ଗଞ୍ଜାମ,୧୫।୬(ଡି.ଏନ.ଏ.)ଗଞ୍ଜାମ ଜିଲା କଣ୍ଟିଆଗଡ଼ ଗ୍ରାମ ଠାରୁ କିଛି ଦୂରରେ ପ୍ରସିଦ୍ଧ ବାବା ବଟେଶ୍ୱର ଶୈବପୀଠ ଅବସ୍ଥିତ । ଝାଉଁ ବଣ ଜଙ୍ଗଲ ମଧ୍ୟରେ ଥିବା ଏହି ମନ୍ଦିରଠୁ ଅଳ୍ପ ଦୂରରେ ବଟେଶ୍ୱର ସମୁଦ୍ର ବେଳାଭୂମି। ବୁଧବାର ଦ୍ୱିତୀୟ ରଜ ଅବସରରେ ହଜାର ହଜାର ପର୍ଯ୍ୟଟକ ଏହି ସମୁଦ୍ର ବେଳାଭୂମିରେ ମଜା ନେଉଥିବା ଦେଖିବାକୁ ମିଳିଥିଲା। ପ୍ରବଳ ଗ୍ରୀଷ୍ମ ପ୍ରବାହ ସତ୍ତ୍ୱେ ପର୍ଯ୍ୟଟକ ସମୁଦ୍ରରେ ବୁଡୁଥିବା ଦେଖିବାକୁ ମିଳିଥିଲା। ଏଥିସହ ଝାଉଁ ଜଙ୍ଗଲର ବିଭିନ୍ନ ସ୍ଥାନରେ ପର୍ଯ୍ୟଟକ ମାନଙ୍କ ଭୋଜି ଭାତର ଆସର ଜମିଥିଲା। ଏହି ଶୈବପୀଠ ଠାରେ ପର୍ଯ୍ୟଟକଙ୍କ ସୁବିଧା ନିମନ୍ତେ ସୁଲଭ ଶୌଚାଳୟ, କଲ୍ୟାଣୀ ମଣ୍ଡପ ଓ ଆକର୍ଷଣୀୟ ଶିଶୁ ଉଦ୍ୟାନ ରହିଛି। ଛୋଟ ଛୁଆ ଠାରୁ ଆରମ୍ଭ କରି ଯୁବତୀଯୁବକମାନେ ପାର୍କର ମଜା ନେଉଛନ୍ତି। ଏଥିପାଇଁ କୋଣ ଅନୁକୋଣ ତଥା ଜିଲା ବାହାରୁ ମଧ୍ୟ ପ୍ରତିଦିନ ଏଠାକୁ ହଜାର ହଜାର ଭକ୍ତ ଆସି ଏହାର ମଜା ନେଉଛନ୍ତି l ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ରଜ ସଂକ୍ରାନ୍ତି ଅବସରରେ ମନ୍ଦିର ପରିଚାଳନା କମିଟି ପକ୍ଷରୁ ପ୍ରସାଦର ଆୟୋଜନ କରାଯାଇଥିଲା। ପ୍ରବଳ ଭିଡ଼କୁ ଦେଖି ରମ୍ଭା ଥାନା ପୋଲିସ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି । ବଟେଶ୍ୱର ବାଲିଯାତ୍ରା ପଡିଆରେ ବିଭିନ୍ନ ରକମର ଖେଳନା, ଆଇସକ୍ରିମ, ଥଣ୍ଡା ପାନୀୟ ଜଳ, ଆଦି ପସରା ପଡିଛି l ଷୋହଳ ନମ୍ବର ଜାତୀୟ ରାଜପଥ ହୁମା ଠାରୁ ମାତ୍ର ତିନିରୁ ଚାରି କିମି ଯିବା ପରେ ଏହି ପ୍ରସିଦ୍ଧ ଶୈବ ପୀଠ ଦେଖିବାକୁ ମିଳେ।
