ ରେଡ୍କ୍ରସ୍ ବ୍ଲଡ୍ ବ୍ୟାଙ୍କ ନିର୍ଦ୍ଦେଶକ ଚନ୍ଦ୍ରିକା ପ୍ରସାଦ ଦାସ ପ୍ରତିକ୍ରିୟାରେ କହିଛନ୍ତି, ଏହି ଘଟଣାରେ ଯଦି ରେଡ୍କ୍ରସ୍ ପକ୍ଷରୁ କାହାରି ତ୍ରୁଟି ଥାଏ ତେବେ ତାଙ୍କ ବିରୋଧରେ ଅତି କଠୋର କାର୍ଯ୍ୟାନୁଷ୍ଠାନ ନିଆଯିବ। ରକ୍ତ ବଦଳିଥିବା ନେଇ ଅଭିଯୋଗ କରିଥିବା ବ୍ୟକ୍ତିଙ୍କୁ ରିପୋର୍ଟ ମଗାଯାଇଥିଲା। କିନ୍ତୁ ସେ ରିପୋର୍ଟ ଦେଇନାହାନ୍ତି। ତାଙ୍କଠାରୁ ରିପୋର୍ଟ ପାଇବା ପରେ ତଦନ୍ତ କରାଯିବ। ସବୁ ସାମ୍ପଲ ଦେଲେ ପୁନଃ ପରୀକ୍ଷା କରାଯିବ। ଘଟଣାକୁ ଗୁରୁତର ଭାବେ ଗ୍ରହଣ କରିଛୁ। ଏଥିସହ ରେଡ୍କ୍ରସ୍ ପକ୍ଷରୁ ତଦନ୍ତ ଆରମ୍ଭ ହୋଇଥିବା ଦାସ କହିଛନ୍ତି।
ସୂଚନାଯୋଗ୍ୟ, କଟକର ଏକ ଘରୋଇ ଡାକ୍ତରଖାନାରେ ବିଭୂତି ଭୂଷଣ ଜେନା(୭୪) ଚିକିତ୍ସିତ ହେଉଥିଲେ। ଅସୁସ୍ଥତା ଓ ହେମୋଗ୍ଲୋବିନ କମିଯିବା କାରଣରୁ ବିଭୂତିଙ୍କୁ ଏ’ ପଜିଟିଭ ରକ୍ତର ଆବଶ୍ୟକତା ପଡ଼ିଥିଲା। ମଙ୍ଗଳବାର ପରିବାର ଲୋକେ ରେଡ୍କ୍ରସ୍ ବ୍ଲଡ୍ ବ୍ୟାଙ୍କରୁ ଏ’ ପଜିଟିଭ ରକ୍ତ ଆଣିଥିଲେ। ଯେତେବେଳେ ବିଭୂତିଙ୍କ ଶରୀରରେ ରକ୍ତ ଦିଆଯାଇଥିଲା, ସେତେବେଳେ ତାଙ୍କ ସ୍ବାସ୍ଥ୍ୟାବସ୍ଥା ଅଧିକ ବିଗିଡ଼ି ଯାଇଥିଲା। ଏହାପରେ ତାଙ୍କୁ ଦିଆଯାଇଥିବା ରକ୍ତର ଗ୍ରୁପ୍ ଟେଷ୍ଟ କରାଯାଇଥିଲା। ସେତେବେଳେ ଉକ୍ତ ରକ୍ତ ବି’ ପଜିଟିଭ ଜଣାପଡିଥିଲା। ଏନେଇ ରୋଗୀଙ୍କ ପୁଅ ଓ ଘରୋଇ ହସ୍ପିଟାଲର କର୍ମଚାରୀ ବ୍ଲଡ ବ୍ୟାଙ୍କ କର୍ତ୍ତୃପକ୍ଷଙ୍କୁ ଜଣାଇଥିଲେ। ଏପରି କି ଲାଇଭ୍ ଟେଷ୍ଟ ପାଇଁ ମଧ୍ୟ କହିଥିଲେ। କିନ୍ତୁ ରେଡ୍କ୍ରସ୍ ପକ୍ଷରୁ କୌଣସି ସହଯୋଗ କରାଯାଇ ନ ଥିବା ସେମାନେ ଅଭିଯୋଗ କରିଥିଲେ। ରୋଗୀଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଥିବା ଜଣାପଡ଼ିଛି। ତେବେ ରେଡ୍କ୍ରସର ଏଭଳି ଗୁରୁତର ଅବହେଳାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି କରିଛି।