ନୀଳଗିରି,୨୬।୧୧(ସ୍ବ.ପ୍ର.): ବାଲେଶ୍ୱର ଜିଲା ନୀଳଗିରି ଆଇଟିଡିଏ ଅଫିସରେ ବିଭିନ୍ନ ପ୍ରକଳ୍ପ ବାବଦରେ ତଥ୍ୟ ସୂଚନା ଅଧିକାର ଆଇନ ବଳରେ ମାଗିଥିଲେ ପୂର୍ବତନ ବିଧାୟକ ଚିତ୍ତରଞ୍ଜନ ଷଡ଼ଙ୍ଗୀ। କାର୍ଯ୍ୟାଳୟର ମୁଖ୍ୟ କିରାଣି ଆଜିକାଲି କହି ଦିନ ପରେ ଦିନ ଗଡ଼େଇ ଚାଲିବା ପରେ ଶେଷରେ ତଥ୍ୟ ଦିଆଯାଇପାରିବ ନାହିଁ ବୋଲି ରୋକ୍ଠୋକ୍୍ ମନା କରିଦେଇଥିଲେ। ଏହାର ପ୍ରତିବାଦ କରି ଶୁକ୍ରବାର ପୂର୍ବାହ୍ନରେ ପୂର୍ବତନ ବିଧାୟକ ଷଡଙ୍ଗୀ ନୀଳଗିରି ଆଇଟିଡିଏ ଅଫିସ୍ ଆଗରେ ଧାରଣାରେ ବସିଥିଲେ। ଧାରଣାକୁ ଭଣ୍ଡୁର କରିବା ପାଇଁ ଧାରଣାସ୍ଥଳରେ ବାଇଡଙ୍କ ପକାଇବା ସହ ଅଞ୍ଚଳର କିଛି ବିପକ୍ଷବାଦୀ ଓ ସପକ୍ଷବାଦୀ ମଧ୍ୟରେ ଠେଲାପେଲା ହୋଇଥିଲା। ଘଟଣାସ୍ଥଳରେ ଉତ୍ତେଜନା ଲାଗି ରହିଥିଲା। ପୋଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା।
ଧାରଣାସ୍ଥଳରେ ଉପଜିଲାପାଳ ମନ୍ଦରଧର ମାହାଳିକ, ତହସିଲଦାର ଅଶେଷ କୁମାର ନାୟକ, ଆଇଆଇସି ଗୋପାଳ ଚନ୍ଦ୍ର କର୍ଣ୍ଣ, ସହକାରୀ ଜିଲାପାଳ ସିଦ୍ଧାର୍ଥ ପରିଡ଼ା ପ୍ରମୁଖ ପହଞ୍ଚତ୍ ଷଡ଼ଙ୍ଗୀଙ୍କ ସହ ସମସ୍ତ ବିଷୟକୁ ନେଇ ଆଲୋଚନା କରିଥିଲେ। ଏଥିସହ ପୂର୍ବରୁ ମାଗିଥିବା ତଥ୍ୟ ଅବଧି ଶେଷ ହେଇଥିବାରୁ ଆଉ ଥରେ ସୂଚନା ଆଇନ ବଳରେ ତଥ୍ୟ ମାଗିଲେ ୭ ଦିନ ମଧ୍ୟରେ ତଥ୍ୟ ଦିଆଯିବାର ପ୍ରତିଶ୍ରୁତି ପରେ ଧାରଣା ପ୍ରତ୍ୟାହୃତ ହୋଇଥିଲା। ଅନ୍ୟପକ୍ଷରେ ଷଡ଼ଙ୍ଗୀ ଧାରଣାରେ ବସିଥିବା ବେଳେ ନୀଳଗିରି ଆଇଟିଡିଏର କନିଷ୍ଠଯନ୍ତ୍ରୀ ରତିକାନ୍ତ ମଢ଼େଇ ତାଙ୍କ ଗାଁରୁ ପ୍ରାୟ ୧୫ଜଣ ଲୋକଙ୍କୁ ଆଣି ଧାରଣାକାରୀଙ୍କ ମଧ୍ୟରେ ଠେଲାପେଲା କରିଥିବା ଅଭିଯୋଗ ହୋଇଛି। ରତିକାନ୍ତ ମଢ଼େଇଙ୍କ ନାମରେ ଷଡ଼ଙ୍ଗୀ ନୀଳଗିରି ଥାନାରେ ଲିଖିତ ଅଭିଯୋଗ କରିଛନ୍ତି।