ଭଦ୍ରକ ଅଫିସ/ପଦ୍ମପୁର,୨୩ା୧୨(ଡି.ଏନ୍.ଏ.)- ଭଦ୍ରକ ବ୍ଲକ ଅଧୀନ ବରହମ୍ପୁର ପଞ୍ଚାୟତର ସେବା ସମବାୟ ସମିତିରେ ସ୍ବୟଂ ସହାୟକ ଗୋଷ୍ଠୀର ଧାନକିଣାକୁ ବିରୋଧ କରି ମଙ୍ଗଳବାର ଶତାଧିକ ଚାଷୀ ଧାନ ବୋଝେଇ ଟ୍ରକ ଓ ଟ୍ରାକ୍ଟର ରଖି ଇଚ୍ଛାପୁରଠାରେ ରାସ୍ତାରୋକୋ କରିଥିଲେ। ଏହି ସେବା ସମବାୟ ସମିତିରେ କେଦାରପୁର, ବରହମ୍ପୁର ଓ ବେନ୍ତାଳ ପଞ୍ଚାୟତର ଚାଷୀମାନେ ଧାନ ବିକ୍ରି କରୁଥିବା ବେଳେ ଜିଲା ପ୍ରଶାସନ ସେବା ସମବାୟ ସମିତି ବଦଳରେ ସ୍ବୟଂ ସହାୟକ ଗୋଷ୍ଠୀକୁ ଧାନ କିଣିବା ପାଇଁ ଅନୁମତି ଦେଇଥିଲେ। ଏହାକୁ ବିରୋଧ କରି ୫ ଶହରୁ ଊର୍ଦ୍ଧ୍ୱ ଚାଷୀ ଗତ ୧୭ ତାରିଖରେ ନିଷ୍ପତ୍ତିର ପୁର୍ନବିଚାର କରିବା ପାଇଁ ଜିଲାପାଳ, ଜିଲା ଯୋଗାଣ ଅଧିକାରୀ, ବିଭାଗୀୟ ମନ୍ତ୍ରୀ ଓ ଏସ୍ପିଙ୍କୁ ଲିଖିତ ଅଭିଯୋଗ କରିଥିଲେ। ୧୮ ତାରିଖରେ ଚାଷୀମାନଙ୍କ ମୋବାଇଲକୁ ଧାନ ବିକ୍ରି କରିବା ପାଇଁ ସୂଚନା ଆସିଥିଲା। ଏଥିସହ ସରକାରଙ୍କର ଖାଦ୍ୟ ଯୋଗାଣ ବିଭାଗର ୱେବ୍ସାଇଟ୍ରେ ପ୍ରଦର୍ଶିତ ହୋଇଥିଲା। କିନ୍ତୁ ଏହାପରେ ସ୍ଥାନୀୟ ସ୍ବୟଂ ସହାୟକ ଗୋଷ୍ଠୀ ଧାନ କିଣିବ ବୋଲି ସୂଚନା ମିଳିଥିଲା। ଏହାକୁ ବିରୋଧ କରି ସୋମବାର ସେବା ସମବାୟ ସମିତି ସମ୍ମୁଖରେ ଚାଷୀମାନେ ଧାରଣା ଦେଇଥିଲେ। ସୋମବାର ପ୍ରଶାସନ କୌଣସି ନିଷ୍ପତ୍ତି ନ ନେବାରୁ ମଙ୍ଗଳବାର ଶତାଧିକ ଚାଷୀ ଇଚ୍ଛାପୁର ଛକରେ ରାସ୍ତା ଅବରୋଧ କରିଥିଲେ। ଫଳରେ ଭଦ୍ରକ-ଚାନ୍ଦବାଲି ଓ ଭଦ୍ରକ-ବାସୁଦେବପୁର ରାସ୍ତାର ଉଭୟପାର୍ଶ୍ୱରେ ଶତାଧିକ ଗାଡ଼ି ଅଟକି ରହିଥିଲା। ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇବାରୁ ଗ୍ରାମାଞ୍ଚଳ ପୋଲିସ ଓ ସାବରଙ୍ଗ ଫାଣ୍ଡି କର୍ମଚାରୀ ମୁତୟନ ଅଛନ୍ତି। ରିପୋର୍ଟ ଲେଖା ସୁଦ୍ଧା ରାସ୍ତାରୋକା ଜାରି ରହିଥିଲା।