କୋଣାର୍କ,୨୭ା୮(ଡି.ଏନ୍.ଏ): କୋଣାର୍କ ଏନ୍ଏସିର ୧୦ନଂ. ଓ୍ବାର୍ଡରେ ରହୁଥିବା ଜ୍ଞାନନରଞ୍ଜନ ପଣ୍ଡାଙ୍କୁ ରାସ୍ତାରୁ ଉଠାଇ ନେଇ କୋଣାର୍କ ଥାନା ଏସଆଇ ଦିଲୀପ କୁମାର ବେହେରା ମାଡ ମାରିଛନ୍ତି। ଏ ନେଇ ଜ୍ଞାନରଞ୍ଜନଙ୍କ ସ୍ତ୍ରୀ ଶୈଳବାଳା ମଙ୍ଗଳବାର ଥାନାରେ ଅଭିଯୋଗ କରିଥିଲେ। ତେବେ ଘଟଣାକୁ ୪୮ଘଣ୍ଟା ବିତିଯାଇଥିଲେ ମଧ୍ୟ ମାମଲା ରୁଜୁ ହୋଇ ନ ଥିବାବେଳେ ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇ ନାହିଁ। ଏହି ଦାବିରେ ବୁଧବାର ଜ୍ଞାନରଞ୍ଜନଙ୍କ ସ୍ତ୍ରୀ ଶୈଳବାଳା ଥାନା ଆଗରେ ଧାରଣା ଦେଇଛନ୍ତି। ସୂଚନାଯୋଗ୍ୟ, ଗତ ୨୪ତାରିଖରେ ଜ୍ଞାନରଞ୍ଜନ ଥାନା ଛକ ନିକଟ ଗ୍ରସେରି ଦୋକାନକୁ ସାମଗ୍ରୀ ଆଣିବାକୁ ଯାଇଥିଲେ। ଏହି ସମୟରେ ଏସ୍ଆଇ ବେହେରା ଜ୍ଞାନଙ୍କୁ ରାସ୍ତାରୁ ଉଠାଇ ନେବା ସହ ଥାନା ଭିତରେ ମାଡ଼ ମାରିଥିଲେ। ପରେ ଆଇଆଇସି ରଞ୍ଜନ କୁମାର ମଲ୍ଲିକ ଅଚେତ ଅବସ୍ଥାରେ ଜ୍ଞାନଙ୍କୁ ହସ୍ପିଟାଲ ନେଇ ଚିକିତ୍ସା କରାଇଥିଲେ। ପରେ ଜ୍ଞାନଙ୍କ ଭାଇ ମନୋରଞ୍ଜନ ଥାନାକୁ ଯାଇ ତାଙ୍କୁ ଘରକୁ ଆଣିଥିଲେ। ଘଟଣା ସମ୍ପର୍କରେ ଶୈଳବାଳା ଜାଣିବା ପରେ ମଙ୍ଗଳବାର ଏସ୍ଆଇଙ୍କ ନାମରେ ଅଭିଯୋଗ କରିଥିଲେ। ଘଟଣାକୁ ୪୮ଘଣ୍ଟା ବିତିଯାଇଥିଲେ ମଧ୍ୟ ଥାନା ପକ୍ଷରୁ ମାମଲା ରୁଜୁ ନ ହେବା ଓ ସମ୍ପୃକ୍ତ ଏସ୍ଆଇଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିବାରୁ ଶୈଳବାଳା ଓ କେତେଜଣ ମହିଳା ବୁଧବାର ଅପରାହ୍ନ ୪ଟାରେ ଥାନା ଆଗରେ ଧାରଣା ଦେଇଥିଲେ। ୨ଘଣ୍ଟା ବସିବା ପରେ ମଧ୍ୟ ଥାନାର କୌଣସି କର୍ମଚାରୀ ଆସି ନ ଥିଲେ। ପରେ ସନ୍ଧ୍ୟା ହୋଇଯିବାରୁ ଧାରଣାରୁ ଉଠିଥିଲେ ମଧ୍ୟ ଆଗକୁ ଧାରଣା ଜାରି ରହିବ ବୋଲି ଶୈଳବାଳା କହିଛନ୍ତି। ବୁଧବାର ମଧ୍ୟ ଏସ୍ଆଇଙ୍କ ପ୍ରତିକ୍ରିୟା ମିଳି ନ ଥିବାବେଳେ ଆଇଆଇସି ମଲ୍ଲିକ କହିଛନ୍ତି, ତଦନ୍ତ ଜାରି ରହିଛି। ଘଟଣାରେ ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଏସପିଙ୍କୁ ଅବଗତ କରାଯାଇଛି। ଏସ୍ପିଙ୍କ ନିର୍ଦ୍ଦେଶ ଆସିଲେ ମାମଲା ରୁଜୁ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।