ଭୁବନେଶ୍ୱର,୫ା୫(ବ୍ୟୁରୋ)-ଆସନ୍ତା ୬ ତାରିଖରେ ଦକ୍ଷିଣ-ପୂର୍ବ ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି। ୭ ତାରିଖ ବେଳକୁ ଏହା ଲଘୁଚାପରେ ପରିଣତ ହେବ। ଲଘୁଚାପ ଘନୀଭୂତ ହୋଇ ୮ କିମ୍ବା ୯ ତାରିଖ ବେଳକୁ ଅବପାତର ରୂପନେବା ସମ୍ଭାବନା ରହିଛି । ଲଘୁଚାପ କ୍ରମେ ଘନୀଭୂତ ହୋଇ ଉତ୍ତର ଦିଗକୁ ଗତିକରିବ। ପରେ ଏହା ଅଧିକ ଘନୀଭୂତ ହୋଇ ୯ ତାରିଖ ବେଳକୁ ବାତ୍ୟାର ରୂପ ନେଇପାରେ ବୋଲି ଆଇଏମ୍ଡି(ଭାରତୀୟ ପାଣିପାଗ ବିଭାଗ) ପକ୍ଷରୁ ଆକଳନ କରାଯାଇଛି। ତେବେ ଘୂର୍ଣ୍ଣିବଳୟ କେବେ ହେବ ସେ ନେଇ ବିଭାଗ ପକ୍ଷରୁ ସ୍ପଷ୍ଟ କରାଯାଇ ନାହିଁ।
ଅନ୍ୟପକ୍ଷରେ ଆଇଏମ୍ଡି ଡିଜି ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ଲଘୁଚାପ ସୃଷ୍ଟି ନ ହେବା ଯାଏ ବାତ୍ୟା ସମ୍ପର୍କରେ ପୂର୍ବାନୁମାନ କରିବା ସମ୍ଭବ ନୁହେଁ। ଯଦିଓ ଓଡ଼ିଶା ବାତ୍ୟାପ୍ରବଣ ରାଜ୍ୟ, ତେବେ ସବୁ ବାତ୍ୟାର ପ୍ରଭାବ ଯେ ଓଡ଼ିଶା ଉପରେ ରହିବ ତାହା କହିବା ଠିକ୍ ନୁହେଁ। ସମ୍ଭାବ୍ୟ ବାତ୍ୟା କିମ୍ବା ଓଡ଼ିଶା ଉପରେ ଏହାର ପ୍ରଭାବ ନେଇ ଆଇଏମ୍ଡି ପକ୍ଷରୁ କୌଣସି ପୂର୍ବାନୁମାନ ହୋଇନାହିଁ। ଲଘୁଚାପ ସୃଷ୍ଟି ହେବା ପରେ ବାତ୍ୟା ଗତିପଥ, ବେଗ ଇତ୍ୟାଦି ସମ୍ପର୍କରେ ଠିକ୍ ତଥ୍ୟ ଦିଆଯାଇପାରିବ। ଗ୍ରୀଷ୍ମ ସମୟରେ ଅର୍ଥାତ୍ ମେ’ ମାସରେ ଅନେକ ବାତ୍ୟା ସୃଷ୍ଟି ହେଉଛି। ଏହି ସମୟରେ ବାତ୍ୟା ଆସୁଥିବା କିଛି ନୂଆ ନୁହେଁ। ତେବେ ସବୁ ବାତ୍ୟା ଯେ ଓଡ଼ିିଶା ଉପରେ ପକାଇବ ତାହା ମଧ୍ୟ ଠିକ୍ ନୁହେଁ ବୋଲି ଆଇଏମ୍ଡି ଡିଜି କହିଛନ୍ତି।
ତେବେ ଓ୍ବିଣ୍ଡ ଓ୍ବେଦର ଭଳି ବିଭିନ୍ନ ଜାତୀୟ ଓ ଅନ୍ତର୍ଜାତୀୟ ପାଣିପାଗ ମଡେଲ ସୂଚନା ଅନୁଯାୟୀ ବାତ୍ୟା ବାଂଲାଦେଶ କିମ୍ବା ମ୍ୟାନ୍ମାର ଆଡ଼େ ମୁହାଁଇବା ଅଧିକ ସମ୍ଭାବନା ରହିଛି। ଓଡ଼ିଶା ପ୍ରତି ବିପଦ ନ ଥିବା କୁହାଯାଇଛି। ବାତ୍ୟା ଖବର ପ୍ରକାଶ ପାଇବା ପରେ ରାଜ୍ୟ ସରକାର ମଧ୍ୟ ତତ୍ପର ହୋଇ ଉଠିଛନ୍ତି। ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ, ଏସ୍ଆରସି ପ୍ରମୁଖ ସମୀକ୍ଷା ବୈଠକ କରିଛନ୍ତି। ସମସ୍ତ ଜିଲାପାଳଙ୍କୁ ଆଲର୍ଟ ରଖାଯାଇଛି ।
ବାତ୍ୟା ଆସୁ କି ନ ଆସୁ ଆସନ୍ତା ୭ ତାରିଖରୁ ରାଜ୍ୟରେ ପ୍ରବଳ ଗ୍ରୀଷ୍ମ ପ୍ରବାହ ଆରମ୍ଭ ହେବ। ଦିନର ସର୍ବୋଚ୍ଚ ତାପମାତ୍ରା ୪୩ ଡିଗ୍ରୀ ସେଲ୍ସିୟସକୁ ଟପିଯିବା ସମ୍ଭାବନା ରହିଛି । ତାତିର ପ୍ରକୋପ ୧୨ ତାରିଖ ପର୍ଯ୍ୟନ୍ତ ଜାରି ରହିବା ନେଇ ପୂର୍ବାନୁମାନ କରାଯାଇଛି। ଗତ ୨୪ ଘଣ୍ଟା ମଧ୍ୟରେ କାଳବୈଶାଖୀ ଯୋଗୁ ରାଜ୍ୟର ବିଭିନ୍ନ ସ୍ଥାନରେ ଝଡ଼ ବର୍ଷା ହୋଇଛି। ଏଥିଯୋଗୁ ସର୍ବୋଚ୍ଚ ତାପମାତ୍ରା ୪୦ ଡିଗ୍ରୀ ସେଲ୍ସିୟସ ତଳେ ରହିଛି। ଶୁକ୍ରବାର ଭୁବନେଶ୍ୱରରେ ୩୮ ମିଲିମିଟର ବର୍ଷା ହୋଇଥିବା ବେଳେ ଖୋର୍ଦ୍ଧା ୧୮, ଯାଜପୁର ୮.୪, ଛତ୍ରପୁର ୨.୬, ନବରଙ୍ଗପୁରରେ ୨ ମିଲିମିଟର ବର୍ଷା ରେକର୍ଡ କରାଯାଇଛି।