ଓ୍ବାଶିଂଟନ/ସିଓଲ, ୬।୬ : ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନ୍ ୮ଟି ବାଲିଷ୍ଟିକ କ୍ଷେପଣାସ୍ତ୍ର ଉତକ୍ଷେପଣ କରିଥିଲେ। ଏହାର ଜବାବରେ ଆମେରିକା ଏବଂ ଦକ୍ଷିଣ କୋରିଆ ପକ୍ଷରୁ ମଧ୍ୟ ଆଠଟି କ୍ଷେପଣାସ୍ତ୍ର ପରୀକ୍ଷା କରିଛନ୍ତି। ଏହି କ୍ଷେପଣାସ୍ତ୍ର ପରୀକ୍ଷା ବିଷୟରେ ସୂଚନା ଦକ୍ଷିଣ କୋରିଆର ଅଧିକାରୀଙ୍କଠାରୁ ଆସିଛି। ଯେଉଁଥିରେ କୁହାଯାଇଛି ଯେ ବିଭିନ୍ନ ଟାର୍ଗେଟରେ ଏହି କ୍ଷେପଣାସ୍ତ୍ରଗୁଡିକ ପରୀକ୍ଷା କରାଯାଇଥିଲା। ଏହା ଦ୍ୱାରା କିମ୍ଙ୍କୁ କଡ଼ା ଜବାବ ମିଳିଥିବାର କୁହାଯାଉଛି।
ସ୍ଥାନୀୟ ନ୍ୟୁଜ ଏଜେନ୍ସି ଅନୁଯାୟୀ ଦକ୍ଷିଣ କୋରିଆ-ଆମେରିକା ଭୂପୃଷ୍ଠରୁ ଭୂପୃଷ୍ଠରେ ଲକ୍ଷ୍ୟଭେଦ କରୁଥିବା କ୍ଷେପଣାସ୍ତ୍ରର ମିଳିତ ପରୀକ୍ଷଣ କରିବା ସହିତ ଆକ୍ରମଣ ସମୟରେ ସଠିକ ଷ୍ଟ୍ରାଇକ କରିବାର କ୍ଷମତାର ପ୍ରଦର୍ଶନ ମଧ୍ୟ କରିଛନ୍ତି।
ଦକ୍ଷିଣ କୋରିଆ ଏକ ବିବୃତ୍ତି ଜାରି କରି କହିଛି ଯେ ’ଆମର ସୈନ୍ୟବାହିନୀ ଉତ୍ତର କୋରିଆ ଦ୍ୱାରା କରାଯାଉଥିବା ବାଲିଷ୍ଟିକ କ୍ଷେପଣାସ୍ତ୍ରକୁ ଦୃଢ଼ନିନ୍ଦା କରୁଛି। ଏଥିସହିତ ଦୁଇଦେଶ ମଧ୍ୟରେ ସାମରିକ ଉତ୍ତେଜନା ବୃଦ୍ଧି କରୁଥିବା ତଥା ସୁରକ୍ଷା ଚିନ୍ତା ବଢ଼ାଉଥିବା ଯେ କୌଣସି କାର୍ଯ୍ୟକଳାପକୁ ତୁରନ୍ତ ବନ୍ଦ କରିବାକୁ ଉତ୍ତର କୋରିଆକୁ ଅନୁରୋଧ କରିଛି।
ରବିବାର ଉତ୍ତର କୋରିଆ ସ୍ବଳ୍ପ ଦୂରଗାମୀ ବାଲିଷ୍ଟିକ କ୍ଷେପଣାସ୍ତ୍ର ପରୀକ୍ଷା କରିଥିଲା। ଏହାପୂର୍ବରୁ ଉତ୍ତର କୋରିଆର ନେତା କିମ ଜୋଙ୍ଗ ଉନ କହିଥିଲେ ଯେ ତାଙ୍କ ଦେଶ ପରମାଣୁ କ୍ଷମତାକୁ ବୃଦ୍ଧି କରିବ।
୧୦ ବର୍ଷରୁ ଅଧିକ କ୍ଷମତାରେ ଥିବା ବେଳେ ଉତ୍ତର କୋରିଆ ନେତା କିମ ଜୋଙ୍ଗ ୧୦୦ରୁ ଅଧିକ କ୍ଷେପଣାସ୍ତ୍ର ଉତକ୍ଷେପଣ କରିଛନ୍ତି। ସେଥିମଧ୍ୟରେ ଯେପରିକି ଆନ୍ତଃମହାଦେଶୀୟ କ୍ଷେପଣାସ୍ତ୍ର ରହିଛି। ଏହା ସହିତ କିମ୍ ଚାରିଟି ଆଣବିକ ପରୀକ୍ଷଣ ମଧ୍ୟ କରିଛନ୍ତି। ତାଙ୍କର ୧୦ ବର୍ଷ କାର୍ଯ୍ୟକାଳ ମଧ୍ୟରେ, ତାଙ୍କ ପିତା କିମ ଜୋଙ୍ଗ ଇଲ ୧୬ ଟି କ୍ଷେପଣାସ୍ତ୍ର ଉତକ୍ଷେପଣ କରିଥିବାବେଳେ ଦୁଇଟି ପରମାଣୁ ପରୀକ୍ଷଣ କରିଥିଲେ।