ନୂଆଦିଲ୍ଲୀ,୧୧।୬ : ୨୦୦୭ ଟି୨୦ ବିଶ୍ୱକପ୍ରେ ଇଂଲଣ୍ଡ ବିପକ୍ଷ ମ୍ୟାଚ୍ରେ ଷ୍ଟୁଆର୍ଟ ବ୍ରଡଙ୍କ ଓଭରରେ ୬ ଛକା ଲଗାଇଥିଲେ ଭାରତୀୟ ବ୍ୟାଟ୍ସମ୍ୟାନ ଯୁବରାଜ ସିଂ। ବୋଧହୁଏ ଏହା ଥିଲା ଷ୍ଟୁଆର୍ଟଙ୍କ କ୍ୟାରିୟରର ସବୁଠୁ ଖରାପ ଦିନ। ଏହି ଘଟଣା ଯୋଗୁ ବ୍ରଡଙ୍କ କ୍ୟାରିୟର ଉପରେ ଲାଗି ଯାଇଥିଲା ପ୍ରଶ୍ନବାଚୀ। ଏପରି କି ଷ୍ଟୁଆର୍ଟଙ୍କ ବାପା କ୍ରିସ ବ୍ରଡ ମଧ୍ୟ ପୁଅର କ୍ୟାରିୟରର ନେଇ ଅନିଶ୍ଚତତାରେ ଥିଲେ। ଏ ବିଷୟରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳାଯାଇଥିବା ସେମିଫାଇନାଲ ମ୍ୟାଚ୍ ପୂର୍ବରୁ ଯୁବରାଜଙ୍କୁ ଭେଟି କହିଥିଲେ ସିନିୟର ବ୍ରଡ। ଏ ନେଇ ପୂର୍ବତନ ଭାରତୀୟ ଅଲରାଉଣ୍ଡର ଏକ ସାକ୍ଷାତ୍କାର ଅବସରରେ ପ୍ରକାଶ କରିଛନ୍ତି।
ମୋର ମନେ ଅଛି, ଅଷ୍ଟ୍ରେଲିଆ ବିପକ୍ଷରେ ସେମିଫାଇନାଲ ପୂର୍ବରୁ ମୋତେ ଷ୍ଟୁଆର୍ଟଙ୍କ ବାପା ଭେଟିଥିଲେ। ସେ ଉକ୍ତ ମ୍ୟାଚ୍ରେ ରେଫରୀ ଦାୟିତ୍ୱରେ ଥିଲେ। ‘ମୋ ପୁଅର କ୍ୟାରିୟରର ପ୍ରାୟ ନଷ୍ଟ କରିବା ପାଇଁ ତୁମକୁ ଧନ୍ୟବାଦ’ ବୋଲି କହିଥିଲେ ଖ୍ରିସ ବ୍ରଡ୍। ମୋର କୌଣସି ବ୍ୟକ୍ତିଗତ ଶତୃତା ନ ଥିଲା। ମୁଁ ମଧ୍ୟ ଗୋଟିଏ ଓଭରରେ ୫ ଛକା ଖାଇଛି। ମୋତେ ଜଣା ଏହା କେଉଁଭଳି ବାଧେ ବୋଲି ଏକ ସାକ୍ଷାତ୍କାରରେ ୨୦୦୭ ଟି୨୦ ଓ ୨୦୧୧ ବିଶ୍ୱକପ୍ର ହିରୋ ଯୁବରାଜ କହିଛନ୍ତି। ଏହାବାଦ୍ ଇଂଲଣ୍ଡ ବିପକ୍ଷ ଉକ୍ତ ମ୍ୟାଚ୍ରେ ପିନ୍ଧିଥିବା ଜର୍ସିକୁ ଉପହାର ସ୍ବରୂପ ବ୍ରଡଙ୍କୁ ପ୍ରଦାନ କରିବାକୁ ଅନୁରୋଧ କରିଥିଲେ କ୍ରିସ।
ଉଲ୍ଲେଖଥାଉ କି, ୨୦୦୭ ବିଶ୍ୱକପ୍ ପୂର୍ବରୁ ଇଂଲଣ୍ଡ ଗସ୍ତ କରିଥିଲା ଟିମ୍ ଇଣ୍ଡିଆ। ଏକ ଦିନିକିଆ ମ୍ୟାଚ୍ରେ ଯୁବରାଜଙ୍କ ଓଭରରେ କ୍ରମାଗତ ୫ ଛକା ଲଗାଇଥିଲେ ଇଂଲଣ୍ଡ ଅଲରାଉଣ୍ଡର ଦିମିତ୍ରି ମାସ୍କେରେନହସ।
