କୋଲକାତା, ୧୩।୯ : ଗତ ବର୍ଷ ପଶ୍ଚିମବଙ୍ଗରେ ହୋଇଥିବା ବିଧାନସଭା ନିର୍ବାଚନରେ ଭାଜପା ଜିତିପାରିନଥିଲେ ମଧ୍ୟ ଏହା ୭୭ଟି ସିଟ ହାସଲ କରି ମୁଖ୍ୟ ବିରୋଧୀ ଦଳ ହୋଇପାରିଥିଲା। କିନ୍ତୁ ଆଶା କରାଯାଉଥିବା ପ୍ରଦର୍ଶନ ଅଭାବରୁ ଲୋକସଭା ନିର୍ବାଚନରେ ଏହାର ଆଶା ନେଇ ସନ୍ଦେହ ଉପୁଜିଥିଲା। ୨୦୧୯ ଲୋକସଭାରେ ୧୮ ଟି ଆସନ ଜିତିଥିବା ଭାଜପା ରାଜ୍ୟରେ ମିଶନ ୨୦୨୪ ପାଇଁ ଅଣ୍ଟା ଭିଡ଼ିଛି।
ମଙ୍ଗଳବାର କୋଲକାତାରେ ସଚିବାଳୟ ଚାଲୋ ଅଭିଯାନ ବ୍ୟତୀତ ହଜାର ହଜାର ଭାଜପା କର୍ମୀ ରାଜରାସ୍ତାରେ ଜୋରଦାର ପ୍ରଦର୍ଶନ କରିଥିଲେ। ଭାଜପା ମିଶନ ୨୦୨୪ ଅନ୍ତର୍ଗତ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସରକାରଙ୍କୁ ଘେରି ରହି ଏକ ପରିବେଶ ସୃଷ୍ଟି କରିବା ଆରମ୍ଭ କରିଛି। ଏଥି ସହିତ ତିନି ଦଶନ୍ଧି ଧରି ପଶ୍ଚିମବଙ୍ଗକୁ ଶାସନ କରିଥିବା ବାମପନ୍ଥୀ ଦଳ ଏବଂ କଂଗ୍ରେସର ଅନୁପସ୍ଥିତ ସ୍ପଷ୍ଟ ବାରି ହେଉଛି।
ଗୋଟିଏ ପଟେ ମମତା ବାନାର୍ଜୀ ମିଶନ ୨୦୨୪ପାଇଁ ବିରୋଧୀ ଏକତାକୁ ଏକଜୁଟ କରିବାକୁ ଚେଷ୍ଟା କରୁଛନ୍ତି। ଅପରପକ୍ଷରେ ଭାଜପା ପ୍ରସ୍ତୁତି ଉପରେ ଧ୍ୟାନ ଦେଉଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ନିକଟରେ ବିହାର ଭାଜପାର ସଭାପତି ଥିବା ମଙ୍ଗଲ ପାଣ୍ଡେଙ୍କୁ ପଶ୍ଚିମବଙ୍ଗକୁ ପଠାଇବା ମଧ୍ୟ ଭାଜପାର ସ୍ବତନ୍ତ୍ର ରଣନୀତିର ଏକ ଅଂଶ। ରାଜ୍ୟ ବିଧାନସଭା ନିର୍ବାଚନରେ ଇଚ୍ଛାକୃତ ଫଳାଫଳ ନ ପାଇବା ସତ୍ତ୍ୱେ ଭାଜପା ପ୍ରୟାସ ଜାରି ରଖିଛି। ବିଭିନ୍ନ ପ୍ରସଙ୍ଗରେ ଭାଜପା କ୍ରମାଗତ ଭାବରେ ମମତା ସରକାରଙ୍କୁ ଘେରି ରହିଛି।
ବିଶେଷ କରି ନିକଟରେ ମମତା ସରକାରଙ୍କ ମନ୍ତ୍ରୀ ପାର୍ଥ ଚାଟାର୍ଜୀଙ୍କ ବିରୋଧରେ ଯେଉଁଭଳି ଭାବେ ଦୁର୍ନୀତି ଅଭିଯୋଗ ଆଣାଯାଇଛି, ତାହା ଭାଜପାର ଶକ୍ତିକୁ ବୃଦ୍ଧି କରିଛି। ୨୦୧୪ ରେ ରାଜ୍ୟର ୪୨ ଟି ଲୋକସଭା ଆସନ ମଧ୍ୟରୁ ଦୁଇଟି ଜିତିଥିବା ଭାଜପା ୨୦୧୯ଲୋକସଭା ନିର୍ବାଚନରେ ଏହି ସଂଖ୍ୟାକୁ ୧୮କୁ ବୃଦ୍ଧି କରିଛି। ୨୦୨୪ ଏହି ସଂଖ୍ୟାକୁ ଆହୁରି ବୃଦ୍ଧି କରିିବାକୁ ଭାଜପା ଲକ୍ଷ୍ୟ ରଖିଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।