କଣାସ,୨୭।୫(ସ୍ବ.ପ୍ର.): ଦୀର୍ଘ ୩ ବର୍ଷ ହେଲା ଦଶମ ଶ୍ରେଣୀ ବାର୍ଷିକ ପରୀକ୍ଷା ସମେଟିଭ୍-୧ ଓ ସମେଟିଭ୍-୨ ପଦ୍ଧତି ଅନୁସାରେ ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣ ଶିକ୍ଷା ଏବଂ ଓଡ଼ିଶା ମାଧ୍ୟମିକ ଶିକ୍ଷା ପରିଷଦ ଦ୍ୱାରା ଅନୁଷ୍ଠିତ ହୋଇଆସୁଥିଲା। ଛାତ୍ରୀଛାତ୍ର ଏହି ଢାଞ୍ଚାରେ ପରୀକ୍ଷା ଦେବାକୁ ମାନସିକସ୍ତରରେ ନିଜକୁ ପ୍ରସ୍ତୁତ କରିସାରିଥିବାବେଳେ ହଠାତ୍ ଏହି ଢାଞ୍ଚାକୁ ପରିବର୍ତ୍ତନ କରି ପୁରୁଣା ଢାଞ୍ଚାରେ ଦଶମ ଶ୍ରେଣୀ ପରୀକ୍ଷା କରିବାକୁ ଘୋଷଣା ହୋଇଛି। ଫଳରେ ଛାତ୍ରୀଛାତ୍ରଙ୍କ ମନରେ ଭୟ ସୃଷ୍ଟି ହୋଇଛି। ପ୍ରଥମତଃ ପିଲାମାନେ ପୁରୁଣା ଢାଞ୍ଚାରେ ପରୀକ୍ଷା ଦେବାକୁ ବିମୁଖ ହେଉଥିବା ଦୃଶ୍ୟ ନଜରକୁ ଆସିଛି। କାରଣ ନବମ ଶ୍ରେଣୀରେ ସେହି ପିଲା ସେମିଷ୍ଟର ଢାଞ୍ଚାରେ ପରୀକ୍ଷା ଦେଇ ଦଶମ ଶ୍ରେଣୀକୁ ଉତ୍ତୀର୍ଣ୍ଣ ହୋଇଛନ୍ତି। ଦ୍ୱିତୀୟରେ ଏହି ପିଲାମାନେ ଏପ୍ରିଲରୁ ବହି ଓ ଟେଷ୍ଟପେପର ଇତ୍ୟାଦି କିଣି ନିଜକୁ ପ୍ରସ୍ତୁତ କରୁଥିଲେ। ଟେଷ୍ଟପେପର ପ୍ରକାଶନ ସଂସ୍ଥା ଟେଷ୍ଟପେପର ସେମିଷ୍ଟର ଢାଞ୍ଚାରେ ପ୍ରସ୍ତୁତ କରି ବିକ୍ରି ନିମନ୍ତେ ବଜାରକୁ ଛାଡିଥିଲା। ଫଳରେ ପିଲାମାନେ ଗଁା ଗହଳିରେ ଥିବା ପୁସ୍ତକ ବିକ୍ରେତାଙ୍କଠାରୁ ଏହି ସେମିଷ୍ଟର-୧ କିଣିଥିଲେ। କିନ୍ତୁ ଏବେ ହଠାତ୍ ପାଠ୍ୟକ୍ରମ ପରିବର୍ତ୍ତନ ଯୋଗୁ ଛାତ୍ରୀଛାତ୍ର ଦୋକାନୀଙ୍କୁ ଉକ୍ତ ଟେଷ୍ଟପେପର ଫେରାଇ ଦେଇ ତାଙ୍କର ଟଙ୍କା ଫେରାଇ ନେବାକୁ ଅଡ଼ି ବସିଛନ୍ତି। ହୋଲସେଲ୍ର ପୁସ୍ତକ ବିକ୍ରେତା ଖୁଚୁରା ଦୋକାନୀଙ୍କଠାରୁ ଟେଷ୍ଟପେପର ଫେରସ୍ତ ନେଉନାହାନ୍ତି। ଯେଉଁ କମ୍ପାନୀ ଟେଷ୍ଟପେପର ପ୍ରସ୍ତୁତ କରିଛି ସେମାନେ ନେବାକୁ ରାଜି ହେଉ ନ ଥିବା କହିଛନ୍ତି। ତେଣୁ ଛାତ୍ରୀଛାତ୍ର ଓ ଗଁା ଗହଳିର ପୁସ୍ତକ ବିକ୍ରେତା ଏବେ ହଟହଟାର ଶିକାର ହେଉଛନ୍ତି। ଏ ଦିଗରେ ସରକାର ଉଚିତ୍ ପଦକ୍ଷେପ ଗ୍ରହଣ କରିବାକୁ ଛାତ୍ରୀଛାତ୍ରଙ୍କ ସହ ଅଭିଭାବକମାନେ ଦାବି କରିଛନ୍ତି।