ଭୁବନେଶ୍ୱର,୧୨।୬(ବ୍ୟୁରୋ): ଆସନ୍ତା ଜୁଲାଇ ୧ ତାରିଖରୁ ସମଗ୍ର ରାଜ୍ୟରେ ଘରୋଇ ବସ୍ ଚଳାଚଳ ବନ୍ଦ ରହିବ। ରାଜ୍ୟ ଘରୋଇ ବସ୍ ମାଲିକ ସଂଘ ଏଭଳି ଚେତାବନୀ ଦେଇଛି। ଶନିବାର ଘରୋଇ ବସ୍ ମାଲିକ ସଂଘର ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା। ଦୀର୍ଘ ଦିନ ଧରି ୮ ଦଫା ଦାବି ପୂରଣ ନ ହେବାରୁ ସର୍ବସମ୍ମତିକ୍ରମେ ଧର୍ମଘଟକୁ ଓହ୍ଲାଇବାକୁ ସଂଘ ନିଷ୍ପତ୍ତି ନେଇଛି।
୨୦୨୧ ନଭେମ୍ବର ୧୧ ତାରିଖରେ ତତ୍କାଳୀନ ପରିବହନ ମନ୍ତ୍ରୀ ଓ ସଚିବଙ୍କ ଉପସ୍ଥିତିରେ ନିଷ୍ପତ୍ତି ହୋଇଥିବା ଦାବିରୁ କୌଣସି ଗୋଟିଏ ବି ପୂରଣ ହୋଇନାହିଁ ବୋଲି ସଂଘ ଅଭିଯୋଗ କରିଛି।
ବସ୍ ପର୍ମିଟଗୁଡ଼ିକୁ ତୃତୀୟ ପକ୍ଷକୁ ହସ୍ତାନ୍ତର କରିବା ନିଷ୍ପତ୍ତି କାର୍ଯ୍ୟକାରୀ ନ କରିବା, ବସ୍ଗୁଡ଼ିକର ବଡିକୋଡ୍ ଆଇନ ଅନୁସାରେ ହୋଇଥିଲେ ମଧ୍ୟ ଉକ୍ତ ବସ୍ଗୁଡ଼ିକୁ ଦିନବେଳା ଚଳାଚଳ କରିବାକୁ ଦିଆଯାଉ ନାହିଁ। ମୋଟରଯାନ ଆଇନର ବ୍ୟବସ୍ଥା ଅନୁଯାୟୀ ବସ୍ଗୁଡ଼ିକର ଫିଟ୍ନେସ ଅବଧି ବଳବତ୍ତର ରହିଥିବା ପର୍ଯ୍ୟନ୍ତ ସ୍ଥାୟୀ ପର୍ମିଟ ଦେବାର ନିୟମ ସତ୍ତ୍ୱେ ଉକ୍ତ ବସ୍ଗୁଡ଼ିକୁ ପର୍ମିଟ ଦିଆଯାଉ ନାହିଁ। ମଙ୍ଗୁଳିଠାରୁ ସମ୍ବଲପୁର ପର୍ଯ୍ୟନ୍ତ ଜାତୀୟ ରାଜପଥ-୫୫ର ନିର୍ମାଣ କାର୍ଯ୍ୟରେ ବିଳମ୍ବ, ଯାତ୍ରୀବାହୀ ବସ୍ଗୁଡ଼ିକ ଜାତୀୟ ରାଜପଥ ଉପରେ ଯାତ୍ରୀ ଓହ୍ଲାଇବା ଓ ଚଢ଼ାଇବା ପାଇଁ ସରକାର କୌଣସି ସ୍ଥାନ ନିରୂପଣ ନ କରିବା, ଘରୋଇ ବସ୍ଗୁଡ଼ିକର ସାମାନ୍ୟ ତ୍ରୁଟି ପାଇଁ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା, ନିକଟରେ ପରିବହନ କମିଶନରଙ୍କ ଦ୍ୱାରା ଜାରି କରାଯାଇଥିବା ନୂତନ ନିୟମ ଅନୁସାରେ ୫ ବର୍ଷ ସ୍ଥାୟୀ ପର୍ମିଟ ଥିବା ବସ୍ ଯଦି ୧ ବର୍ଷ ପାଇଁ ଅଫ୍ରୋଡ ହୁଏ ସେହି ବସ୍ର ପର୍ମିଟ ନବୀକରଣ ନ ହେବା, କୋଭିଡ୍ ସମୟରେ ବସ୍ ମାଲିକମାନଙ୍କୁ କୋହଳ ଋଣ ଯୋଗାଇ ଦେବା ପାଇଁ ସରକାର ଦେଇଥିବା ପ୍ରତିଶ୍ରୁତି କାର୍ଯ୍ୟକାରୀ ନ କରିବା ଏବଂ ଯାତ୍ରୀବାହୀ ବସ୍ଗୁଡ଼ିକରେ ହାଇସିକ୍ୟୁରିଟି ନମ୍ବର ପ୍ଲେଟ୍ ଲଗାଇବା ନିଷ୍ପତ୍ତି ପ୍ରତ୍ୟାହାର କରିବା ଭଳି ୮ ଦଫା ଦାବିକୁ ନେଇ ଘରୋଇ ବସ୍ ମାଲିକ ସଂଘ ସରକାରଙ୍କୁ ଚେତାବନୀ ଦେଇଛିି।
ଦାବି ସମ୍ପର୍କରେ ମୁଖ୍ୟମନ୍ତ୍ରୀ, ପରିବହନ ମନ୍ତ୍ରୀ, ସଚିବ, ପରିବହନ କମିଶନରଙ୍କୁ ସଂଘ ପକ୍ଷରୁ ଜଣାଇ ଦିଆଯାଇଛି। ରାଜ୍ୟ ସରକାର ଯଦି ଜୁନ୍ ୩୦ ତାରିଖ ମଧ୍ୟରାତ୍ର ସୁଦ୍ଧା ଏ ସମସ୍ତ ଦାବି ପୂଣ ନ କରନ୍ତି, ତେବେ ଜୁଲାଇ ୧ ତାରିଖରୁ ରାଜ୍ୟର ୧୪ ହଜାର ଘରୋଇ ବସ୍ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରହିବ ବୋଲି ସଂଘ ସଭାପତି ଲୋକନାଥ ପାଣି ଚେତାବନୀ ଦେଇଛନ୍ତି।