ମହାକାଳପଡ଼ା,୧୫ା୫ (ଡି.ଏନ.ଏ.): ଖରାଦିନ ଆସିଲେ ଥଣ୍ଡା ପାନୀୟ ପ୍ରତି ବେଶ୍ ଚାହିଦା ବୃଦ୍ଧି ପାଇଥାଏ। ଡହଡ଼ହ ଖରାରୁ ଟିକେ ଆଶ୍ୱସ୍ତି ପାଇବାକୁ ପିଲାଠାରୁ ବୁଢ଼ା ପର୍ଯ୍ୟନ୍ତ ସମସ୍ତେ ଥଣ୍ଡା ପାନୀୟ ପ୍ରତି ମନ ବଳାଇଥାନ୍ତି। ଆଇସ କ୍ରିମ ହେଉ କି କୁଲିଫି ପାଟିରେ ଟିକେ ବାଜୁ ବାଜୁ ଦେହ ମନ ଫୂର୍ତ୍ତି ଲାଗେ। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗର ଅଞ୍ଚଳରେ ଝଡ଼ ହେଉ କି ତୋଫାନ, ଖରା କି ବର୍ଷା ସକାଳୁ ଏକ ଦଦରା ସାଇକେଲରେ ଆଇସ୍ କ୍ରିମ ପେଟି ଲଦି ଗାଁକୁ ଗାଁ ବୁଲି ଆଇସ୍ କ୍ରିମ ବିକ୍ରୟ କରି ପରିବାର ଗୁଜୁରାଣ ମେଣ୍ଟାଉଛନ୍ତି ସୋନାଲି ହାଲଦାର୍ (୩୬)। ସୋନାଲି କୁହନ୍ତି, ନିଜର ଜମିବାଡ଼ି ନ ଥିବାରୁ ଏହି କଷ୍ଟସାଧ୍ୟ ବୃତ୍ତିକୁ ଆପଣେଇଛୁ। ଦିନମାନ ଆଇସ କ୍ରିମ ଯାହା ବିକ୍ରି ହୁଏ ସେଥିରେ ପିଲାମାନଙ୍କ ପାଠପଢ଼ା, ଔଷଧ ପତ୍ର ଓ ଘରର ଅତ୍ୟାବଶ୍ୟକ ଖର୍ଚ୍ଚ ହୋଇଥାଏ। ସମାଜରେ ସଂଘର୍ଷ କରି ଜୀବନ ଜିଇବାକୁ ପ୍ରୟାସ କରୁଛି। ଆଇସ କ୍ରିମ ବିକ୍ରୟ କରିବାକୁ ଗଲା ବେଳେ ଖରାବର୍ଷା ସାମ୍ନା କରିବାକୁ ପଡ଼େ। ଶ୍ରଦ୍ଧାର ସହ ପିଲାମାନେ ଆସି ଆଇସ କ୍ରିମ ନେଇଥାନ୍ତି। ବେଳେ ବେଳେ ଏମିତିବି ହୁଏ କୁନି କୁନି ପିଲାମାନଙ୍କ ଅଝଟ ଦେଖି ମାଗଣାରେ ଆଇସ କ୍ରିମ ଦେଇଥାଏ। ଇଚ୍ଛା ନ ଥିଲେ ମଧ୍ୟ ଏହି ବ୍ୟବସାୟ କରିବାକୁ ପରିସ୍ଥିତି ବାଧ୍ୟ କରିଛି। ଦୃଢ଼ ଇଚ୍ଛାଶକ୍ତି କଠିନ ପରିଶ୍ରମ ବଳରେ ସବୁ ସମ୍ଭବ ହୋଇଥାଏ ବୋଲି ସୋନାଲି କହିଛନ୍ତି। ରବିବାର ବିଶ୍ୱ ମାତୃ ଦିବସରେ ସୋନାଲି ସମାଜ ପାଇଁ ଉଦାହରଣ ସୃଷ୍ଟି କରିଛନ୍ତି।