ନୂଆଦିଲ୍ଲୀ,୫।୪: ଆଉ ମାତ୍ର ୫ ଦିନ ପରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆରମ୍ଭ ହେବାକୁ ଯାଉଥିବା ବେଳେ ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)କୁ ଶକ୍ତ ଧକ୍କା ଲାଗିଛି। ଯୁବ ଓପନର ଦେବଦତ୍ତ ପଡିକାଲ କୋଭିଡ୍-୧୯ ଟେଷ୍ଟରେ ପଜିଟିଭ ବୋଲି ଜଣାପଡିଛି। ଫଳରେ ଆରସିବିକୁ ଝଟକା ଲାଗିଛି। ସ୍ପିନର ଅକ୍ଷର ପଟେଲ ଓ ନୀତୀଶ ରାଣାଙ୍କ ପରେ ତୃତୀୟ ଆଇପିଏଲ୍ ଖେଳାଳିଭାବେ ପଡିକାଲ ପଜିଟିଭ ବୋଲି ଜଣାପଡିଛି। ଅକ୍ଷର ଦିଲ୍ଲୀ କ୍ୟାପିଟାଲ୍ସ ଓ ନୀତୀଶ କୋଲକାତା ନାଇଟ୍ ରାଇଡର୍ସ ତରଫରୁ ଏଥର ଆଇପିଏଲ ଖେଳିବେ।
ଟେଷ୍ଟରେ ପଜିଟିଭ ବୋଲି ଜଣାପଡିବା ପରେ ୨୦ ବର୍ଷୀୟ ପଡିକାଲଙ୍କୁ ଆଇସୋଲେଶନରେ ରଖାଯାଇଛି ଓ ସେ କ୍ୱାରାଣ୍ଟାଇନରେ ରହିଛନ୍ତି। ପଡିକାଲ ଅତିକମ୍ରେ ଆରସିବି ପାଇଁ ପ୍ରଥମ ଦୁଇଟି ମ୍ୟାଚ୍ ନ ଖେଳିବା ସ୍ପଷ୍ଟ ହୋଇଛି। ଚେନ୍ନାଇରେ ଆରସିବିର ଖେଳାଳିମାନେ ଅଭ୍ୟାସ କରୁଛନ୍ତି। ଗତ ସଂସ୍କରଣରେ ପଡିକାଲ ଆଇପିଏଲ୍ର ସବୁଠାରୁ ବଡ଼ ଆବିଷ୍କାର ବିବେଚିତ ହୋଇଥିଲେ। ସେ ୧୫ଟି ଆଇପିଏଲ୍ ମ୍ୟାଚ୍ ଖେଳି ୩୧.୫୩ ରନ ହାରରେ ୪୭୩ ରନ ସଂଗ୍ରହ କରିଥିଲେ। ଘରୋଇ କ୍ରିକେଟରେ ମଧ୍ୟ ସେ ଜବରଦସ୍ତ ଫର୍ମର ନମୁନା ପ୍ରଦର୍ଶନ କରିଛନ୍ତି। ଘରୋଇ ଟି୨୦ ଟୁର୍ନାମେଣ୍ଟ ସୟଦ ମୁସ୍ତାକ ଅଲି ଟ୍ରଫିରେ ସେ କର୍ନାଟକ ତରଫରୁ ପ୍ରତିନିଧିତ୍ୱ କରି ୬ଟି ମ୍ୟାଚ୍ ଖେଳି ୪୩.୬୦ ହାରରେ ୨୧୮ ରନ ସଂଗ୍ରହ କରିଥିଲେ। ଏହାପରେ ଦିନିକିଆ ଘରୋଇ ଟୁର୍ନାମେଣ୍ଟ ବିଜୟ ହଜାରେ ଟ୍ରଫିରେ ୭ଟି ମ୍ୟାଚ୍ ଖେଳି ୧୪୭.୪୦ ହାରରେ ୭୩୭ ରନ ସଂଗ୍ରହ କରିଥିଲେ। ଆସନ୍ତା ୯ ତାରିଖରୁ ଆଇପିଏଲ ଆରମ୍ଭ ହେବାକୁ ଯାଉଥିବା ବେଳେ ଉଦ୍ଘାଟନୀ ମୁକାବିଲାରେ ଆରସିବି ଗତଥରର ଚାମ୍ପିୟନ ରୋହିତ ଶର୍ମାଙ୍କ ନେତୃତ୍ୱାଧୀନ ମୁମ୍ବାଇ ଇଣ୍ଡିଆନ୍ସକୁ ଭେଟିବ।
