ନୂଆଦିଲ୍ଲୀ,୧୫ା୫: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ଲକ୍ଷ୍ନୌ ସୁପର ଜାଏଣ୍ଟ୍ସ ବିପକ୍ଷରେ ଅର୍ଦ୍ଧଶତକ ହାସଲ କରିଛନ୍ତି ଦିଲ୍ଲୀ କ୍ୟାପିଟାଲ୍ସର ଟ୍ରିଷ୍ଟାନ ଷ୍ଟବ୍ସ ଓ ଅଭିଷେକ ପୋରେଲ। ଉଭୟ ଖେଳାଳିଙ୍କ ଅର୍ଦ୍ଧଶତକ ବଳରେ ଦିଲ୍ଲୀ ନିର୍ଦ୍ଧାରିତ ଓଭରରେ ୪ ଉଇକେଟରେ ୨୦୮ ରନ୍ କରିଥିଲା। ଜବାବରେ ଖବର ପ୍ରସ୍ତୁତି ସୁଦ୍ଧା ଲକ୍ଷ୍ନୌ ୯ ଓଭରରେ ୫ ଉଇକେଟ ହରାଇ ୮୫ ରନ୍ କରିଛି। ଏହି ମ୍ୟାଚ୍ ପାଇଁ ଉଭୟ ଦଳ ୩ ପରିବର୍ତ୍ତନ ସହ ଓହ୍ଲାଇଥିଲେ। ୟଶ ଠାକୁର, କ୍ରିଷ୍ଣପ୍ପା ଗୌତମ ଓ ଆୟୁଷ ବଦୋନୀଙ୍କ ସ୍ଥାନରେ ୟୁଧବୀର ସିଂ ଚରକ, ମୋହସିନ୍ ଖାନ୍ ଓ ଅର୍ଶଦ ଖାନଙ୍କୁ ଖେଳାଇଥିଲା ଲକ୍ଷ୍ନୌ। ଅନ୍ୟ ପକ୍ଷରେ ଦିଲ୍ଲୀ କ୍ୟାପିଟାଲ୍ସ ଡେଭିଡ୍ ଓ୍ବାର୍ନର, ଇଶାନ୍ତ ଶର୍ମା ଓ କୁମାର କୁଶାଗ୍ରଙ୍କୁ ବାଦ ଦେଇଥିଲା।
ଦିଲ୍ଲୀର ଅରୁଣ ଜେଟ୍ଲୀ କ୍ରିକେଟ ଷ୍ଟାଡିୟମରେ ଖେଳା ଯାଇଥିବା ମ୍ୟାଚରେ ଲକ୍ଷ୍ନୌ ଟସ୍ ଜିତି ପ୍ରଥମେ ବୋଲିଂ କରିଥିଲା। ବିପଜ୍ଜନକ ଜେକ୍ ଫ୍ରେଜର ମ୍ୟାକଗ୍ରୁକଙ୍କୁ ଖାତା ଖୋଲିବା ଆଗରୁ ଆଉଟ କରିଥିଲେ ଅର୍ଶଦ ଖାନ୍। ତେବେ ଅନ୍ୟତମ ଓପନର ଅଭିଷେକ ପୋରେଲ(୫୮) ଓ ଶାଇ ହୋପ୍ (୩୮) ଦ୍ୱିତୀୟ ଉଇକେଟରେ ୯୨ ରନ୍ ଯୋଡିଥିଲେ। ଇନିଂସର ଟପ୍ ସ୍କୋରର ଥିବା ପୋରେଲ୍ ୩୩ ବଲ୍ ଖେଳି ୫ ଚୌକା ଓ ୪ ଛକା ମାରିଥିଲେ। ହୋପ୍ ୨୭ ବଲ୍ ଖେଳି ୩ ଚୌକା ଓ ୨ ଛକା ମାରିଥିଲେ। ୨ ଖେଳାଳି ମାତ୍ର ୧୭ ରନ୍ ମଧ୍ୟରେ ପ୍ୟାଭିଲିୟନ ଫେରିଥିବା ବେଳେ ଅଧିନାୟକ ରିଷଭ ପନ୍ତ ମାତ୍ର ୩୩ ରନ୍ କରିଥିଲେ। ୨୩ ବଲ ଖେଳିଥିବା ପନ୍ତ ୫ ଚୌକା ମାରି ଦଳୀୟ ସ୍କୋର ୧୫୮ରେ ପ୍ୟାଭିଲିୟନ୍ ଫେରିଥିଲେ। ତେବେ ଶେଷ ଭାଗରେ ଟ୍ରିଷ୍ଟାନ ଷ୍ଟବ୍ସ(୫୭*) ଓ ଅକ୍ଷର ପଟେଲ(୧୪*) ଦଳୀୟ ସ୍କୋରକୁ ୨୦୦ ପାର କରାଇଥିଲେ। ଅନ୍ତିମ ୨୨ ବଲ୍ରେ ଉଭୟ ଖେଳାଳି ଦ୍ରୁତ ବ୍ୟାଟିଂ କରି ୫୦ ରନ୍ ଯୋଡିଥିଲେ। ଟ୍ରିଷ୍ଟାନ ଷ୍ଟବ୍ସ ୨୫ ବଲ୍ ଖେଳି ୩ ଚୌକା ଓ ୪ ଛକା ମାରିଥିଲେ। ଲକ୍ଷ୍ନୌ ପକ୍ଷରୁ ନବୀନ ଉଲ ହକ୍ ସର୍ବାଧିକ ୨, ରବି ବିଷ୍ଣୋଇ ଓ ଅର୍ଶଦ ଖାନ୍ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଦିଲ୍ଲୀ କ୍ୟାପିଟାଲ୍ସ ୨୦ ଓଭରରେ ୨୦୮/୪ (ଅଭିଷେକ ପୋରେଲ-୫୮, ଟ୍ରିଷ୍ଟାନ ଷ୍ଟବ୍ସ-୫୭*, ଶାଇ ହୋପ୍-୩୮, ନବୀନ ଉଲ ହକ-୨/୫୧, ରବି ବିଷ୍ଣୋଇ-୧/୨୬, ଅର୍ଶଦ ଖାନ୍-୧/୪୫)।
